مەملەكەت باسشىسى ن.ءا.نازارباەۆ «نۇرلى جول – بولاشاققا باستار جول» اتتى حالىققا جولداۋىندا ۇلتتىق قوردان 2015-2017 جىلدارعا دەيىنگى كەزەڭگە جىل سايىن قوسىمشا 3 ميلليارد دوللارعا دەيىن ءبولۋ جونىندە شەشىم قابىلداعان بولاتىن. سونداي-اق, بۇل جۇمىستارعا بەلسەنە ارالاسىپ, بارلىق دەڭگەيلەردە قاتاڭ پارتيالىق باقىلاۋ ورناتۋدى «نۇر وتان» پارتياسىنا تاپسىرعان ەدى.
ەلباسى جۇكتەگەن مىندەتتەردى جۇزەگە اسىرۋ ماقساتىندا ماڭعىستاۋ وبلىسىندا الەۋمەتتىك نىساندار سالۋ ءۇشىن ۇلتتىق قوردان ۇلكەن كولەمدە قارجى قۇيىلدى. وسى ورايدا, ماڭعىستاۋ وبلىستىق ماسليحاتىنداعى «نۇر وتان» پارتياسىنىڭ دەپۋتاتتىق فراكتسياسى جانىنداعى مەملەكەتتىك بيۋدجەت قاراجاتى مەن ۇلتتىق قوردان بولىنگەن قارجىلاردىڭ ماقساتتى جانە ءتيىمدى پايدالانىلۋىن باقىلاۋ كوميسسياسى اقتاۋ قالاسىندا سالىنعان نىساندارعا تەكسەرۋ جۇرگىزۋ جۇمىستارىن باستادى.
كوميسسيا مۇشەلەرى الدىمەن اقتاۋداعى «جاڭا شاعىن اۋدانداردىڭ كارىزدىك تاراتۋ جۇيەسىنىڭ قۇرىلىسى» جوباسىمەن تانىستى. بۇل, اتاۋى ايتىپ تۇرعانداي-اق, قاناتىن كەڭگە جايىپ كەلە جاتقان اقتاۋ قالاسىنىڭ جاڭادان سالىنعان جانە سالىناتىن ونداعان شاعىن اۋداندارىنا قاجەتتى ينفراقۇرىلىمدىق قىزمەتكە ورايلاستىرىلعان جوبا. قۇنى 1 101 978,0 مىڭ تەڭگە تۇراتىن بۇل جوبا ءۇشىن 2015 جىلى ەلىمىزدىڭ ۇلتتىق قورىنان ماقساتتى ترانسفەرت ەسەبىنەن 1 067 391,0 مىڭ تەڭگە بولىنگەن. قازىرگى تاڭدا كارىزدىك قۇبىرلار تارتاتىن جىرالار قازىلىپ, جۇمىس قالىپتى جۇرۋدە.
«نۇرلى جول» باعدارلاماسى بويىنشا سالىنعان جاڭا 32 «ا» شاعىن اۋدانىنداعى 120 پاتەرلىك تۇرعىن ءۇيدىڭ سالىنۋى مەن پايدالانۋعا بەرىلۋى تۋرالى كوميسسيا مۇشەلەرىنە اقتاۋ قالاسى اكىمىنىڭ ورىنباسارى ءو.بيساقاەۆ باياندادى. «قولجەتىمدى تۇرعىن ءۇي-2020» باعدارلاماسى اياسىندا سالىنعان جايلىلىعى جونىنەن 3 سىنىپتى ۇيلەردىڭ قۇرىلىسى اياقتالىپ, ءوز يەلەرىن كۇتىپ تۇر. قۇنى 1 322 625,0 مىڭ تەڭگەنى قۇراعان باسپانا قۇرىلىسى كەزەكتە تۇرعان ازاماتتارعا بەرىلمەك.
– قۇرىلىس نىساندارىن ارالاۋعا قۇرىلعان كوميسسيا قۇرامىندا «نۇر وتان» فراكتسياسىنان ءۇش دەپۋتات جانە ارنايى ماماندار بار. ءبىز وسى تەكسەرۋ جۇمىستارىنا قاتىستى ارنايى كەستە تۇزگەن بولاتىنبىز, وسى كەستە بويىنشا مەزگىلىندە تەكسەرۋگە شىعىپ تۇرامىز. قايسى قۇرىلىس نىسانىندا قارجى جەتىسپەۋشىلىگى بار, كوزگە كورىنىپ تۇرعان قانداي كەمشىلىكتەر بار – وسىنىڭ ءبارىن ءبىز قاداعالاپ, دەر كەزىندە شەشىم الىپ, جولعا قويۋعا جۇمىس جاساپ كەلەمىز, دەيدى «نۇرلى جول» باعدارلاماسىنىڭ جۇزەگە اسۋىن قاداعالاۋ بويىنشا «نۇر وتان» پارتياسى جانىنان قۇرىلعان كوميسسيانىڭ مۇشەسى, ماڭعىستاۋ وبلىستىق ءماسليحاتىنىڭ دەپۋتاتى, «قالامقاسمۇنايگاز» ءوب باسشىسى نۇرپەيىس سارسەنباي.
دەپۋتاتتاردىڭ تەكسەرۋ جۇمىستارى جالعاسىن تابا بەرمەك.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.