سارسەنبى كۇنى ءوتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى ءدال قازىرگى سىندارلى شاقتاعى ەل الدىندا تۇرعان ماڭىزدى مىندەتتەردى سارالاپ بەردى. اسىرەسە, ەلباسى 2016-2018 جىلدارعا ارنالعان داعدارىسقا قارسى ءىس-قيمىل جوسپارى اياسىنداعى باسىم باعىتتاعى ءمىندەتتەردىڭ ءبىرى – قارجى تۇراقتىلىعىن قامتاماسىز ەتۋگە باسا كوڭىل ءبولدى.
ءدال قازىرگى قارجى داعدارىسى كەزىندە ۇلتتىق بانك ۇستانعان ساياساتتىڭ ەلدەگى جاعدايدى قاداعالاپ وتىرۋعا, جەدەل شەشىمدەر قابىلداپ, ءىس-ارەكەت ەتۋگە تيگىزەر ىقپالى زور. بۇگىنگى كۇننىڭ شىندىعىنا كوز جۇگىرتەر بولساق, جۋان جىڭىشكەرىپ, جىڭىشكە ۇزىلگەلى تۇر. وسى ارادا جەدەل قيمىلداماساق – وپىق جەيتىنىمىز انىق. سوندىقتان دا, مەملەكەت باسشىسىنىڭ سىر بەرە باستاعان سالالارعا قوسىمشا قاراجات ءبولۋ جونىندە دەر كەزىندە وڭ شەشىم قابىلدادى دەپ سانايمىن.
جالپى, قازىرگى تىعىرىقتان الىپ شىعار جولدى نۇسقايتىن «نۇرلى جول» جانە يندۋستريالاندىرۋ جونىندەگى مەملەكەتتىك باعدارلامالارعا ارقا سۇيەگەن ابزال. ال ەندى, مۇناي باعاسى ارزانداپ, شيكىزاتقا دەگەن سۇرانىس تومەندەگەن كەزدە الدىڭعى قاتارعا اگروونەركاسىپتىك كەشەنى شىعىپ, ۇكىمەتتىڭ وعان دەگەن قولداۋى بۇرىنعىدان دا ارتا تۇسكەنى ءجون.
البەتتە, جالعىز عانا اۋىل شارۋاشىلىعىمەن ۇشپاققا شىقپاسىمىز بەلگىلى. بۇل رەتتە شاعىن جانە ورتا بيزنەستى قولداۋ, ەكونوميكانى ءارتاراپتاندىرۋ ءىسى دە ءوزىنىڭ ماڭىزدىلىعىن جوعالتپايدى.
ەلدىڭ دامۋ كورسەتكىشىنىڭ ءبىرى – تۇرعىن ءۇي قۇرىلىسىنىڭ بارىسى ەكەندىگى ءسوزسىز. بۇل سالانىڭ وركەن جايۋى ءۇشىن «نۇرلى جول» باعدارلاماسى بويىنشا 360 ملرد. تەڭگە ءبولۋ جونىندە تاپسىرما بەرىلدى. «بۇل جۇمىستاردىڭ جاۋاپكەرشىلىگى وسى قىزمەت جۇرگىزىلەتىن ءوڭىردىڭ اكىمدەرىنە تىكەلەي جۇكتەلەدى. باسپانا قۇنى الەۋمەتتىك سيپاتتا بولۋعا ءتيىس ەكەندىگىنە ايرىقشا نازار اۋدارعىم كەلەدى», دەگەن ەلباسى ءسوزى باسپاناعا زار بولىپ جۇرگەن الەۋمەتتىڭ جۇرەگىنە ءۇمىت وتىن جاقتى.
مەملەكەت باسشىسى ەلىمىزدەگى جۇمىسپەن قامتۋ سىندى وزەكتى ماسەلەگە دە ەرەكشە توقتالدى. راس, بۇگىنگى حالىققا كەرەگى تۇراقتى جۇمىس, ۋاقتىلى ەڭبەكاقى. تۇرمىس تۇراقتىلىعىنىڭ كەپىلى دە وسىلار. قۋانارلىعى سول, ءبىزدىڭ ەلىمىزدە وسى باعىتتا كوپتەگەن جۇمىستار اتقارىلىپ جاتىر. قيىنشىلىقتىڭ ءورشي تۇسكەنىنە قاراماستان بىزدەگى جۇمىس ورىندارىنىڭ ساقتالىپ, ءتىپتى جاڭا جۇمىس ورىندارىنىڭ پايدا بولىپ جاتقانى وسى سوزىمىزگە دالەل. داعدارىستىڭ زامانى ەلباسىنىڭ كەزىندە ۇلتتىق قوردى قۇرىپ, ەلدىڭ بولاشاعىنا تونەر قاۋىپتەرگە ەرتەدەن قام جاساعان كورەگەندىگىن راستاپ وتىر. ۇلتتىق قوردان دەر كەزىندە دەمەۋدىڭ بولعاندىعى, زەينەتاقى جۇيەسىن جانە جالپى ەكونوميكانى رەفورمالاۋ, ودان كەيىن تەڭگەنىڭ ەركىن باعامىنا كوشۋ سىندى شارۋالاردىڭ جەمىسى ەل تىرلىگى مەن تىنىشتىعىنىڭ شايقالماۋىنا يگى اسەرىن تيگىزگەنى داۋسىز.
ءيا, تۇرمىس تۇراقتى بولۋى ءۇشىن بىزگە ەكونوميكالىق ارەكەتتەرمەن بىرگە سابىر, بىرلىك جانە ءبىلىم اۋاداي قاجەت.
جۇماعالي ماعزيەۆ,
قاراعاندى قىزمەت كورسەتۋ جانە تەحنولوگيا كوللەدجىنىڭ ديرەكتورى.
قاراعاندى.