قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان ءىس-شارانىڭ ءبىرى سارقان اۋدانى اكىمدىگىنىڭ ۇيىمداستىرۋىمەن ءوتتى. مەديتسينا, حالىققا قىزمەت كورسەتۋ ورتالىعىنىڭ جانە مادەنيەت سالاسى قىزمەتكەرلەرى اۆتوكەرۋەنمەن اتالعان اۋداننىڭ ەلدى مەكەندەرىندە بولىپ, تۇرعىنداردىڭ حال-احۋالىمەن تانىستى. جولساپار المالى اۋىلدىق ەمحاناسىنان باستالىپ, اۆتوكەرۋەن اۋىل تۇرعىندارىنا دارىگەرلىك قىزمەت كورسەتىپ, وسى كەزەڭدە بەلەڭ الىپ تۇرعان تۇماۋدىڭ الدىن الۋعا پايدالى كەڭەستەر بەردى. اۆتوكەرۋەن قۇرامىنداعى حالىققا قىزمەت كورسەتەتىن مامانداردىڭ جۇرتشىلىق اراسىنا كەلۋى ەلدىڭ تىنىس-ءتىرشىلىگىن كوزبەن كورىپ, ايقىن سەزىنۋگە مۇمكىندىك تۋعىزدى. كىتاپحاناشىلار تاۋەلسىزدىك ۇلاعاتىن ارقاۋ ەتكەن كىتاپ كورمەلەرىن ۇيىمداستىرىپ, اۋداندىق مادەنيەت ءۇيىنىڭ قىزمەتكەرلەرى پاتريوتتىق تاقىرىپتا ءان-جىردان شاشۋ شاشتى.
نۇربول الدىباەۆ,
«ەگەمەن قازاقستان».
الماتى وبلىسى,
سارقان اۋدانى.