كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا ەۋروپالىق وداقتىڭ قازاقستانداعى وكىلدىگىنىڭ باسشىسى, ەلشى ترايان حريستەامەن كەزدەستى.
كەزدەسۋ بارىسىندا قازاقستان مەن ەۋروپالىق وداق اراسىنداعى ىنتىماقتاستىقتىڭ احۋالى مەن كەلەشەگىنە قاتىستى كەڭ اۋقىمدى ماسەلەلەر تالقىلاندى. سونداي-اق, وڭىرلىك جانە حالىقارالىق كۇن تارتىبىندەگى وزەكتى جايتتار ءجونىندە پىكىر الماسىلدى. تاراپتار ەكىجاقتى ساۋدا-ەكونوميكالىق جانە ينۆەستيتسيالىق بايلانىستاردىڭ قازىرگى دامۋ قارقىنىنا قاناعاتتاناتىندارىن ءبىلدىردى.
ەۋروپالىق وداق قازاقستاننىڭ نەگىزگى ساۋدا جانە ينۆەستيتسيالىق سەرىكتەسى بولىپ سانالادى. وتكەن 10 جىل ىشىندە قازاقستان مەن ەو اراسىنداعى ساۋدا اينالىمى 13 ەسە, ال قازاقستان ەكونوميكاسىنا سالىنعان ەۋروپالىق ينۆەستيتسيالاردىڭ كولەمى 10 ەسە ارتتى. قازاقستاننىڭ جالپى سىرتقى ساۋدا اينالىمىنىڭ جارتىسىنان كوبى جانە قازاقستان ەكونوميكاسىنداعى شەتەلدىك كاپيتالدىڭ 49 پايىزى ەۋروپالىق وداقتىڭ ۇلەسىنە تيەدى. قازاقستاننىڭ ەۋروپالىق وداق ەلدەرىمەن سىرتقى ساۋدا اينالىمى 2015 جىلى 31,2 ميلليارد اقش دوللارىنا جەتتى. ول ەلدىڭ جالپى سىرتقى ساۋدا كولەمىنىڭ 51,4 پايىزىن قۇرايدى.
كەزدەسۋ بارىسىندا قازاقستان رەسپۋبليكاسى مەن ەۋروپالىق وداق اراسىنداعى ىنتىماقتاستىقتىڭ بولاشاقتاعى جاي-كۇيىنە قاتىستى اۋقىمدى ماسەلەلەر تالقىلانىپ, تاراپتار وڭىرلىك جانە حالىقارالىق كۇن ءتارتىبىنىڭ وزەكتى جايتتارى بويىنشا پىكىر الماستى.
ءوز سوزىندە گ.ابدىقالىقوۆا ەۋروپالىق وداقتىڭ قولداۋىمەن قازاقستاننىڭ دۇنيەجۇزىلىك ساۋدا ۇيىمىنا تولىققاندى مۇشە بولعانىن اتاپ ءوتتى. «ءبىزدىڭ ەلىمىز ءۇشىن بىلتىرعى 2015 جىلدىڭ جەلتوقسانىندا قول قويىلعان قازاقستان مەن ەۋروپالىق وداق اراسىنداعى كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمنىڭ ماڭىزى زور. بۇل تاراپتار اراسىنداعى ءوزارا ساۋدانىڭ ودان ءارى وسۋىنە جانە ءوزارا ءىس-قيمىلدىڭ جان-جاقتى نىعايۋىنا زور ۇلەس قوساتىن بولادى. سوندىقتان دا, بۇل كەلىسىم قازاقستان مەن ەو اراسىنداعى قاتىناستاردىڭ دامۋىن جاڭا كەزەڭگە شىعارادى. مەنىڭ ويىمشا, كەلىسىم بارلىق باعىتقا – ساياساتقا دا, ەكونوميكا مەن مادەني دامۋعا دا جاڭا سەرپىن بەرەدى. قازىر ۇكىمەت بۇل كەلىسىمدى راتيفيكاتسيالاۋ ماسەلەسىنە ۇلكەن ءمان بەرىپ وتىر. قۇجات جاقىن ارالىقتا راسىمدەلەتىن بولادى, ويتكەنى, بۇل شۇعىل قارالاتىن سيپاتتاعى كەلىسىم», – دەپ اتاپ ءوتتى مەملەكەتتىك حاتشى.
جۇزدەسۋدە مەملەكەتتىك حاتشى ەۋروپاداعى سەرىكتەستەردى قازاقستان ەكونوميكاسىن يندۋستريالاندىرۋدىڭ ەكىنشى كەزەڭىنە جانە «نۇرلى جول» ينفراقۇرىلىمدىق دامۋ باعدارلاماسىنا قاتىسۋعا شاقىردى. سونداي-اق, ەلشىنى اعىمداعى جىلدىڭ ناۋرىز ايىندا پارلامەنت ءماجىلىسىنىڭ كەزەكتەن تىس سايلاۋى وتەتىنىنەن حاباردار ەتىپ, ەۋروپالىق پارلامەنت وكىلدەرىنىڭ حالىقارالىق بايقاۋشىلار رەتىندە سايلاۋ ۇدەرىسىنە بەلسەنە قاتىساتىنىنا سەنىم ءبىلدىردى.
ايتا كەتەتىن جايت, قازاقستان ەو-نىڭ 30 ءىرى ساۋدا سەرىكتەسىنىڭ ءتىزىمىنە ەنەدى جانە جالپى ساۋدا اينالىمىندا 26-ورىن الادى.
كەزدەسۋ سوڭىندا مەملەكەتتىك حاتشى ت.حريستەانىڭ قازاقستان رەسپۋبليكاسى مەن ەۋروپالىق وداق اراسىنداعى ءوزارا تۇسىنىستىك پەن ۇنقاتىسۋدى نىعايتۋ جولىنداعى قىزمەتىنە تابىس تىلەدى.
جاقسىباي سامرات,
«ەگەمەن قازاقستان».