استانا. 10 اقپان. سەربيا استاناسى – بەلگراد قالاسىندا ءوتىپ جاتقان فۋتزالدان ەۋروپا چەمپيوناتىندا قازاقستان قۇراماسى جارتىلاي فينالعا جولداما الدى. شيرەك فينالدا قازىرگى قۇرلىق چەمپيونى – يتاليامەن كەزدەسكەن جەرلەستەرىمىز 5:2 ەسەبىمەن باسىم ءتۇسىپ, كەزەكتى رەت سەنساتسيالىق ناتيجەگە قول جەتكىزدى. بۇل تۋرالى egemen.kz ءتىلشىسى حابارلادى.
كەزدەسۋدىڭ العاشقى مينۋتتارىنان باستاپ باسىمدىقتى ءوز قولدارىنا العان قازاقستاندىقتار جۇيەلى ويىن ورنەگىمەن قارسىلاستارىن ابدەن ساستىردى. الايدا, العاشقى گول 16-مينۋتتا سوعىلدى. بۇرىشتان دوپتى ويىنعا قوسقان كوماندا كاپيتانى دىنمۇحامبەت سۇلەيمەنوۆ كوماندالاس ارىپتەسى لەوعا سوققى جاسايتىن تاماشا مۇمكىندىك جاساپ بەردى. ناتيجەسىندە سوڭعىسىنىڭ شىرەنە تەپكەن دوبى يتاليا قاقپاسىنان تابىلدى.
ءبىرىنشى تايمنىڭ سوڭىندا كاكاۋدىڭ شاكىرتتەرى ەسەپتى ەسەلەدى. بۇل جولى دا گول لەونىڭ قاتىسۋىمەن سوعىلدى. اتاپ ايتقاندا, ونىڭ ايىپ الاڭىنىڭ سىرتىنان تەپكەن دوبى قاقپا باعاناسىنان كەيىن سەرپىلگەن بولاتىن. قاقپاشىنىڭ دوپتى قايتارا الماي, قاربالاسقا تۇسكەن ءساتىن ءتيىمدى پايدالانعان قۇرامانىڭ سۇرمەرگەنى سەرىك جامانقۇلوۆ چەمپيونات بارىسىنداعى ءتورتىنشى گولىن سوقتى. قازىرگى كەزدە بۇل قازاق فۋتبولشىسىنىڭ ءتۋرنيردىڭ مەرگەندەر كوشىندە الدىڭعى قاتاردا تۇرعانىن ماقتانىشپەن اتاپ وتكەن ءجون.
ەكىنشى تايم يتاليانىڭ شابۋىلىمەن باستالدى. ناتيجەسىندە 23-مينۋتتا فورتينو مەرگەندىگىمەن كوزگە ءتۇسىپ, ەسەپ ايىرماسىن قىسقارتتى. ارادا بار بولعانى 30 سەكۋند وتكەندە, قازاقستان ساپىنان شىڭعىس ەسەنامانوۆ تاماشا گولدىڭ اۆتورى اتانىپ, ەسەپتى 3:1-گە جەتكىزدى. شىڭعىستىڭ الاڭنىڭ ورتا تۇسىنان تەپكەن دوبىنا يتاليا قاقپاشىسى ەش قايران كورسەتە المادى.
قاقپالارىنا ءۇشىنشى دوپ جىبەرىپ العان يتالياندىقتار تايلى-تۇياعىمەن العا ۇمتىلدى. الايدا, ولاردىڭ ويىندارىنا ساتتىلىك جەتىسپەي, تەپكەن دوپتارى بىردە قاقپا ماڭدايشاسىنان كەيىن سەرپىلسە, ەندى بىردە باعاناعا ءتيىپ, باعىتىن وزگەرتىپ جاتتى. ال كەيبىر ساتتە قازاقستان قۇراماسىنىڭ جارتى كومانداسى سانالىپ جۇرگەن قاقپاشى يگيتا يتاليالىقتاردىڭ جويقىن شابۋىلدارىنا لايىقتى تويتارىس بەرىپ وتىردى.
كەزدەسۋدىڭ 35-مينۋتىندا وزدەرىنىڭ جەڭىلىپ جاتقاندارىنا سەنە الماعان يتاليانىڭ باس جاتتىقتىرۋشىسى روبەرتو مەنيچەللي تايم-اۋت الۋعا ءماجبۇر بولدى. شاكىرتتەرىنەن اقىل-كەڭەسىن اياماعان ول قاقپاشىنى دا ويىنشى رەتىندە الاڭعا شىعاردى. وسى تاكتيكا ءوز جەمىسىن بەرىپ, يتاليا فۋتبولشىلارى 37-مينۋتتا تاعى ءبىر گول سوقتى. بۇل جولى ناتيجەلى سوققى كانالدىڭ ەنشىسىنە جازىلدى. سول-اق, ەكەن ءبىزدىڭ باس جاتتىقتىرۋشى كاكاۋ دا ءوز قۇقىن پايدالانىپ, تايم-اۋت الدى. ءبىر قىزىعى, بۇل ارەكەت تە ناتيجەلى بولىپ, جەرلەستەرىمىز قارسىلاستار قاقپاسىنا ءتورتىنشى گولدارىن ەنگىزدى. قاقپا باعاناسىنان كەيىن سەرپىلگەن دوپ داۋرەن نۇرعوجينگە ءتيىپ, قايتادان تورعا توپ ەتە ءتۇستى. وسىمەن تاعى ءبىر قازاق فۋتبولشىسىنىڭ ەسىمى وتاندىق فۋتزال تاريحىندا ەۋروپا چەمپيوناتىنىڭ فينالدىق كەزەڭىندە گول سوققان ويىنشى رەتىندە جازىلدى.
ويىننىڭ نۇكتەسىن ەسەپ اشقان فۋتبولشى لەو قويدى. ماتچتىڭ سوڭعى سەكۋندتارىندا الىستان بوس قاقپانى ءدال كوزدەگەن ول ءدۋبلدىڭ اۆتورى اتاندى.
وسىلايشا, قۇرلىق بىرىنشىلىگىنە العاش رەت قاتىسىپ وتىرعان قازاقستان جارتىلاي فينالعا دەيىن جەتىپ وتىر. ەندى ءتۋرنيردىڭ اتالعان ساتىسىندا ءبىزدىڭ قۇراما يسپانيامەن سىنعا تۇسەدى. بۇل ويىن 11 اقپاننان 12-سىنە اۋىسقان تۇندە وينالادى. ال جارتىلايفينالدىق ەكىنشى جۇپتى سەربيا مەن رەسەي كوماندالارى قۇرادى.
ەلامان قوڭىر.
دەرەك: egemen.kz.
سۋرەت: uefa.com.