سەمەيلىك وقۋشى ۆيكتور حەگايدى ناعىز ونەرتاپقىش دەۋگە بولادى. فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 7-سىنىپ وقۋشىسى روبوت قۇراستىرىپ شىقتى. ونىڭ روبوتىنىڭ ەرەكشەلىگى سول, كوزى ناشار كورەتىن جانداردىڭ وزگەلەردىڭ كومەگىنسىز قوزعالۋىنا مۇمكىندىك بەرەدى.
ۆيكتورعا روبوت قۇراستىرۋ تۋرالى وي ءوزى وقىپ جۇرگەن مەكتەبىنە مۇمكىندىگى شەكتەۋلى بالالار كەلگەندە تۋىپتى. ول ءوزىن مازالاعان ويدى استانادان كەلگەن 9-سىنىپ وقۋشىسى كسەنيا ورەحوۆاعا جەتكىزەدى. مۇقتاج جاندارعا كومەك كورسەتۋ تۋرالى يدەيا كسەنياعا دا ۇنايدى. قارشاداي قىز روبوتقا ارنالعان باعدارلامانىڭ جازىلۋىنا كومەكتەسەدى.
– روبوت ءبىر lego-nxt بلوگىنان جانە ەكى ۋلترادىبىستى سەنسوردان تۇرادى. ءبىر جوعارعى سەنسورى, ءبىر تومەنگى سەنسورى بار. ال بلوكقا باعدارلاما ورناتىلعان. وسى باعدارلاما ارقىلى پارمەن بەرىلەدى. روبوت وتە جىلدام ىستەيدى. جوعارعى سەنسوردى قالپاققا نەمەسە كوزىلدىرىككە بەكىتىپ الۋعا, ءتومەنگى سەنسوردى اياققا نەمەسە تاياققا تاعۋعا بولادى. بۇل ورايدا جانارى ناشار كورەتىن بالالارعا ارنالعان ينتەرنات وقۋشىلارىنىڭ كەڭەسى ەسەپكە الىنعانىن ايتا كەتكىم كەلەدى. ەگەر ادامعا قولايلى بولسا, سەنسوردى قولعا ۇستاپ جۇرۋگە دە بولادى, – دەدى ۆيكتور حەگاي.
ونەرتاپقىش وقۋشىنىڭ تۇسىندىرۋىنشە, اتالعان قۇرال ءتۇنگى جارعاناتتىڭ كورۋ, سەزۋ ءمۇشەسى ىسپەتتى جۇمىس ىستەيدى. ياعني, سەنسورلار قىسقا مەرزىمدە الدىن الا كەلەتىن ۋلترادىبىستى جولدايدى. كەدەرگىنى دە سەزدىرەدى. وسىلايشا, سەنسوردىڭ شىعارعان دىبىسىمەن ادام اينالىپ نەمەسە قيسايىپ ءوتۋ كەرەكتىگىن تۇسىنەدى. سوندىقتان, جوعارعى جانە تومەنگى سەنسورلاردىڭ دىبىسى ەكى ءتۇرلى قويىلعان. ادام وسى ارقىلى كەدەرگىنىڭ تومەننەن نەمەسە جوعارىدان بولاتىندىعىن بىلە الادى.
اتالعان قوندىرعىنى جاساپ شىققاننان كەيىن بالالار وزدەرى دە قولدانىپ كورگەن ەكەن. بىرقاتار تەحنيكالىق كەمشىلىكتەرى دە بولعان. العاشقى سىنشىلارى قوندىرعى سەنسورىن اسا كوزگە تۇسپەيتىندەي, كىشىگىرىم ەتىپ جاساۋدى ۇسىنىپتى. قازىر اتالعان اپپارات جەتىلدىرىلۋ ۇستىندە. بۇل قۇرالدى جاساۋ ءۇشىن جىلعا جۋىق ۋاقىت كەتتى. ۆيكتور مەن كسەنياعا ينفورماتيكا ءپانىنىڭ مۇعالىمى زويا جۋربەنكو دا كومەكتەستى. كەلەشەكتە ۆيكتوردىڭ روبوتى كوز جانارى سولعىن تارتقان جانداردىڭ سۇرانىسىنا يە بولۋى ءابدەن مۇمكىن.
دۋمان اناش,
«ەگەمەن قازاقستان».
سەمەي.