كەلەسى جىلى ەلىمىزدە العاش رەت قىسقى ۋنيۆەرسيادا وتەدى. بۇل – دۇنيەجۇزى ستۋدەنتتەرىنىڭ قىسقى سپورت ءتۇرلەرىنەن قاتىساتىن جارىسى. قازىرگى كەزدە الماتىدا وسىناۋ ءتورت جىلدا ءبىر كەلەتىن دودانى وتكىزۋگە دايىندىق جۇمىستارى ءجۇرىپ جاتىر. سپورتشىلارىمىز دا شەتەلدە ءوتىپ جاتقان ۇلكەندى-كىشىلى جارىستارعا, وقۋ-جاتتىعۋ جيىندارىنا قاتىسىپ, ۋنيۆەرسياداعا دايىندىقتارىن باستاپ كەتتى.
بۇل ويىندار كەيبىر ساڭلاقتارىمىز ءۇشىن ومىرىندە العاش رەت قاتىساتىن جارىس بولادى. ال كەيبىر تاجىريبەسى بار, كوپتەگەن دودالاردا ىسىلىپ, جەيدەسىن توزدىرعان سپورتشىلارىمىزعا ۋنيۆەرسيادا التىن مەدالداردى كۇرەپ الاتىن الاڭعا اينالادى دەپ ويلايمىز.
بۇگىندە ەلىمىزدە حالىققا سالاماتتى ءومىر سالتىن ناسيحاتتاۋدا, سپورت پەن دەنەشىنىقتىرۋدى دامىتۋدا قولدا بار جاعدايدىڭ ءبارى جاسالىپ جاتىر. سونىڭ ءبىر دالەلى – مەملەكەتتىڭ قانداي دا بولسىن داعدارىسقا قاراماي, ادامنىڭ سپورتپەن اينالىسۋىنا, ەلىمىزدە حالىقارالىق جارىستاردىڭ وتۋىنە جاعداي جاساۋى.
قىسقى ۋنيۆەرسياداعا جەر-ءجۇزىنىڭ əر ەلىنەن 2000-نان استام سپورتشى قاتىسادى دەلىنۋدە. سوندىقتان ول ءبىر جاعىنان سپورتتىق جارىس قانا ەمەس, الەمنىڭ ءار تۇكپىرىنەن قازاقستانعا جارىسقا قاتىسۋعا اسىعا كەلەتىن ادامدار ءۇشىن اسەم الماتىنىڭ, ارۋ الاتاۋدىڭ كەرەمەت تابيعاتىن كورىپ قايتاتىن دەمالىس ۋاقىتى بولادى. دەمەك, ۋنيۆەرسيادا ءتۋريزمدى دامىتۋعا دا سەپتىگىن تيگىزەدى دەگەن ءسوز. وسى جەردە ايتاتىن نارسە, 2011 جىلى استانا مەن الماتىدا قىسقى ازيادا ويىندارى وتكەن سوڭ, سارىقۇرلىقتىڭ كەيبىر جاتتىقتىرۋشىلارى مەن سپورتشىلارى باسقا ەمەس, ءبىزدىڭ ەلدە عانا وقۋ-جاتتىعۋ جۇمىستارىن وتكىزۋدى قالاعانى تەگىن ەمەس. ەندەشە, قىسقى ۋنيۆەرسيادا ەلىمىزدىڭ ءيميدجىن قالىپتاستىرىپ, ءتۋريزمدى دامىتاتىن تاعى ءبىر الاڭعا اينالۋى عاجاپ ەمەس. ءبىز وسىعان تىلەكتەسپىز!
قايىرگەلدى جانپەيىسوۆ, ۇلتتىق شتاتتىق كوماندالار جانە سپورت رەزەرۆى ديرەكتسياسىنىڭ ديرەكتورى:
– بۇكىلالەمدىك قىسقى ۋنيۆەرسيادا ويىندارى ساياسي ءجانە سپورتتىق جوبا عانا ەمەس, سونداي-اق الماتىنىڭ دامۋى مەن كوركەيۋىنە سەپتىگىن تيگىزەتىن بىرەگەي جوبا. ويتكەنى, بارلىق سالىنىپ جاتقان سپورتتىق نىساندار ۋنيۆەرسيادا اياقتالا سالا, حالىقتىڭ يگىلىگىنە بەرىلەدى. ءبىزدىڭ سپورتشىلار الىس ەلدەرگە بارماي, ءوز ەلىمىزدەگى سپورتتىق نىسانداردا جاتتىعادى. وسىلاي ۋاقىت پەن قارجىنى ۇنەمدەي الامىز. ۋنيۆەرسيادانىڭ ارقاسىندا قانشاما ادام جۇمىسپەن قامتىلادى. بولاشاقتا وليمپيا ويىندارىن وتكىزىپ جاتساق, تاعى دا كوپكە شاشىلمايمىز. ءويتكەنى, بىزدە بارلىعى دايىن. ۋنيۆەرسيادا نىساندارىندا الەم چەمپيوناتتارى مەن كۋبوكتارى, باسقا دا ۇلكەن جارىستاردى ءوتكىزۋگە بولادى.
ۋنيۆەرسيادادا ءبىزدىڭ سپورتشىلار جاقسى ناتيجە كورسەتەدى دەپ ۇمىتتەنەمىن. دەگەنمەن, 2011 جىلعى ازيا ويىندارىنداعى ناتيجەمىزدى قايتالاۋ قيىنعا سوعادى. سەبەبى, ول كەزدە تەك ازيا ەلدەرىنىڭ كوماندالارى قاتىسسا, كەلەسىدە الەمنىڭ ءار تۇكپىرىنەن سپورتشىلار كەلەدى. ءبىزدىڭ سپورتشىلارعا جانكۇيەرلەردى جەرگە قاراتۋعا بولمايدى. سپورتشىلارىمىزدىڭ باعى مەن بابى كەلىسىپ, ەل نامىسىن ابىرويمەن قورعاپ شىعاتىنىنا سەنىمدىمىن.
يۋليا گالىشەۆا, 2015 جىلعى ۋنيۆەرسيادا ويىندارىنىڭ چەمپيونى:
– يسپانيانىڭ گرانادا قالاسىندا وتكەن قىسقى ۋنيۆەرسياداعا قاتىستىم. بۇل مەن العاش رەت قاتىسقان ستۋدەنتتەر دوداسى بولدى. سول كەزدە مەن ۋنيۆەرسيادانىڭ دەڭگەيىنە كوز جەتكىزدىم. ول قىسقى وليمپيادادان كەم ەمەس ەكەن. ەندى سوندا جيناعان تاجىريبەمنىڭ ارقاسىندا, 2017 جىلى ەلىمىزدە وتەتىن ۋنيۆەرسيادا ويىندارىندا ءساتتى ونەر كورسەتەمىن دەپ ويلايمىن. كەلەسى جىلى ۋنيۆەرسيادادا الەم چەمپيوناتى مەن ازيا ويىندارى وتەدى. وسى جارىستىڭ بارلىعىندا سۇرىنبەۋگە تىرىسامىن. وعان شامام تولىقتاي جەتەدى.
قىسقى ۋنيۆەرسياداعا دايىندىعىم جاقسى. جارىسقا ارنايى باعدارلاما بويىنشا دايىندالىپ جاتىرمىن.
نۇربەرگەن جۇماعازيەۆ, شورت-ترەكتەن قازاقستان قۇراماسىنىڭ كاپيتانى:
– 2017 جىلعى قىسقى ۋنيۆەرسياداعا دايىندىعىم جاقسى. قازىر نيدەرلاندتا وقۋ-جاتتىعۋ جيىندارىندا ءجۇرمىز. كەلەسى جىلى تەك التىن الۋ ءۇشىن بارىمىزدى سالامىز. ءبىزدىڭ كوماندا مىقتى جىگىتتەردەن جاساقتالعان. سوندىقتان وزىمىزگە سەنەمىز. ۋنيۆەرسيادا مەن ءۇشىن وليمپيا ويىندارىمەن پارا-پار. ويتكەنى, بۇل جارىستارعا وليمپياداعا قاتىسىپ جۇرگەن كوماندالار كەلەدى. ال ولاردىڭ اراسىنان توپ جارۋ, وليمپ شىڭىن باعىندىرۋمەن تەڭ.
جىبەك اراپباەۆا, 2011 جىلعى قىسقى ازيا ويىندارىنىڭ كۇمىس جۇلدەگەرى:
– مەن 2011 جىلى قىسقى ازيا ويىندارىنا قاتىسقان بولاتىنمىن. سول سىندا كۇمىس جۇلدەنى الىپ, تۇعىرعا كوتەرىلگەن ءساتتى ەشقاشان ۇمىتپايمىن. سودان بەرى اتتاي التى جىل ءوتتى. جەڭىستەر دە, ساتسىزدىكتەر دە بولدى. جاراقات السام دا, سپورتتان قول ۇزگەن ەمەسپىن. ويتكەنى, ماقساتىما تولىق جەتتىم دەپ ايتا المايمىن. ۋنيۆەرسيادا ويىندارىن اسىعا كۇتىپ ءجۇرمىن. وسى سىنعا قاتىسۋدى كوپتەن بەرى ارمانداپ, جوسپارلاپ قويعانمىن. بۇرىن-سوڭدى ۋنيۆەرسيادا ويىندارىنا قاتىسىپ كورمەگەنمىن. ەلىمنىڭ مەرەيىن اسىرعىم كەلەدى. مەن ءوزىم اينالىساتىن سپورت ءتۇرىن حالىققا ناسيحاتتاپ, ونىڭ دامۋىنا اتسالىسقىم كەلەدى. 2011 جىلى ءبىزدىڭ كوماندادا فريستالدىڭ اكروباتيكا تۇرىنەن بار-جوعى 3-4 ادام بولسا, قازىر ءبىرشاما كوبەيىپ قالدىق. ال ۋنيۆەرسيادا اياقتالعاننان كەيىن, فريستايلدىڭ اكروباتيكاسىنا قىزىعىپ, وسى سپورتقا دەن قوياتىنداردىڭ قاتارى ءتىپتى ارتا تۇسەدى دەپ ەسەپتەيمىن. جەڭىستى كۇندە جولىققانشا!
جانبوتا الدابەرگەنوۆا, سوچي وليمپياداسىنا قاتىسۋشى:
– ۋنيۆەرسيادا ءار ەكى جىل سايىن وتكىزىلەتىن ۇلكەن سپورتتىق شارا. ول جارىستا تەك ستۋدەنت سپورتشىلار قاتىسا الادى. مەن دە قازىر ۋنيۆەرسيتەتتە وقيمىن. وسى كەزگە دەيىن ەلىمىزدە وتكەن حالىقارالىق جارىستارعا قاتىسپادىم. مەنىڭ فريستايلعا دەگەن قىزىعۋشىلىعىمدى 2011 جىلى استانا مەن الماتىدا وتكەن VII قىسقى ازيا ويىندارى وياتتى. سول كەزدە وسى سپورت تۇرىنە قىزىعا باستادىم. قازىر ناتيجەلەرىم جامان ەمەس. سوچيدە وتكەن وليمپيا ويىندارىنا قاتىسىپ, التىنشى ورىن الدىم. بىلتىر ۋنيۆەرسياداعا قاتىسقىم كەلىپ ەدى. بىراق, شاڭعى اكروباتيكاسى ۋنيۆەرسيادا باعدارلاماسىنا كىرمەي قالدى. سوندىقتان 2017 جىلدى اسىعا كۇتىپ ءجۇرمىن.
رەگينا گلازمان, مانەرلەپ سىرعاناۋشى:
– 2017 جىلى الماتىدا وتەتىن قىسقى ستۋدەنتتەر جارىسى مەنىڭ قاتىساتىن العاشقى ۋنيۆەرسيادام. سوندىقتان جاۋاپكەرشىلىكتى سەزىنگەندىكتەن, بويىمدا الاڭداۋشىلىق بار. دەگەنمەن, ءبارىن ىسىرىپ تاستاپ, ءوزىمدى دايىنداۋىم كەرەك. ءوز ەلىمدە وتەتىن قىسقى ويىنداردا بارىمدى سالىپ, جاقسى ناتيجە كورسەتكىم كەلەدى. ءبىز ءوز جانكۇيەرلەرىمىزدىڭ الدىندا جارىسامىز, سوندىقتان ولاردىڭ قولداۋى بىزگە دەم بەرەدى.
جاقىندا ماعان وتا جاسالدى. قازىر قالپىما كەلىپ جاتىرمىن. اقپاننان باستاپ دايىندىقتى باستايمىن. ءبىز جاتتىقتىرۋشىلارىمىزبەن ارنايى جاتتىعۋ كەستەسىن جاساپ قويدىق. سونىڭ نەگىزىندە دايىندالامىز.
ۆلاديمير پاشكوۆسكي, شايبالى حوككەيدەن مەملەكەتتىك جاتتىقتىرۋشى:
– 2017 جىلعى ۋنيۆەرسياداعا قاراي سپورتشىلارىمىز بابىندا بولادى. سول ءۇشىن ولار بارلىق دايىندىقتان ءوتىپ جاتىر. وتكەن ۋنيۆەرسيادا ويىندارىندا ەرلەر قۇراما كومانداسى ەكىنشى ورىن السا, قىزدارىمىز التىنشى ورىننان كورىندى. بۇل ناتيجەلەردى الداعى ۋنيۆەرسيادادا جاقسارتۋىمىز كەرەك. قازىرگى تاڭدا ەرلەر كومانداسىنىڭ قۇرامىندا 50 حوككەيشى بار. بارلىق سپورتشىلار قحل مەن جحل-دا ويناپ ءجۇر. ال ايەلدەر قۇراماسىنىڭ دەنى الماتىنىڭ «ايسۇلۋ» حوككەي كلۋبىنىڭ قىزدارىنان جاساقتالعان.
دايىنداعان
داستان كەنجالين,
«ەگەمەن قازاقستان».