وسى اپتادا الەمدى دۇرلىكتىرگەن سولتۇستىك كورەيانىڭ بالليستيكالىق زىمىران ۇشىرۋى بولدى. جەكسەنبىگە قاراعان ءتۇنى بولعان بۇل وقيعا, دەمالىس كۇنى بولسا دا, بۇعان نازار اۋداراتىن تالاي ەلدىڭ باسشىلارىنىڭ دەگبىرىن قاشىرىپ, ۇيقىسىن بۇزدى. بارشا ەلدىڭ باسىن بىرىكتىرەتىن بۇۇ سياقتى باس ۇيىمنىڭ باسشىلارى دا قاۋىرت كەڭەس شاقىردى.
ءبىر بۇل ەمەس-اۋ, ءتىپتى الەمدەگى مىقتىلاردىڭ دا قاتارىنا قوسىلا قويمايتىن كورەيا حالىق-دەموكراتيالىق رەسپۋبليكاسى دەيتىن بۇل ەل بۇعان دەيىن دە جۇرتتى تالاي دۇرلىكتىرگەن. بىردە يادرولىق قارۋىم بار دەسە, بىردە سونى سىناقتان وتكىزگەنىن حابارلايدى. تاعى بىردە سونداي قارۋدى الىپ ۇشاتىن زىمىراندار جاساعانىن ايتادى. تاعى بىردە سونى سىناقتان وتكىزگەنىن ءمالىمدەيدى.
بولسا, بولسىن دا, مۇنداي قارۋى بار, ونى جەتكىزەتىن زىمىرانى بار ەل از با, دەۋگە دە بولار ەدى. راسىندا, يادرولىق دەرجاۆالار, سونداي قارۋى بار ەلدەر بىرەۋ-ەكەۋ ەمەس. ولارداعى سونداي قارۋلار دا ونداپ, جۇزدەپ ەمەس, مىڭداپ سانالادى. بۇلار جاسىرىن بولۋدان قالعان. بىراق سولاردا سونشا قارۋ بار ەكەن دەپ دۇرلىگىپ جاتقان دا ەشكىم جوق. ال سولتۇستىك كورەيادا ءبىر-ەكەۋى بار ەكەن, سىناقتان وتكىزىپتى دەگەندە, نەگە جۇرت دۇرلىگەدى, شۋلايدى؟
اڭگىمە سوندا. بۇل ەل بار ەكەنىن ايتىپ قانا قويمايدى, كىمدەرگە قارسى سول قارۋدى كەزەنەتىنىن دە, قاجەت بولسا, جۇمساپ تا جىبەرەتىنىن ايتادى. اناۋ-مىناۋ ەمەس, الىپ ەلدەرگە ازۋىن كورسەتەدى. سول ەلدەر بۇلار وزدەرىن باسىپ الادى, جويىپ-جىبەرەدى دەپ تە قورىقپايدى. ارتىن ويلاماي, بۇلاردىڭ ايتەۋىر ءبىر ءبۇلدىرىپ قالۋعا بارا بەرەتىنىنەن قورقادى. ولاردىڭ مۇنداي جوسىقسىز ارەكەتتەرگە باراتىنىنا جۇرتتىڭ كوزى جەتكەن. حالقىنىڭ ىشەرگە تاماعى جوقتىعىنا قاراماي, سول حالىقتىڭ اۋىزىنان جىرىپ الىپ, بۇل ەل قارۋلانۋعا ايتارلىقتاي قارجى جۇمسايتىنى الەمگە ايان. اشارشىلىقتان ءبىراز حالقىنىڭ قىرىلعانى دا جاسىرىن ەمەس. حالىقارالىق ۇيىمدار تالاي رەت بۇل ەلدىڭ حالقىنا ازىق-ت ۇلىك جيناپ بەرۋدى ۇيىمداستىرعانى دا بەلگىلى.
ءوز حالقىن ايامايتىن ميليتاريستىك حۋنتانىڭ باسقالاردى دا ايامايتىنى انىق. جەتەكشى ەلدەردىڭ, حالىقارالىق جەتەكشى ۇيىمداردىڭ دۇرلىگەتىنى دە سودان. بۇعان دەيىن دە بۇۇ قاۋىپسىزدىك كەڭەسى ءبىر ەمەس, تالاي رەت پحەنياندى ءشىدەرلەگەندەي شەشىم قابىلدادى. ارانداتۋشىلىق ارەكەتتەرگە باراتىن بولسا, ءتۇرلى ەكونوميكالىق سانكتسيا جولىمەن بۇدان دا قاتتىراق جازالايتىندارىن دا ەسكەرتكەن. پحەنيانداعىلار ەكىجۇزدىلىكپەن ونى مويىنداعانداي بولىپ, ارتىنشا ۋادەدەن تايىپ, جوسىقسىز ارەكەتتەرگە بارادى. بۇرىنعىسىن بىلاي قويعاندا, بيىلدىڭ وزىندە قاڭتاردىڭ باسىندا سۋتەگى بومباسىن سىناقتان وتكىزسە, ەندى مىنە بالليستيكالىق زىمىراندى ۇشىرىپ, تاعى دا الەمگە توپىراق شاشتى.
كحدر باسشىلىعىنىڭ ارەكەتىن الەم ايىپتاپ وتىر. بۇۇ قاۋىپسىزدىك كەڭەسىنىڭ توتەنشە وتىرىسىندا جۇرتتىڭ ءبارى ايىپتاپ سويلەدى. قاتاڭ شارالار قاجەت دەگەن ءسوز ايتىلدى. بۇعان دەيىنگى سانكتسيالاردان ناتيجە شىقپاعانى العا توسىلدى. سوندا نەندەي شارا قولدانىلماق؟ قيىن سۇراق. جاپونيا پارلامەنتى مەن اقش سەناتى پحەنياندى ايىپتاعان شەشىم قابىلدادى. اقش پەن وڭتۇستىك كورەيا بۇل ەلدىڭ شەكاراسىنا جاقىن جەرگە زىمىرانعا قارسى قورعانىس (زقق) جۇيەسىن ورنالاستىرماق. وعان قىتاي مەن رەسەي قارسى. پحەنياندى اۋىزدىقتايتىن باسقا جول بار ما؟
بۇگىنگە دەيىن حالىقارالىق قاۋىمداستىق تا, الەمنىڭ جەتەكشى ەلدەرى دە كحدر-دى رايىنان قايتارۋ ءۇشىن ەكونوميكالىق سانكتسيالارمەن شەكتەلىپ كەلدى. سونىڭ ءوزى سولتۇستىك كورەيا حالقىنا ايتارلىقتاي اۋىرتپالىق. باسقانى بىلاي قويىپ, سول سانكتسيالاردى قاتايتار بولسا, بۇل بۇرىننان تاۋقىمەت شەككەن حالىققا قيانات. سول قياناتتى جاساپ وتىرعان ەلدىڭ ءوز باسشىلارى ەكەنى دە داۋسىز.
ماماديار جاقىپ, جۋرناليست.