– دەيدى قازتالوۆ نەسيە سەرىكتەستىگىنىڭ توراعاسى اباي باعىسوۆ
قازتالوۆ نەسيە سەرىكتەستىگىنىڭ قۇرىلعانىنا 10 جىل تولىپ وتىر. ارينە, بۇل نەسيە سەرىكتەستىگى العاشقى جىلدارى قيىندىققا كەزىككەنى بەلگىلى. الايدا, اباي باعىسوۆ جەتەكشىلىك جاساعان ۋاقىتتان كەيىن ونىڭ جۇمىسى ءارى قاراي دامىپ, باياۋ جۇرىستەن گورى, جەلۋگە كوشتى. بىلايشا ايتقاندا, كوشكە ىلەستى. وسىعان وراي قازتالوۆ نەسيە سەرىكتەستىگىنىڭ توراعاسى اباي باعىسوۆتى اڭگىمەگە تارتقان بولاتىنبىز.
ەلباسىمىز حالىققا ارناعان جولداۋىندا جانە «100 ناقتى قادام» ۇلت جوسپارىندا اۋىل شارۋاشىلىعى سالاسىن العا قاراي دامىتۋدى ءمىندەتتەگەنى بەلگىلى. قاراوزەن مەن سارىوزەننىڭ ورتاسىندا ورنالاسقان ءبىزدىڭ اۋدان مال شارۋاشىلىعىن دامىتۋعا وتە قولايلى ولكە, دەپ باستادى ول اڭگىمەسىن.
نەسيە سەرىكتەستىگىنىڭ العاشقى جىلدارى جۇمىسىنىڭ ءناتيجەلى بولماعانىن جاسىرۋعا بولماس. ونىڭ دا وزىندىك سەبەپتەرى بولدى. كوپتەگەن شارۋا قوجالىعى جەتەكشىلەرى وسى سەرىكتەستىككە مۇشە بولىپ كىرگەندە, بەلگىلى ءبىر ءناتيجەلەرگە جەتە الامىز با, المايمىز با, دەگەن كۇماندى ويلاردىڭ جەتەگىندە بولعانى راس. ۋاقىت وتە كەلە ادامدار بۇل نەسيە سەرىكتەستىگىنىڭ ءوز شارۋالارىن دوڭگەلەتۋگە دارمەنى بار ەكەنىن ءتۇسىنە باستادى.
سونىڭ ايعاعىنداي, قازىرگى كۇندە نەسيە سەرىكتەستىگى 61 شارۋا قوجالىعىنىڭ جانە 1 كاسىپكەردىڭ باسىن بىرىكتىرىپ, ۇلكەن شارۋالار تىڭدىرۋدا. بيىل تاعى دا وعان 6 شارۋا قوجالىعى كىرۋگە ءوتىنىش ءبىلدىرىپ وتىر.
10 جىلدىڭ ىشىندە نەسيە سەرىكتەستىگىنە 510 ملن. تەڭگە نەسيە قاراجات بەرىلگەن بولسا, سونىڭ 450 ملن. تەڭگە نەسيە قاراجاتى سوڭعى 3 جىلدا بەرىلدى. بۇل سوڭعى جىلدارى نەسيە سەرىكتەستىگى مۇشەلەرىنىڭ مەملەكەتتىك باعدارلامالارعا كەڭىنەن قاتىسۋىن بايقاتادى. سەرىكتەستىك مۇشەلەرى, اسىرەسە, مال شارۋاشىلىعىن دامىتۋ باعىتىنداعى باعدارلامالارعا ىقىلاس تانىتۋدا.
وسى نەسيە سەرىكتەستىگىندەگى «قامقور» شارۋا قوجالىعىنىڭ جەتەكشىسى مۇرات حاسانوۆ قوي مالىن اسىلداندىرۋ جۇمىستارىمەن اينالىسۋ ءۇشىن «اگرارلىق نەسيە كورپوراتسياسى» اق ارقىلى العان نەسيە قارجىسىنا اتىراۋ وبلىسى «قۇرمانعازى» وندىرىستىك كووپەراتيۆىنەن 1000 باس ەدىلباي قويىن ساتىپ السا, ال «اقبوتا» شارۋا قوجالىعىنىڭ جەتەكشىسى مەرەكە قايبوشەۆ پەن «دۋلات» شارۋا قوجالىعىنىڭ جەتەكشىسى نۇرلان مالاەۆ تا وسىنداي باعدارلامالارمەن شارۋالارىن دوڭگەلەتۋدە. ەندى ءبىر «اتتەگەن-اي» دەپ ايتاتىن ءماسەلە, سەرىكتەستىكتىڭ كەيبىر ءمۇشەلەرى ءالى وسىنداي دەڭگەيگە جەتە قويعان جوق. سوندىقتان مەملەكەت قولداۋ كورسەتىپ جاتقان باعدارلامالارعا ولار قورىقپاي قاتىسسا ەكەن دەيمىن.
ۇيىمداستىرۋ جانە تۇسىنىك جۇمىستارىنىڭ ناتيجەسىندە 2013-2015 جىلدار ارالىعىندا نەسيە سەرىكتەستىگى 992 ءىرى قارا, 4050 قوي-ەشكى, 198 باس جىلقىمەن تولىقتىرىلسا, 15 تراكتور, 1 ەكسكاۆاتور, 1 كاماز, 2 اۆتوكولىك جانە 10 اۋىل شارۋاشىلىعى تەحنيكالارىمەن جابدىقتالىپ وتىر. بۇل الداعى ۋاقىتتا سەرىكتەستىك مۇشەلەرىنىڭ ءوز جۇمىستارىن العا قاراي جىلجىتۋىنا ءمۇمكىندىك بەرەدى دەگەن ءسوز.
ءبولىپ ايتار ءبىر قۋانارلىق جاعداي, نەسيە سەرىكتەستىگىنىڭ ءبىر مۇشەسى 2015 جىلى 75 ملن. تەڭگە نەسيە الۋعا قول جەتكىزدى. بۇل بۇرىن-سوڭدى بولىپ كورمەگەن ناتيجە.
نەسيە سەرىكتەستىگى ءوزىنىڭ «اگرارلىق نەسيە كورپوراتسياسى» اق الدىنداعى قويعان مىندەتتەرىن ورىنداۋدا رەسپۋبليكا بويىنشا ءبىرىنشى ورىندا تۇر. دەمەك, بۇل نەسيە سەرىكتەستىگىنىڭ قاراوزەن مەن سارىوزەننىڭ ورتاسىندا ورنالاسقان اۋداننىڭ اۋىل شارۋاشىلىعىن دامىتۋدا وزىندىك ويىپ الار ورنى بار دەپ بىلەمىز.
وتكەن جەلتوقسان ايىندا استانا قالاسىندا وتكەن «اگرارلىق نەسيە كورپوراتسياسى» اق-تىڭ 15 جىلدىق مەرەكەسىنە قاتىسىپ كەلدىم. سوندا بولاشاقتا نەسيە سەرىكتەستىگىنىڭ جۇمىسىن العا قاراي دامىتاتىن ءبىراز ماعلۇماتتار الىپ كەلسەم, سونىمەن قاتار ءارىپتەستەرىممەن دە پىكىرلەستىم. بۇل الداعى ۋاقىتتا ءبىزدىڭ جۇمىسىمىزعا جاڭاشا سەرپىن بەرەدى دەپ سانايمىن.
قازىرگى كۇندە نەسيە سەرىكتەستىگى اگرارلىق نەسيە كورپوراتسياسىنىڭ باستاۋىمەن وكرۋگتەردە اۋىلدىق وندىرىستىك كووپەراتيۆ قۇرۋدى قولعا الۋدا. وسى ارادا ءبىر ايتا كەتەر ءجايت, اۋىلدىق جەردە وندىرىستىك كووپەراتيۆ قۇرماي, جەكە-جەكە دامۋ بولمايتىنىن ءتۇسىنۋىمىز كەرەك. ويتكەنى, شەتەلدە وسى ءۇردىس جاقسى دامىعان ەكەن. سول ءۇردىستى ءبىز دە پايدالانۋىمىز قاجەت.
ەندى وسى نەسيە سەرىكتەستىگى جۇمىسىنىڭ العا باسۋىنا سەرىكتەستىكتە قىزمەت ىستەپ جاتقان مامانداردىڭ دا ەڭبەگىنىڭ بار ەكەنىن ايتۋعا ءتيىسپىن. بۇگىنگى كۇندە قىزمەت ەتەتىن 6 مامان ءتۇرلى سالا بويىنشا سەرىكتەستىك مۇشەلەرىنە ءتۇرلى كەڭەستەر بەرىپ, ولاردىڭ قۇجاتتارىن ۋاقىتىلى ازىرلەپ وتىرادى. ناتيجەسىندە شارۋامەن اينالىسىپ جاتقان سەرىكتەستىك مۇشەلەرى ءوز ۋاقىتتارىن ءتيىمدى وتكىزۋدە.
جازىپ العاندار
گۇلفيا كوشباەۆا,
جۋرناليست,
تەمىر قۇسايىن,
«ەگەمەن قازاقستان».
باتىس قازاقستان وبلىسى.