شىعىستىڭ قاي بۇرىشى بولسىن, كەنەپتى «كەرىپ» جىبەرىپ, ەتيۋد جازۋعا سۇرانىپ-اق تۇر. سىلدىراپ اققان بۇلاق, كۇركىرەپ اققان وزەن كوپ. التايدى ايتپاعاننىڭ وزىندە نارىن, قالبا جوتالارىنىڭ سىڭسىعان ورمانى, تولقىعان كولدەرى قانشاما؟ بۇل جولى قىلقالام شەبەرلەرىنىڭ تاڭداۋى ۇلاننىڭ دالاسىنا ءتۇستى. قالبانىڭ قوجىر-قوجىر سىلەمدەرى مەن بەل-بەلەسىن كەنەپكە جازدى.
پلەنەردى وبلىستىق ونەر مۋزەيىنىڭ باسشىلىعى ۇيىمداستىردى. مۇنداي ءداستۇرلى جوبا جىلىنا ەكى رەت وتەدى. ءبىرى – جازدىڭ جايما شۋاعىندا بولسا, ەكىنشىسى – كۇزدىڭ ميزام شۋاعى. ازدى-كوپتى سۋرەتشىلەردىڭ باسى قوسىلاتىن ءىس-شارانىڭ ءبىرى دە وسى. قىلقالام ۇستاعان ونەر يەلەرى ءبىر-بىرىمەن قاۋىشىپ, ارقا-جارقا بولىسادى. ءتىس قاققان شەبەرلەر جاستارعا جول كورسەتىپ, باعىتتايدى. تابيعات اياسىنداعى بۇل جولعى پلەنەر دە سولاي بولدى.
– جىل سايىن سۋرەتشىلەردى جيناپ, تابيعات اياسىنا شىعىپ تۇرۋ بۇرىننان كەلە جاتقان ءداستۇرىمىز. بۇعان دەيىن شىعىستىڭ بىرقاتار اۋداندارىنان ەتيۋد جازعانبىز. ءسويتىپ, كورمە وتكىزەمىز. وسى ونەر ساپارىنا وننان استام كاسىبي سۋرەتشى قاتىستى, – دەيدى وبلىستىق ونەر مۋزەيى ديرەكتورىنىڭ ورىنباسارى ەسەنبول ناقتىباي.
ۇلان اۋدانىندا ءوتىپ جاتقان پلەنەرگە ەرجان تۇرعانباەۆ, گۇلنار بەكبەردينوۆا, ءمادي قايىرحان, دانيار الدابەرگەنوۆ, ادىلەت نيازبەكوۆ سىندى تانىمال قىلقالام شەبەرلەرى قاتىستى. ولار وزدەرى تاڭداعان ورىندارعا جايعاسىپ, ءاپ-ساتتە قوس-قوستان ەتيۋد جازدى.
– پلەنەردى سۋرەتشىلەر قاۋىمى ۇزاق كۇتەدى. ارينە, اركىم ءوز بەتىمەن شىعىپ, ەتيۋد جازا بەرە دە الادى. الايدا ءبارىمىزدىڭ باسىمىز قوسىلىپ, تاجىريبە الماساتىن الاڭ وسى. سوندىقتان بۇدان دا ءجيى ۇيىمداستىرىلىپ تۇرسا ەكەن, – دەيدى جاس سۋرەتشى ءمادي قايىرحان.
ءجيى شىقپاسا دا, ەڭبەكتەرى ەسكەرىلسە ەكەن دەيمىز. ايتپەسە, مادەنيەت قىزمەتكەرلەرى كۇنى ماراپاتتالىپ جاتقان ونەر مايتالماندارىنىڭ ىشىنەن بىردە-ءبىر سۋرەتشىنى كورمەگەن ەدىك. الداعى ۋاقىتتاردا بۇل ولقىلىقتىڭ ورنى تولاتىن شىعار. ايتقانداي, جۇمىستاردىڭ ناتيجەسىن ونەر مۋزەيى ۇيىمداستىراتىن كورمەلەردىڭ بىرىنەن تاماشالاي الامىز.
شىعىس قازاقستان وبلىسى,
ۇلان اۋدانى