بۇركىتتىنىڭ بيىگىنەن ەتەكتەگى جاڭاتاس قالاسىنا قۇلديلاي بەرگەنىڭىزدە سول جاعىڭىزدا ەسىك-تەسىگى ۇڭىرەيىپ, الدەقاشان جۇرتى كوشىپ كەتكەن كوپ قاباتتى ۇيلەرگە كوزىڭىز بىردەن تۇسەر ەدى. قازىر وسىناۋ قورقىنىشتى ۇيلەردىڭ ەشقايسىسى جوق. ويتكەنى ءتۇرتىپ كەتسەڭ, ونسىز دا قۇلاعالى تۇرعان بۇل ۇيلەردىڭ ءبارى بۇزىلىپ كەتتى. ءبىر كەزدەرى جۇمىس تاپپاي, سەندەلىپ قالعان جۇرت بۇل ۇيلەردىڭ ىشىندەگى تەمىرلەردىڭ ءبارىن كەسىپ الىپ, مۇلدەم جارامسىز ەتىپ تاستاعان بولاتىن.
كەڭەس زامانىندا 60 مىڭعا جۋىق تۇرعىنى بولعان جاڭاتاس ءوزىنىڭ قىسقا تاريحىندا تالاي قيىندىقتى باستان وتكەردى. ەندى, مىنە, شاعىن قالالار تىزىمىنە ەنگەن بۇل كەنشىلەر شاھارىنىڭ تاعى ءبىر جاڭا ءداۋىرى باستالىپ كەلە جاتقانداي. ءدال قازىر جاڭاتاستىڭ ۇيىنە ەمەس, كۇيىنە قاراۋ كەرەك. «جەرى بايدىڭ ەلى باي» دەگەن, سوڭعى جىلدارى سارىسۋ اۋدانىنىڭ جەر استى بايلىعىن يگەرۋگە كوپتەپ كەلە باستاعان ينۆەستورلاردىڭ ارقاسىندا شاعىن قالا ەڭسەسىن تىكتەپ, تىرشىلىگىن ءبىرشاما تۇزەپ الدى.
– سارىسۋ جەرىندە «ەۋروحيم» كومپانياسى جۇمىسىن باستاعالى بەرى كەنشىلەر قالاسىنىڭ تىرشىلىگىندە ۇلكەن وزگەرىستەر ورىن الۋدا, – دەيدى بۇل جونىندە جاڭاتاس قالاسىنىڭ اكىمى داۋرەنبەك شالباەۆ. – كومپانيا جۇمىسىن تولىق باستاعان كەزدە 2 مىڭ جۇمىس ورنى اشىلعالى تۇر. جاڭاتاس قالاسىندا ءبىر كەزدەرى تىرشىلىگى قايناپ جاتقان التى شاعىن اۋدان بار ەدى. تاراز جاقتان كىرە بەرگەندە № 9, ودان №7, 4, 5-ءشى اۋدانداردىڭ ۇيلەرى قاڭىراپ, كوزگە وتە قوراش كورىنەتىن. 2012 جىلدان باستاپ ۇكىمەتتەن شاعىن قالالاردى قولداۋ ماقساتىندا قوماقتى قارجى ءبولىندى. سونىڭ ىشىندە ەڭ باستى ماسەلە – جاڭاتاس قالاسىندا اپاتتى جاعدايدا تۇرعان ۇيلەردى بۇزۋ بولدى. ءۇش جىلدىڭ ىشىندە 120 ءۇي بۇزىلىپ, ورنى تەگىستەلدى. و باستا باس جوسپار بويىنشا بۇل اۋداندارعا جەكە ۇيلەر سالىنادى, ءوز الدىنا كوتتەدجدەر قالاشىعى تۇسەدى دەپ ويلاعانبىز. الايدا «ەۋروحيم» كومپانياسى سانكت-پەتەربۋرگتەن ارنايى ماماندار الىپ كەلىپ, قالانى كوركەيتۋ ماقساتىندا ءبىراز شارالاردى قولعا الۋدى جوسپارلاۋدا. ءبىز ول ماماندارعا بوس قالعان شاعىن اۋدانداردى جانە قالا ورتاسىنداعى كولدى كورسەتتىك. كومپانيا ەكى باعىتتا جوبا جاساۋعا كەلىسىپ, باسىم كۇشتى №8 اۋدانعا سالۋدى دۇرىس كورىپ وتىر. بۇعان دەيىن بۇل كومپانيا رەسەيدىڭ كوتەلنيكوۆو دەگەن شاعىن قالاسىندا ءىرى ءوندىرىس ورنىن اشىپ, وسىنداي قالاشىق سالعان ەكەن. سول جوبانى بىزدە دە ىسكە اسىرماق. ياعني, 2 جانە 4 وتباسىعا ارنالعان تۇرعىن ۇيلەر سالىنباق. نەگىزىنەن ەكى قاباتتى ۇيلەر. تاراز جاقتان كىرەبەرىستەگى №9 شاعىن اۋدان ورنىنان ساياباق سالۋدى جوسپارلاپ, جوباسىن جاساپ قويدىق. سوندا قالاعا كىرەبەرىس وتە ءساندى بولادى.
بۇگىندە جاڭاتاس قالاسىندا قاڭىراپ بوس تۇرعان, بىراق جوندەپ, ەل قونىستانۋعا بولادى دەگەن ءالى دە 20-عا جۋىق ءۇي بار. ونىڭ 5-ەۋى جەكەمەنشىكتە, 15-ءى كوممۋنالدىق مەنشىكتە. ءبىر كەزدەرى بولماشى اقشاعا جەكەشەلەنىپ كەتكەن وسى 5 ءۇيدى «ەۋروحيم» كومپانياسى ساتىپ الماق بولعان ەكەن. دايىن ءۇيدى جوندەپ, جۇمىسشىلارىنا تۇرعىن ءۇي رەتىندە بەرۋ ولارعا دا الدەقايدا وڭايعا تۇسەتىنى انىق ەدى. بىراق ساتىپ العان كىسىلەرمەن باعاسىنا كەلىسە الماپتى. ال, كوممۋنالدىق مەنشىكتەگى 15 ءۇيدى جەرگىلىكتى اكىمدىك شەتىنەن ءجوندەپ, ءۇي كەزەگىندە تۇرعاندارعا بەرىپ جاتىر. بيۋدجەتكە تاپسىرىس بەرىلگەن, ءبارىنىڭ جوباسى دايىن. ءبىر كەزدەرى بۇل جاقتىڭ جاستارى تۋعان كۇن كەشتەرىندە, قۋانىشتى تويلاردا «جاڭاتاس قالاسىنان 3 بولمەلى پاتەردىڭ كىلتىن سىيلايمىن», دەپ ازىلدەيدى ەكەن. قازىر جاڭاتاستىقتار ءويتىپ جالىنداپ سويلەي المايدى. ويتكەنى, باياعىداي بوس تۇرعان ءۇي جوق. جارايتىنى شەتىنەن جوندەلىپ, كادەگە جاراپ جاتىر. سودان بولار قالادا پاتەردىڭ باعاسى دا, پاتەردى جالعا الۋ باعاسى دا اجەپتاۋىر وسكەن. سۇرانىس بولعاننان كەيىن باعا وسەدى دە...
وسىلايشا جاڭاتاستىڭ جاڭا ءداۋىرى باستالىپ كەلەدى.
ورالحان ءداۋىت,
«ەگەمەن قازاقستان».
جامبىل وبلىسى.
سۋرەتتەردى تۇسىرگەن اقادىل رىسماحان.