ءتۋابىتتى دەرتكە قارسى شىدامدىلىقپەن تۇرا ءبىلىپ, قايسار مىنەز تانىتقان قىزدىڭ جۇرەك سىرى.
مەن ءومىر ءۇشىن كۇندە كۇرەسىپ جۇرگەن جانداردىڭ ءبىرىمىن. ماڭدايىما تاعدىر جازعان تاۋقىمەت تاۋدان دا ۇلكەن, تاستان دا اۋىر. بىراق مەن ونى شامام كەلگەنشە كوتەرىپ, ءومىر دەگەن وزەنمەن العا قاراي جىلجىپ بارامىن. قانداي جاعالاۋعا بارىپ توقتارىمدى ءوزىم دە بىلمەيمىن.
...انام مەنى اۋىر بوسانعان ەكەن. ءالسىز, اۋرۋشاڭ بولعانىمدى ءجيى ايتىپ وتىراتىن. 1 جاستان اسقان كەزدە دارىگەرلەر سال اۋرۋىنا شالدىققان دەگەن دياگنوز قويعان. سودان بەرى مەنى انام ءبىر ساتكە دە كوزىنەن تاسا قىلعان ەمەس. ۇيىقتاسام, ۇستىمە جىلى كورپەمدى جاۋىپ, قاسىمدا وتىرادى. كوزىمدى اشسام, ايالى الاقانىمەن باسىمنان سيپاپ, شايىمدى دايىنداپ, ادەمى اڭگىمەلەرىمەن كوڭىلىمدى اۋلايدى. ءبىز جامبىل اۋدانىنىڭ تۋماسىمىز. وسىدان 15 جىلداي بۇرىن پەتروپاۆل قالاسىنا كوشىپ كەلگەنبىز. ول كەزدە مەن 12 جاستا بولاتىنمىن. اۋىل مەكتەبىنەن كەيىن وبلىس ورتالىعىنداعى ءشامىل شاقشاقباەۆ اتىنداعى مەكتەپ-ينتەرناتتا وقىدىم. 1 جىلداي ۇيدە وتىردىم. ەشقايدا بارعىم دا, ەشكىممەن سويلەسكىم دە كەلمەدى. ءتورت قابىرعاعا تەلمىرىپ, جالعىزدىقتىڭ شىرماۋىنا بايلاپ-ماتالىپ, اۋىر كۇي كەشتىم. اقىرى مۇنداي تاۋقىمەتكە شىداي المايتىنىمدى ءتۇسىنىپ, اناممەن اشىق سىرلاستىم. بالا كەزىمنەن اۋدارماشى بولۋ ارمانىم ەدى. مەكتەپ قابىرعاسىندا جۇرگەندە اعىلشىن, نەمىس تىلدەرىنە ەرەكشە دەن قويعانىمدى بىلەتىن انام مەنى بىردەن قولدادى. كەي تۋعان-تۋىستارىمنىڭ قارسىلىعىنا قاراماستان ماناش قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنە وقۋعا ءتۇستىم. سىرتتاي بولىمدە وقىپ ءجۇرىپ, كۇيبىڭ تىرلىكتىڭ ءبىراز قيىندىعىن باستان وتكەردىم. انام ۇنەمى قاسىمدا ءجۇردى. اۆتوبۋسقا مىنگىزىپ, ءتۇسىرىپ, كىتاپتارىمدى ۇستاپ, ايتەۋىر, قولىنان كەلگەن كومەگىن ايامادى. بىرگە وقىعان كۋرستاس قۇربىلارىممەن ءتىل تابىسىپ كەتتىم. مەملەكەتتىڭ قولداۋى ارقاسىندا 2008 جىلى اقش-تىڭ ينديانا شتاتىنا 2 ايعا ءتىل ۇيرەنۋگە باردىم. پەتروپاۆل قالاسىنان جالعىز ءوزىم, ال قازاقستاننان 4 ادام بولدىق. شەتەلگە تۇڭعىش شىققان ساپارىمدا كەمتار جانداردىڭ ەشكىمنەن كەم ەمەس ەكەندىگىنە, ولاردىڭ دا ەڭبەك ەتىپ, ءبىلىم الىپ, باسقالار سياقتى قوعامدىق جۇمىستارعا قاتىسا الاتىندارىنا كوزىم جەتتى. قازاقستانداي ەلدە تۇراتىنىمدى زور باقىت سانادىم. بۇعان دەيىن “مەنىڭ تاعدىرىم نەگە وسىنداي بولدى؟” دەگەن سۇراق جانىمدى جەگىدەي جەيتىن. سول جولى كولىك اپاتىنا ۇشىراپ, جۇرە الماي قالعان جىگىتتىڭ اڭگىمەسىن تىڭداپ, قولارباعا بايلانسا دا, جۇمىسقا بەلسەنە ارالاساتىنىن كورىپ, جىگەرىمە جىگەر قوسىلدى. ونىڭ وقۋعا, وزگەگە كومەكتەسۋگە دەگەن قۇلشىنىسى مەنىڭ ومىرگە دەگەن كوزقاراسىمدى تۇبەگەيلى وزگەرتتى. وزگەنىڭ تاعدىرى ارقىلى ءومىردى باعالاي ءبىلۋ قاسيەتىن ۇقتىم.
بىرقاتار اۆتوبۋستاردىڭ جۇرگىزۋشىلەرى مەنى ابدەن تانىپ العان. ايالدامادا كورسە بولدى, توقتاپ, ىشكە كىرگىزىپ, وتىرعىزىپ, تۇسۋىمە كومەكتەسەدى. كىتاپحانا, باسقا دا قوعامدىق جەرلەردە قول ۇشىن بەرۋگە دايار تۇراتىن ادامدار از ەمەس. سونداي ساتتەردە جۇرەگىڭە جىلىلىق ۇيالاپ, ەرەكشە مەيىرىمگە ءبولەنەسىڭ. كەيبىر كەزدەردە كوشەدەن وتكەندە سىرتىڭنان مۇسىركەي قاراپ, ءوزىنەن-ءوزى ۇرەيلەنىپ كەتىپ بارا جاتقان ادامداردى دا كەزدەستىرەمىن. ولاردىڭ مۇگەدەكتەردى وزدەرىنەن كەم سانايتىندارىن تۇسىنبەيمىن. مۇندايلار ەلباسىنىڭ «قازاقستان جولى–2050: ءبىر ماقسات, ءبىر مۇددە, ءبىر بولاشاق» جولداۋىندا ايتىلعان «...ولار تەك جاردەماقى الىپ قانا قويمايدى, سونىمەن بىرگە, وزدەرىن قوعامنىڭ مۇشەسى, پايدالى ەڭبەككەر رەتىندە سەزىنەتىن بولادى», دەگەن پاراسات-پايىمعا تولى قامقورلىق سوزدەرىن وي ەلەگىنەن وتكىزسە, جوعارىداعىداي كەمسىتۋشىلىككە بارماس ەدى.
بالا كەزىمنەن اۋدارماشى بولۋدى ارماندادىم دەدىم عوي. اعىلشىن, نەمىس ءتىلىن مەڭگەرىپ, قولىما ديپلوم الىپ, بيىك بەلەستى باعىندىردىم. قازىر سۋرەت سالۋمەن اينالىسامىن. شاحمات ويناپ, يوگا, گيمناستيكامەن شۇعىلدانامىن. ءوزىمدى كۇتىپ, قاجەتتى ەم-دوم الىپ, قوعامدىق جۇمىستارعا دا ارالاسامىن. استانا, الماتىعا بارىپ, مۇمكىندىگى شەكتەۋلى ادامداردىڭ ماسەلەسىن شەشۋگە باعىتتالعان ءتۇرلى شارالارعا قاتىسىپ تۇرامىن. كەدەرگىسىز ءجۇرىپ-تۇرۋدىڭ قيىندىعىن بار بولمىسىمەن تۇسىنەتىن, سەزىنەتىن اقجان, ءسالىمحان سياقتى «اردوس-جۇرەك» مۇگەدەكتەر بىرلەستىگىنىڭ مۇشەلەرىمەن تىعىز قارىم-قاتىناستا جۇمىس ىستەيمىز.
الدا كۇيبىڭ تىرلىكتىڭ قىزىعى مەن قيىندىعىنا تولى تالاي بەلەستەر تۇر. ولاردى باعىندىرۋ ءۇشىن بار كۇش-جىگەرىمدى جيناپ, كۇرەسۋگە ەرىك-جىگەرىم دە, كۇش-قۋاتىم دا جەتەدى. مۇمكىندىگى شەكتەۋلى جانداردىڭ قوعامداعى بەلسەندىلىگىنە كۇدىكپەن قارايتىن قاتە ويلاردى كوك مۇزداي بۇزىپ-جارۋ ءۇشىن قولىمنان كەلگەنشە ايانبايمىن. ويتكەنى, مەن ومىرگە عاشىقپىن, دەيدى الما قوجاباەۆا.
جازىپ العان
الما ءجۇسىپوۆا.
سولتۇستىك قازاقستان وبلىسى.
––––––––––––––
سۋرەتتى تۇسىرگەن
تالعات تانىباەۆ.