جەر بەتىندەگى ەڭ بيىك قاراعاي –ەستونيادا
ەستونيانىڭ پىلۆاما جەرىندەگى ۆەريوراس ۋەزىندە الەمدەگى ەڭ بيىك قاراعاي ءوسىپ تۇر.
جاقىندا كەزدەيسوق بەلگىلى بولىپ قالعان بۇل داراقتىڭ بيىكتىگى 46,6 مەترگە بارادى. ال تىرشىلىك ەتىپ كەلە جاتقانىنا 214 جىل بولىپتى. مۇنىڭ بارىنە ەلدەگى ەڭ بيىك اعاشتاردىڭ جايىن زەرتتەپ جۇرگەن ەنتۋزياست حەندريك رەلۆەنىڭ حالىقارالىق بيىك اعاشتار بازاسىنا كەزەكتى سۋرەتتى سالعانى اسەر ەتىپتى.
فرانتسۋز قالاسىن تەڭىزدىڭ كوبىگى باسىپ قالدى
فرانتسۋزدىڭ برەتاني جاق جاعالاۋداعى پەنمارش اتتى قالاشىعى كوشەلەرىن تەڭىزدىڭ اپپاق قالىڭ كوبىگى ءبىر دەمدە باستى دا قالدى.
بۇعان ەۋروپانى جايلاپ بارا جاتقان «يمودجەن» داۋىلىنىڭ وسى تۇسقا كەلگەندە, قاتتى كوتەرىلىپ كەتكەنى سەبەپ بولىپتى. كوبىكتىڭ قۇرامىندا بالدىرلار, تەڭىز تۇزى جانە باسقا دا ءتۇرلى قالدىقتار بار. جۇرت ونىڭ يىسىنە ءبىر كۇننەن كەيىن عانا ۇيرەنە باستاعان.
نوۆوروسسيسكىدەگى ۇيلەنۋ تويىنا بۇن (نلو) دا «قاتىستى»
رەسەيدىڭ كراسنودار ولكەسىندەگى نوۆوروسسيسك قالاسىندا ءوتىپ جاتقان ۇيلەنۋ تويى كەزىندە جۇرتشىلىق جاقىن ماڭعا كەلىپ قونعان بەلگىسىز ۇشاتىن نىساندى كورىپ, دۇرلىگىپ كەتتى.
راس, توي بۇدان 10 جىل بۇرىن وتكەن ەكەن. بىراق سول كەزدە تۇسىرىلگەن بەينە تاسپانى ەندى عانا تاراتۋدىڭ ورايى كەلىپتى. وندا بەلگىسىز ءبىر ۇشاتىن اپپاراتتىڭ توي ءوتىپ جاتقان جەرگە كەلىپ قونعانى انىق بايقالادى. ال تويداعىلار سوندا قاراي بارۋعا باتا الماپتى. دەگەنمەن, زەرتتەۋشىلەر وسىنىڭ ءوزى باعالى ماتەريال بولىپ تابىلاتىنىن ايتىپ وتىر.
جۇمىرتقا تەكتەس, جينالمالى درون جاساپ شىعارىلدى
بەيجىڭنىڭ Powervision Robot كومپانياسى ىشىندە بەينەكامەراسى بار, جۇمىرتقا تەكتەس, جينامالى درون ويلاپ تاپتى.
قۇرىلعىنى جاساۋشىلار اتاپ ءوتكەندەي, ول ءوزىنىڭ كۆادروكوپتەرى سالماعىنىڭ بارىنشا ازدىعىنان جاقسى ۇشا الادى. ونىڭ 4K پىشىمىندەگى كامەراسى اينالمالى پانوراما بويىنشا تۇسىرۋگە قابىلەتتى. ول سونداي-اق, ناقتىلى بەلگىلەنگەن ۋاقىتقا قاراي ءتۇسىرۋ باعىتىن وزگەرتىپ, كونتەنتتى ترانسلياتسيا جاساي الادى. جاڭا اپپارات بيىلعى جىلدىڭ ەكىنشى جارتىسىندا ساۋداعا تۇسەدى.
فيزيكتەر گراۆيتاتسيالىق تولقىننىڭ بولاتىنىنا كوز جەتكىزدى
بۇدان بىرەر كۇن بۇرىن 100 جىلدان بەرى كۇتىپ كەلە جاتقان سەنساتسيالىق وقيعا تىركەلدى. فيزيكتەر تابيعاتتا گراۆيتاتسيالىق تولقىننىڭ بولاتىنىن اقىرى دالەلدەپ شىقتى.
بۇل بۇدان ءبىر عاسىر بۇرىن اتاقتى البەرت ەينشتەين بولجاپ كەتكەن عىلىمي جاڭالىق ەدى. ونىڭ كوزىنىڭ تىرىسىندە اشىپ بەرە الماي كەتكەن بۇل وقيعانىڭ كەزدەسەتىنىن فيزيكتەر قانشاما رەت دالەلدەۋگە تالپىنعانىمەن, وعان تىكەلەي ايعاقتار تاپپاي كەلگەن. امەريكالىق عالىمدار ايگىلى وقىمىستىنىڭ عارىشتاعى ەكى قارا تەسىكتىڭ سوقتىعىسۋى ناتيجەسىندە پايدا بولادى دەپ بولجاعان گراۆيتاتسيالىق تولقىنداردى اشتى.
مونرەالدا مەترو پويىزى رەزەڭكە دوڭعالاقتارعا كوشتى
كانادانىڭ مونرەال قالاسىنداعى مەترودا پويىزداردىڭ جاڭا مودەلدەرى جۇرە باستادى.
ونىڭ بۇرىنعىلاردان باستى ايىرماشىلىعى, دوڭعالاقتارى تۇگەلدەي رەزەڭكەلى بولىپ كەلەدى. سول سياقتى ۆاگوندار اراسىنداعى وتكەلەكتەر ادامداردىڭ سىيىمدىلىعىن تاعى 10 پايىزعا ارتتىرا تۇسەدى. ول وسى اۋماقتارعا قولايلى توپسا ورناتىپ, شالقايمالى ورىندىقتار قويىلۋدىڭ ەسەبىنەن جاسالعان. مۇنداي ۆاگونداردا شۋ دا ادەتتەگىدەن الدەقايدا از بولادى.
اقپارات اگەنتتىكتەرىنىڭ ماتەريالدارى نەگىزىندە دايىندالدى.