استانا. 31 قاڭتار. اۋەسقوي بوكستا ەل نامىسىن قورعاعان اسا اۋىر سالماقتاعى بوكسشى رۋسلان مىرساتاەۆ كاسىپقوي رينگتەگى العاشقى كەزدەسۋىن وتكىزىپ, تەحنيكالىق نوكاۋتپەن جەڭىسكە جەتتى. بۇل تۋرالى egemen.kz ءتىلشىسى حابارلادى.
مىرساتاەۆ كاسىپقوي بوكستاعى دەبيۋتتىك جەكپە-جەگىندە رەسەيلىك ۆالەري زاميرالوۆپەن سىنعا ءتۇسىپ, ءبىرىنشى راۋندتا-اق قارسىلاسىن نوكاۋتقا جىبەردى.
ايقاستىڭ العاشقى سەكۋندتارىندا زاميرالوۆ جويقىن سوققىلارىمەن شابۋىل جاساپ كوردى. الايدا, قورعانىستا ساۋاتتى قيمىلداعان وتانداسىمىز ءوزى دە قارىمتا شابۋىل ۇيىمداستىردى. ناتيجەسىندە رەسەيلىك اياعىنان جاراقات الىپ, تورەشىلەر جەكپە-جەكتى توقتاتۋعا ءماجبۇر بولدى.
بوكس كەشى BM Global جانە Diamond Ring جشس-لەرىنىڭ, سونداي-اق, قازاقستان كاسىپقوي بوكس فەدەراتسياسىنىڭ ۇيىمداستىرۋىمەن كەشە الماتىداعى Royal Tulip قوناق ۇيىندە ءوتتى. رۋسلاننان بولەك, رينگكە ايدوس ەربوسىن ۇلى, بەرىكباي نۇرىمبەتوۆ, نۇرسۇلتان قابدۋلوۆ جانە تاعى باسقا قازاقستاندىق بوكسشىلار كوتەرىلدى. ءوز كەزەگىندە ايدوس ەربوسىن ۇلى دا رەسەيلىك دميتري انتيپوۆتى ءبىرىنشى راۋندتا نوكاۋتقا جىبەرگەنىن اتاپ وتكەن ءجون.
ايتا كەتەيىك, رۋسلان مىرساتاەۆ ۇلتتىق قۇراما ساپىندا 2008 جىلى قىتاي استاناسى – بەيجىڭ قالاسىندا وتكەن وليمپيالىق ويىندارعا قاتىستى. ودان بولەك, ول «استانا ارلاندارى» كومانداسىمەن بىرگە بۇكىلالەمدىك بوكس سەرياسى سايىسىنىڭ چەمپيونى اتاندى.
ەلامان قوڭىر.
دەرەك: egemen.kz.
سۋرەت: prosportkz.kz.