دۇيسەنبىدەن سەيسەنبىگە قاراعان ءتۇنى يسپانيا مەن كابو-ۆەردە (0:0), بەلگيا مەن مىسىر (1:1), ساۋد ارابياسى مەن ۋرۋگۆاي (1:1), يران مەن جاڭا زەلانديادا (2:2) اراسىندا وتكەن باسەكەلەردىڭ بارلىعى دا تەڭ ەسەپپەن اياقتالدى. ءدال وسىنداي جاعداي دۇنيەجۇزىلىك دوپ دوداسىندا ءبىر رەت قانا تىركەلدى. 1958 جىلى شۆەتسياداعى چەمپيوناتتىڭ شۆەتسيا – ۋەلس (0:0), انگليا – اۋستريا (2:2), پاراگۆاي – يۋگوسلاۆيا (3:3), گفر – سولتۇستىك يرلانديانىڭ (2:2) كەزدەسۋىندە جەڭىمپاز انىقتالمادى. ءبىر قىزىعى, بۇل ويىندار دا ءدال وسى جارىستاعىداي 15 ماۋسىم كۇنى وتكەن ەدى.
2007, 2011 جىلدارى ايەلدەر اراسىندا وتكەن الەم چەمپيوناتىندا جاڭا زەلانديا قۇراماسى ساپىندا دجەنني بيندون ەسىمدى بۇرىمدى ونەر كورسەتتى. بيىلعى الەم چەمپيوناتىندا ونىڭ ۇلى تايلەر بيندون يرانعا قارسى ويىندا جاسىل الاڭعا شىقتى. وسى سپورت ءتۇرى تاريحىندا بۇرىن-سوڭدى اناسى مەن بالاسى اتالعان جارىسقا قاتىسقان ەمەس.
داڭقتى يسپانياعا قارسى ويىندا سەگىز سەيۆ جاساپ, ءوز قاقپاسىنا بىردە-ءبىر گول جىبەرمەگەن ۆوزينو بىردەن ميلليونداعان جانكۇيەردىڭ قوشەمەتىنە بولەنىپ, كابو-ۆەردەنىڭ ۇلتتىق باتىرىنا اينالدى. سونىمەن قاتار الەۋمەتتىك جەلىدە دە بەدەلى كۇرت ارتتى. جارىس باستالعانعا دەيىن ۆوزينونىڭ ينستاگرامدا نەبارى 56 مىڭ جازىلۋشىسى بولسا, اتلانتادا باسەكە اياقتالعان بەتتە ولاردىڭ سانى بىردەن 5,8 ميلليونعا جەتتى.
نورۆەگيانىڭ قاقپاسىنا گول سوققان يراك قۇراماسىنىڭ شابۋىلشىسى ايمەن حۋسسەين تاعدىرى كۇردەلى ادامدار قاتارىنان. ونىڭ كورمەگەنى جوق. اكەسى ء«ال-كايدا» ۇيىمداستىرعان تەراكت كەزىندە قازا تاپتى. تۋعان اعاسى ءىز-ءتۇسسىز جوعالىپ كەتتى. ءوزى بالا كەزىندە بوسقىندار لاگەرىندە بولدى. سوعان قاراماستان حۋسسەين كوزدەگەن ماقساتىنا قول جەتكىزىپ, يراكتىڭ ەڭ مىقتى فۋتبولشىلارىنىڭ بىرىنە اينالدى. ۇلتتىق قۇراما ساپىندا بارلىعى 95 كەزدەسۋ وتكىزگەن ويىنشى 33 مارتە مەرگەندىك تانىتتى. بىرقاتار اسا ماڭىزدى ماتچتاردا كومانداسىنا جەڭىس سىيلادى. قازىردە ايمەن ءوز ەلىنىڭ ەڭ مەرگەن فۋتبولشىلارىنىڭ توپ-5-تىگىنە ەركىن ەنىپ وتىر. ىرىكتەۋ تۋرنيرىندە بوليۆياعا قارسى وتكەن شەشۋشى كەزدەسۋدە ءدال وسى حۋسسەين سوققان گولدىڭ ارقاسىندا يراك قۇراماسى الەمدىك دوداعا قاتىسۋ مۇمكىندىگىنە يە بولدى.