جوعارى وقۋ ورىندارىن بىتىرەتىن جالعىزىلىكتى تۇلەكتەردى جۇمىسقا ورنالاستىرۋعا ىنتا تانىتتى
اتىراۋدا ءتورت جىلدان بەرى «ءساتتى قادام» جوباسىمەن جوعارى وقۋ ورىندارىنىڭ تۇلەكتەرىن ءىرى كاسىپورىندارعا اۋەلى ءىس-تاجىريبەدەن وتكىزۋ جوباسى قولعا الىنىپ كەلەدى. ماسەلەن, «جاس وتان» جاستار قاناتى اتىراۋ وبلىستىق فيليالىنىڭ توراعاسى اسقار بوپىلدىقوۆتىڭ ايتۋىنشا, وتكەن جىلى وسىنداي جوباعا 60 تۇلەك قاتىسقان. ءۇش ايلىق ءىس-تاجىريبەدەن وتۋگە تارتىلعان ولاردىڭ دەنى ءوز بەتىمەن جۇمىس تاپسا, 2 تۇلەك قانا جوبا بويىنشا تۇراقتى جۇمىسقا تارتىلىپتى.
ەندى بيىل بۇل جوباعا اتا-انا قامقورلىعىنسىز قالعان تۇلەكتەردى تارتۋ كوزدەلىپ وتىر. وسىعان وراي «جاس وتان» جاستار قاناتى اتىراۋ وبلىستىق فيليالى مەن ءۇش ءىرى كاسىپورىن – اتىراۋ مۇناي وڭدەۋ زاۋىتى, اتىراۋ تەمىر-جول بولىمشەسى جانە «قازترانگاز» كومپانياسىنىڭ وڭىرلىك فيليالى اراسىندا مەموراندۋمعا قول قويىلدى. تۇلەكتەردىڭ ءىس-تاجىريبەدەن وتۋىنە ىنتا تانىتىپ وتىرعان كاسىپورىننىڭ ءبىرى – اتىراۋ مۇناي وڭدەۋ زاۋىتى بۇعان دەيىن دە ستۋدەنتتەرگە قولداۋ كورسەتەتىندەردىڭ قاتارىنان سانالادى. بىلتىر بۇل كاسىپورىن 340 ستۋدەنتتى تاجىريبەدەن وتكىزىپتى. اتالعان كاسىپورىننىڭ پەرسونالدارمەن جۇمىس جانە ەڭبەكاقى تولەۋ باسقارماسىنىڭ ءبولىم باسشىسى اسەل جايلاشوۆانىڭ ايتۋىنا قاراعاندا, مۇناي وڭدەۋ زاۋىتىنا حيميالىق تەحنولوگيالار مەن ورگانيكالىق زاتتار جانە ماشينا قۇراستىرۋ ماماندىقتارىن مەڭگەرگەن تۇلەكتەر كوبىرەك قاجەت ەتىلەدى. كاسىپورىن ەلىمىزدە وسىنداي ماماندىقتاردى دايىندايتىن بىرنەشە جوعارى وقۋ ورىندارىمەن كەلىسىمگە ساي ستۋدەنتتەردىڭ وندىرىستىك تاجىريبەدەن وتۋىنە قولداۋىن كورسەتىپ كەلەدى. ال «قازاقستان تەمىر جولى» ۇك اتىراۋ جول بولىمشەسىنىڭ ءبولىم باسشىسى باۋىرجان قارتاننىڭ ايتۋىنا قاراعاندا, بۇل سالادا لوگيستيكانى دامىتۋعا باسىم باعىت ۇستالىپ وتىر. سول سەبەپتەن, اتىراۋ مۇناي جانە گاز ينستيتۋتىندا تەمىر جول كولىگى سالاسىنا قاجەتتى مامانداردى بىرلەسە دايىنداۋعا كوڭىل اۋدارىلادى.
– ءبىز وسى جوبا ارقىلى جوعارى وقۋ ورنىن بىتىرگەن تۇلەكتەردىڭ ءىرى كاسىپورىنداردا تاجىريبەدەن ءوتىپ, كەلەشەكتە جۇمىسقا تۇرۋىنا اتسالىسۋدى كوزدەدىك. بۇرىن تۇلەكتەردىڭ ىنتا تانىتۋشىلارىن جوباعا تارتقان بولساق, بيىل اتا-انا قامقورلىعىنسىز قالعان تۇلەكتەرگە باسىمدىق بەرىپ وتىرمىز. بۇگىن كاسىپورىن ىنتا تانىتىپ, بىزبەن كەلىسىمگە قول قويدى. ەندى وسى ايدىڭ سوڭىنا دەيىن تاعى دا 20-عا جۋىق ءىرى كاسىپورىندارمەن كەلىسىمگە قول قويۋ جوسپارلانىپ وتىر. ولاردىڭ اراسىندا ءىرى مۇناي كومپانيالارى, مەملەكەتتىك مەكەمەلەر بار, – دەدى «جاس وتان» جاستار قاناتى اتىراۋ وبلىستىق فيليالىنىڭ توراعاسى اسقار بوپىلدىقوۆ.
اتىراۋ مۇناي جانە گاز ينستيتۋتىنىڭ ستۋدەنتى گۇلحانىم وتەشقاليەۆا بيىل ماتەريال تانۋ جانە جاڭا ماتەريالدار تەحنولوگياسى ماماندىعىن مەڭگەرىپ شىقپاق. بولاشاقتا مۇناي-گاز سالاسىنداعى كاسىپورىنداردا, سونىڭ ىشىندە, مۇناي وڭدەۋ باعىتىندا جۇمىسقا ورنالاسۋدى كوزدەيدى. «ويتكەنى, مۇناي وڭدەۋ سالاسىندا يننوۆاتسيالىق جانە نانوتەحنولوگيالاردى قولدانۋ قاجەتتىگى تۋىنداپ وتىر. ءوزىم وسىعان ۇلەسىمدى قوسقىم كەلەدى», دەيدى ول.
جولداسبەك شوپەعۇل,
«ەگەمەن قازاقستان».
اتىراۋ.