وتەۋسىز گرانت – 20 ملن. دوللار, ونى وڭىرلەردەگى جاستاردىڭ قىزمەتىنە بەرۋ جوسپارلانۋدا.
تاياۋدا قر ءبىلىم جانە عىلىم مينيسترلىگى «جاستار كورپۋسىن دامىتۋ جوباسى بويىنشا كەلىسىمدى راتيفيكاتسيالاۋ تۋرالى» قازاقستان رەسپۋبليكاسى زاڭىنىڭ جوباسىن قر پارلامەنتى سەناتىندا ۇسىندى.
گرانت تۋرالى كەلىسىم جاستاردى ىنتالاندىرۋعا, اسىرەسە تابىسى از, جۇمىسسىز, مۇگەدەك جاندار جانە وسال توپتاردان شىققان جاستاردى الەۋمەتتىك جوبالاردى ىسكە اسىرۋعا جانە تابىس تابۋعا مۇمكىندىك بەرۋ ماقساتىن كوزدەيدى.
كەلىسىم اياسىندا 18-29 جاس ارالىعىنداعى جاستارعا ۇسىنىلاتىن قوعامدىق پايدالى قىزمەتتى ىسكە اسىراتىن جوبالار قارجىلاندىرىلادى دەپ بولجامدالۋدا.
بۇل جاستاردىڭ بوس ۋاقىتىن دۇرىس ۇيىمداستىرۋعا, مۇگەدەك جاندارعا كومەك كورسەتۋگە, ءبىلىم بەرۋگە جانە ۇيرەتۋگە, جاستارعا كەڭەس بەرۋگە, جەرگىلىكتى جەردى اباتتاندىرۋعا, جانۋارلاردى قورعاۋعا جانە ت.ب. جۇمىستارعا ارنالعان جوبالار بولۋى مۇمكىن.
جالپى, گرانت بويىنشا 8,5 مىڭ جاستى قامتيتىن 1 700-دەن استام جوبانى قارجىلاندىرۋ (جاستاردىڭ باسىم بولىگى وتباسى از قامتىلعان, جۇمىسسىز جانە باسقا جاستاردىڭ وسال توپتارى), سونىمەن قاتار, 100 جاستار ۇيىمىن قامتۋ جوسپارلانۋدا.
وسى جوبانى ىسكە اسىرۋ ءۇشىن قاناتقاقتى وڭىرلەر رەتىندە الماتى, قاراعاندى, پاۆلودار جانە وڭتۇستىك قازاقستان وبلىستارى ايقىندالدى.
ءار جوباعا 4 مىڭ اقش دوللارى بولىنەدى, ول 6 اي بويى ىسكە اسىرىلادى. بۇدان باسقا, جوبالارعا قاتىسۋشىلار اي سايىن الەۋمەتتىك ستيپەنديا الادى (140-تان 325 اقش دولل. دەيىن).
جوباعا قاتىسۋعا نيەت بىلدىرگەن جاستاردىڭ (5 ادامعا دەيىن) توپتارى ءوز جوبالارىمەن اكىمدىكتىڭ جانىندا جۇمىس جاسايتىن جاستاردىڭ رەسۋرستىق ورتالىقتارىنا بارادى. ۇسىنىلعان جوبالاردى قر بعم قۇرعان قوعامدىق قايراتكەرلەردەن, ۇكىمەتتىك ەمەس ۇيىمداردىڭ جانە مەملەكەتتىك ورگانداردىڭ وكىلدەرىنەن تۇراتىن ارنايى كوميسسيا ىرىكتەيدى. جاستار كونكۋرسقا ىنتالى توپتاردىڭ قۇرامىندا جانە جاستار (قابىلداۋشى) ۇيىمدارى ارقىلى قاتىسا الادى.
كەلىسىم راتيفيكاتسيالانعاننان كەيىن, بارلىق ۇيىمداستىرۋ جۇمىستارىن جۇزەگە اسىراتىن ۇيلەستىرۋ اگەنتتىگىن تارتۋ ءۇشىن حالىقارالىق كونكۋرس جاريالانادى.
جوبانى ىسكە اسىرۋ مەرزىمى 2016-2017 جىلدار بولىپ بەلگىلەندى.
نازار قاسىم.