وبلىس ورتالىعىنداعى «اتامەكەن» مەيرامحاناسىندا ەل تاۋەلسىزدىگىنىڭ 25 جىلدىعىنا ارنالعان «ءبىز بىرگەمىز!» اتتى قايىرىمدىلىق اكتسياسى ءوتتى.
وبلىس اكىمدىگىنىڭ قولداۋىمەن «اقتوبە قالالىق سال اۋرۋلارىنا شالدىققان ازاماتتاردى قولداۋ ورتالىعى» قوعامدىق بىرلەستىگىنىڭ ۇيىمداستىرۋىمەن وتكىزىلگەن شاراعا وبلىس اكىمى بەردىبەك ساپارباەۆ, مەملەكەتتىك مەكەمەلەر مەن قوعامدىق ۇيىمداردىڭ باسشىلارى, مەتسەناتتار, كاسىپكەرلەر, ەرىكتىلەر جانە 150 بەلسەندى مۇمكىندىگى شەكتەۋلى ازامات قاتىستى.
جەتىمىن جىلاتپاعان, قامكوڭىل جاندارىن قاتاردان قالدىرمايتىن, قايىرىمدىلىعىن ايامايتىن اتا-بابادان كەلە جاتقان يماندىلىق ءىسىنىڭ جالعاسىپ, داستۇرگە اينالىپ كەلە جاتقانى كوڭىل مارقايتادى. اكتسيانىڭ ماقساتى – ءمۇمكىندىگى شەكتەۋلى ازاماتتاردى قولداۋعا, ولاردىڭ وزدەرىن قوعامنىڭ تولىققاندى ءمۇشەسى رەتىندە سەزىنۋلەرىنە جاعداي تۋعىزۋ بولىپ تابىلادى. بۇل اكتسيا وسى باعىتتاعى باعالى باستاما عانا ەمەس, قايتارىمدى قايىرىمدىلىق شارا رەتىندە دە قۇندى. وسى ارقىلى قانشاما قامكوڭىل جانداردىڭ جۇرەگىنە ىزگىلىك نۇرى قۇيىلادى, ولاردى ومىرگە تالاپتاندىرادى دەسەڭشى. وڭىردە وسى اكتسيا وتكىزىلىپ كەلە جاتقان 16 جىلدىڭ ىشىندە سپورت, ءمادەنيەت سالالارىندا, قوعامدىق ومىردە جەتىستىكتەرگە جەتكەن 3 مىڭنان استام ەرەسەكتەر مەن بالالار قايىرىمدىلىق شۋاعىنا بولەنگەن ەكەن. اكتسيادا العاش بولىپ ءسوز العان وبلىس اكىمى بەردىبەك ساپارباەۆ وسى اكتسيانى ون التى جىل بويى ۇيىمداستىرۋعا ۇيىتقى بولىپ كەلە جاتقان «اقتوبە قالالىق سال اۋرۋلارىنا شالدىققان ازاماتتاردى قولداۋ ورتالىعى» قوعامدىق بىرلەستىگىنىڭ ءتورايىمى قۇرالاي بايمەنوۆاعا ريزاشىلىعىن بىلدىرە كەلىپ, وبلىستا 23 مىڭنان استام مۇمكىندىگى شەكتەۋلى ازامات تۇراتىنىن, ونىڭ ەكى مىڭعا جۋىعى 16 جاسقا دەيىنگى بالالار ەكەنىن جەتكىزدى. اكتسيانى ۇيىمداستىرۋداعى ەڭ باستى ماقسات – وسىنداي مۇمكىندىگى شەكتەۋلى ازاماتتارعا كومەك كورسەتۋ, كوڭىلدەرىن كوتەرىپ, قولتىقتارىنان دەمەپ, جاقسىلىق جاساۋ ەكەنىن اتاپ ءوتتى. «راس, مۇمكىندىگى شەكتەۋلى ازاماتتارعا ۇكىمەت, قوعام تاراپىنان قامقورلىق جاسالىپ, كومەك كورسەتىلۋدە. ەلباسى نۇرسۇلتان نازارباەۆ الەۋمەتتىك ءماسەلەلەرگە ايرىقشا كوڭىل ءبولىپ كەلەدى, ءمۇمكىندىگى شەكتەۋلى جاندارعا تۇراقتى قولداۋ كورسەتىلۋدە. ءجاردەماقىلارى ءوسىرىلىپ, ولاردى جۇمىسقا ورنالاستىرۋ قولعا الىنۋدا. باسقا دا جەڭىلدىكتەر قاراستىرىلۋدا. بۇگىنگى وتكىزىلىپ وتىرعان اكتسيا سونىڭ دايەكتى دالەلى ەكەنى ءسوزسىز», دەدى بەردىبەك ماشبەك ۇلى. ءوڭىر باسشىسى ەل تاۋەلسىزدىگىنىڭ 25 جىلدىعىنا بايلانىستى شارالار باستالىپ كەتكەنىن, وعان اركىم حال-قادەرىنشە ۇلەس قوسۋى كەرەكتىگىن ەسكە سالىپ, جينالعانداردى ءبۇگىنگى شارامەن قۇتتىقتادى, وسى اكتسيانى قولداۋعا كەلگەن «نۇر-مۇقاسان» دۋەتى, ءانشى اقىلبەك جەمەنەي جانە «مۇزارت» توبىنا ريزاشىلىعىن ءبىلدىردى. بۇدان كەيىن وبلىس اكىمى پەشەنەلەرىنە جازعان تاعدىردىڭ تاۋقىمەتىن مويىماي كوتەرىپ, ءوز سالالارى بويىنشا ۇلكەن تابىسقا جەتكەن, ەلىمىز ەگەمەندىك العان جىلى دۇنيەگە كەلگەن ءبىر توپ جاسقا ازاماتتىق ۇستانىمدارى ءۇشىن «ءتاۋەلسىزدىك قۇرداستارى» نوميناتسياسى بويىنشا العىس حات پەن اقشالاي سىيلىق تاپسىردى.
ال اكتسياعا قاتىسۋشىلاردى بەلسەندى ومىرلىك كوزقاراستارى ءۇشىن قۇتتىقتاۋ تىلەگىن ارناعان وبلىستىق كاسىپكەرلەر پالاتاسىنىڭ توراعاسى نۇرلىبەك مۇقانوۆ مۇمكىندىگى شەكتەۋلى جانداردىڭ ەڭبەك ەتۋگە دەگەن قۇلشىنىسى زور ەكەنىن, قازىر ءوز ىستەرىن اشىپ, تابىس تاۋىپ جۇرگەن مۇگەدەك جانداردىڭ قاتارى ارتا تۇسكەنىن ايرىقشا اتاپ ءوتتى. ول دا ءوز كەزەگىندە جەكە كاسىپكەرلىكپەن اينالىسىپ ءجۇرگەن مۇمكىندىگى شەكتەۋلى 8 ازاماتقا «ءوز ءىسىنىڭ شەبەرى» نوميناتسياسى بويىنشا العىس حات پەن سىيلىقتار ۇسىندى. سونداي-اق, اكتسيا اياسىندا «مەنىڭ مۇمكىندىگىم مول», «جانىمىزداعى جاندار», «ارداگەر» نوميناتسيالارى بويىنشا مۇگەدەكتەر قوعامىنىڭ بەلسەندى ءمۇشەلەرى مەن مۇمكىندىگى شەكتەۋلى بالالاردىڭ اتا-انالارى ماراپاتتالدى. شارادا وسى يماندىلىق ءىستىڭ باستاماشىسى قۇرالاي ءبايمەنوۆا جىل سايىن قايىرىمدىلىق اكتسياسىن وتكىزۋگە تۇراقتى تۇردە دەمەۋشىلىك جاساپ جۇرگەن كاسىپكەر-مەتسەناتتارعا «قايىرىمدىلىق جاساۋ ءمادەنيەتى» نوميناتسياسىن تابىستاپ, ىستىق ءىلتيپاتىن جەتكىزدى. ولاردىڭ اراسىندا «رامازان» جشس باسشىسى ورىنباسار مۋسين, «قازاقستاننىڭ حالىق بانكى» اق اقتوبە فيليالىنىڭ ديرەكتورى اپۋاجان تولەگەنوۆا, «حابار سەرۆيس» جشس باسشىسى مۇحتار ءابىلقايىروۆ, «ساۋلەت قۇرىلىس سەرۆيس-2007» جشس ديرەكتورى نۇرجامال تاڭقاەۆا سىندى مەتسەناتتار بار. اكتسيا بارىسىندا بەلگىلى كاسىپكەرلەر مەن ءىرى كاسىپورىن باسشىلارى ءوزدەرىنىڭ الەۋمەتتىك جوبالارىن ۇسىنىپ, سول ارقىلى مۇگەدەك بالالاردىڭ «ەۆروگرەيد-2016» حالىقارالىق مۋزىكالىق فەستيۆالىنە قاتىسۋىنا, ءمۇمكىندىگى شەكتەۋلى ازامات ت.ماتاەۆتىڭ ۇيىنە پاندۋس سالىپ بەرۋگە جانە مۇگەدەكتەردى جۇمىسقا ورنالاستىرۋعا قولداۋ كورسەتەتىندەرىنەن حاباردار ەتتى.
– مەن مۇگەدەكتىگىمە قاراماستان اۆتوكولىك ءجۇرگىزىپ, قالالىقتارعا تاكسي قىزمەتىن كورسەتىپ, ءوز ناپاقامدى ءوزىم ايىرىپ ءجۇرمىن. قوعامدىق جۇمىستاردان دا قالمايمىن, سپورتپەن اينالىسامىن. تەك ۇيىمدە پاندۋس بولماي قينالىپ ءجۇر ەدىم. سوعان قاجەتتى قارجىنى بولگەن «دينار-ەلەكتروماش» جشس باسشىسى سەرگەي ۆيشنياكقا العىسىم شەكسىز, – دەيدى تەمىربەك ماتاەۆ.
ساتىبالدى ءساۋىرباي,
«ەگەمەن قازاقتان».
اقتوبە وبلىسى.