مەملەكەتتىك بيۋدجەتتىڭ ءار تيىنىنىڭ سۇراۋى بولار ۋاقىت كەلدى. كەڭقولتىقتاۋ زاماندا مەملەكەتتەن بولىنگەن قىرۋار قاراجاتقا ءتۇرلى الەۋمەتتىك نىساندار سالعان مەردىگەرلەر ساپاسىنا جەتكىلىكتى ءمان بەرمەي, باۋى مەن شۋىنا ورالىپ جۇرەتىن.
كۇنى كەشە پايدالانۋعا بەرىلگەن عيماراتتىڭ شاتىرى جەل ءبىر ۇيىتقىپ سوققاندا تۇتاسىمەن قارعاداي قالبالاقتاپ جەرگە ۇشىپ تۇسكەن. مەكتەپ سالعان مەردىگەر تاپسىرىس بەرگەن پارتا كىشكەنتاي بولىپ, ەرەسەك وقۋشىلار كەپتەلىپ وتىراتىن وقيعالار دا كەزدەسكەن.
ەندى ونداي كەلەڭسىزدىككە جول جوق. «نۇر وتان» پارتياسى قازاقستان رەسپۋبليكاسىنىڭ ۇلتتىق قورى مەن بيۋدجەتتەن بولىنگەن قاراجاتتىڭ ماقساتتى ءارى ءتيىمدى جۇمسالۋىنا مونيتورينگ جاساپ, باقىلاۋ ءىسىن قولعا الدى.
بىلتىر «نۇرلى جول» باعدارلاماسى اياسىندا وڭتۇستىك قازاقستان وبلىسىندا 24 نىساننىڭ قۇرىلىسىنا 7 439,9 ملن.تەڭگە قارجى بولىنگەن. 2015 جىلعى 31 جەلتوقسانداعى مالىمەت بويىنشا, وڭىردەگى 11 نىساندا قۇرىلىس جۇمىستارى اياقتالىپ, 7 409,6 ملن.تەڭگە نەمەسە قارالعان قاراجاتتىڭ 99,6 پايىزى يگەرىلىپتى. ال قالعان نىسانداردىڭ قۇرىلىس جۇمىستارى 2016 جىلعا وتكەن.
تۇركىستان قالاسىندا 280 ورىنعا ەسەپتەلگەن بالاباقشا قۇرىلىسىنا 395,8 ملن. تەڭگە قارالىپ, نىساندى بيىلعى ماۋسىم ايىندا ەل يگىلىگىنە تاپسىرۋ جوسپارلانعان. كەشە تۇركىستان قالاسىنداعى پارتيا فيليالى جانىنداعى ينفراقۇرىلىمداردى دامىتۋ كوميسسياسىنىڭ توراعاسى بايماحان سۇلەيمەنوۆ بۇقارالىق اقپارات قۇرالدارى وكىلدەرىنىڭ قاتىسۋىمەن اتالعان نىساننىڭ قۇرىلىس بارىسى جانە جۇمىسىمەن تانىسۋ ءۇشىن ارنايى رەيد ۇيىمداستىردى.
وتكەن جىلى بالاباقشاعا بيۋدجەتتەن 250 ملن. تەڭگە ءبولىنىپ, مەردىگەر «بەك» سەرىكتەستىگى بەكىتىلگەن كەستە بويىنشا جۇمىستى تياناقتى ورىنداپتى. «بەك» جشس-ءنىڭ ۋچاسكە باسشىسى مۇرات ورىنبەتوۆ: «بالاباقشا قۇرىلىسىن وتكەن جىلدىڭ ماۋسىم ايىندا باستادىق. قارجىلاندىرۋ ۋاقتىلى بولعاندىقتان, ءبىز وتكەن جىلعا جوسپارلانعان جۇمىستى بەكىتىلگەن مەرزىمدە بىتىردىك. «نۇر وتان» پارتياسىنىڭ كوميسسيا مۇشەلەرى ءبىز اتقارعان جۇمىستىڭ ساپاسىن باقىلاۋدا. نىسانداعى جۇمىستاردى وسى جىلدىڭ مامىر-ماۋسىم ايلارىندا تولىققاندى اياقتايمىز دەگەن ويدامىز», – دەدى.
وسىندايدا ەسكە تۇسەدى. 2000 جىلداردىڭ باسىندا تۇركىستاننىڭ «دوستىق» اۋىلىنا قونىستانعان اعايىنداردىڭ ارىزىمەن ساپاسىز سالىنعان مەكتەپ عيماراتىن كورۋگە كەلگەنبىز. ەدەنى كەپپەگەن تاقتايمەن جابىلعان. استىنان ىزا وتكەن سوڭ, سۋ تاقتاي بورداي ۇگىلەدى. سالماعى اۋىرلاۋ ءبىر مۇعالىمى ورىندىققا سىلق وتىرعاندا ءتورت تەمىر اياعى ەدەندى تەسىپ كەتىپ, ۇيەلەپ قالعان عوي. شىرىگەن تاقتايدان ەدەندى ۇستاپ تۇرۋ ءۇشىن ءار جەردەن كىرپىش تىرەۋ قويىلعانىن ءوزىمىز دە كوردىك. بۇگىندە ونداي ساپاسىز قۇرىلىستار كەلمەسكە كەتتى.
ايتقانداي, 280 ورىندىق بالاباقشانى سالۋعا جۇمسالعان قۇرىلىس ماتەريالدارىنىڭ 90 پايىزى وتاندىق بولسا, سونىڭ 40 پايىزى تۇركىستان كاسىپكەرلەرىنىڭ ۇلەسىنە ءتيدى. تۇركىستاندا ەلىمىز تاۋەلسىزدىك العالى 22 جاڭا مەكتەپ, 10-نان استام مەديتسينا نىساندارى سالىنعان. بۇعان قوسىمشا ايتارىمىز, تۇركىستان قالاسى ەجەلگى وركەنيەت ورتالىعى رەتىندە يۋنەسكو-نىڭ بۇكىلالەمگە تانىمال مادەني-تاريحي كەشەندەر مەن ەسكەرتكىشتەر تىزىمىنە كىرسە, احمەت ياساۋي كەسەنەسى جىبەك جولىن جاڭعىرتۋ باعدارلاماسىنا ەنگەن.
ماعجان اقىن «تۇركىستان – ەر تۇرىكتىڭ بەسىگى عوي», دەپ جىرلاعان كيەلى قالادا وسىنداي ىرگەلى باستامالار قولعا الىنىپ جاتىر.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.