قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىنىڭ «جايىق پرەسس» جشس-ىندە قۇرىلعان فيليالىندا باتىس قازاقستان وبلىستىق سايلاۋ كوميسسياسىنىڭ توراعاسى عايسا قاپاقوۆ بريفينگ وتكىزدى. مۇندا ول جەرگىلىكتى جانە رەسپۋبليكالىق باق وكىلدەرىنە بارلىق دەڭگەيدەگى ءماسليحاتتار دەپۋتاتتارىن سايلاۋدى ۇيىمداستىرۋ مەن وتكىزۋگە قاتىستى تومەندەگىدەي جايتتەردى بايانداپ بەردى.
قازىرگى كۇنگە دەيىن وڭىردەگى بارلىق سايلاۋ ۋچاسكەلەرىنىڭ ورنى بەلگىلەنىپ, ونىڭ ءىشىن ءتيىستى تالاپتارعا سايكەس جاراقتاندىرۋ جۇمىستارى باستالدى. سايلاۋ بيۋللەتەندەرى ازىرلەنىپ, سايلاۋ تۋرالى جارنامالار مەن كۇنتىزبەلەردى ءىلۋ جۇمىستارى جۇرگىزىلۋدە. مۇنىڭ ىشىندە 44 بيلبورد پەن 734 كۇنتىزبەنىڭ شەبەرلەردىڭ قولىنان ءوتىپ ۇلگەرگەنى بۇل ءىستىڭ بارىسى ويداعىداي ەكەنىن ايقىن ايعاقتايدى.
پارلامەنت ءماجىلىسى مەن بارلىق دەڭگەيدەگى ءماسليحاتتار سايلاۋلارىن قانداي دا ءبىر بولماسىن ادىستەمەلىك ماتەريالداردىڭ كومەگىنسىز وتكىزۋ ەش مۇمكىن ەمەس. بۇعان نورماتيۆتىك قۇجاتتار دا ءازىر. ونىڭ ون بەسكە تاياۋ ءتۇرى دايىن, دەدى بريفينگ بەرۋشى. سونداي-اق, سايلاۋ كەزىندەگى ۇلكەن جاۋاپكەرشىلىك اۋداندىق, قالالىق جانە وبلىستىق دەڭگەيدەگى ۋچاسكەلىك جانە وكرۋگتىك سايلاۋ كوميسسيالارىنىڭ توراعالارىنا جۇكتەلەتىنى بەلگىلى. ەگەر ولار سايلاۋ وتكىزۋدىڭ ءجاي-كۇيىن تەرەڭ زەردەلەي الماسا, ونىڭ ناتيجەلى اياقتالۋى ەكىتالاي. سوندىقتان دا, وبلىستىق سايلاۋ كوميسسياسى ولار ءۇشىن ارنايى سەمينارلار ۇيىمداستىرىپ, وتكىزدى. ءارى ارقايسىسىنىڭ بىلىكتىلىگى مەن ءىس-شارالاردى ۇيىمداستىرۋعا بەيىمدىلىگىن سىنعا سالدى.
قازاقستان رەسپۋبليكاسىنىڭ ورتالىق سايلاۋ كوميسسياسى بارلىق دەڭگەيدەگى ءماسليحاتتار سايلاۋىنا قاتىساتىن ۇمىتكەرلەرگە بولىنەتىن قاراجاتتىڭ كولەمىن بەكىتكەنى بەلگىلى. سوعان سايكەس, وڭىردە ۇمىتكەرلەرگە سايلاۋ جارناماسىن ەنگىزۋگە ارنالعان ەسەپشوتتار اشىلدى. وبلىس بويىنشا اقپان ايىنىڭ 12-سىنە دەيىن اۋداندىق, قالالىق جانە وبلىستىق ءماسليحاتتاردىڭ دەپۋتاتتارىنا 373 ۇمىتكەر ۇسىنىلدى. ونىڭ 80-ءى تىركەۋدەن وتكىزىلدى.
قازىرگى قولدا بار اقپاراتتار ءۇمىتكەرلەردىڭ 30 پايىزى ايەلدەر ەكەنىن كورسەتەدى. ولاردىڭ اراسىندا ايماقتاعى 8 ەتنوستىڭ وكىلدەرى بار. ءماسليحاتتار سايلاۋىنا مۇعالىم, مەحانيزاتور, شارۋا قوجالىعىنىڭ جەتەكشىسى, ەتىكشى, دارىگەر, مادەنيەت قىزمەتكەرى سەكىلدى سان ءتۇرلى ماماندىق يەلەرى قامتىلعان, دەپ ءتۇيىن جاسادى بريفينگتە باتىس قازاقستان وبلىستىق سايلاۋ كوميسسياسىنىڭ توراعاسى عايسا قاپاقوۆ.
تەمىر قۇسايىن,
«ەگەمەن قازاقستان».
باتىس قازاقستان وبلىسى.