الماتى قالالىق سايلاۋ كوميسسياسىنىڭ توراعاسى باقىتجان دوسپانوۆ ەلىمىزدە 20 ناۋرىزدا بولاتىن پارلامەنت ءماجىلىسى مەن جەرگىلىكتى ءماسليحاتتاردىڭ كەزەكتەن تىس سايلاۋلارىنا ازىرلىك پەن ۇيىمداستىرۋ جۇمىستارى تۋرالى ايتىپ بەردى.
ب.دوسپانوۆ قالادا 578 سايلاۋ كوميسسياسى جۇمىس ىستەيتىندىگىن, ولاردىڭ 9-ى اۋماقتىق, 37-ءسى وكرۋگتىك جانە 532-ءسى ۋچاسكەلىك كوميسسيالار ەكەندىگىن ايتتى. سايلاۋ كەزىندە اتالعان كوميسسيالاردا حالىققا 4046 ادام قىزمەت كورسەتەتىن بولادى. سونداي-اق, ول سايلاۋ الدىنداعى ناسيحات جۇمىستارى پارتيالىق ءۇمىتكەرلەر ءتىزىمىن ۇسىنعان پارتيالار ءۇشىن ۇستىمىزدەگى جىلدىڭ 20 اقپانىنان, قالالىق ءماسليحات دەپۋتاتتىعىنا ۇسىنىلعان كانديداتتار ءۇشىن 24 اقپاننان باستالاتىندىعىن جەتكىزدى. الايدا, ازىرگە قالالىق ءماسليحاتقا دەپۋتات بولۋ ءۇشىن ءالى بىردە-ءبىر ۇمىتكەر ءوز ءوتىنىشىن تاپسىرماعان.
قالالىق سايلاۋ كوميسسياسى توراعاسىنىڭ ايتۋىنشا, الماتى قالاسى اكىمدىگىنە قاراستى باسىلىم بەتتەرىندە سايلاۋ وكرۋگتەرى مەن ۋچاسكەلەرىنىڭ شەكارالارى جانە مەكەنجايلارى, سايلاۋ كوميسسيالارىنىڭ قۇرامى تۋرالى تولىق اقپارات جاريالانعان. قالاعا كەيىننەن قوسىلعان اۋدانداردىڭ اۋماعى ايقىندالىپ, زاڭ تالاپتارىنا سايكەس سايلاۋ وكرۋگتەرىنە ەنگىزىلگەن جانە سايلاۋ ۋچاسكەلەرى بەكىتىلگەن. «الداعى سايلاۋدىڭ بارىنشا جوعارى دەڭگەيدە ءوتۋى ءۇشىن بارلىق سايلاۋ ۋچاسكەلەرى قاجەتتى جابدىقتارمەن قامتاماسىز ەتىلەدى. سايلاۋ كەزىندە الماتى قالاسى بويىنشا 532 سايلاۋ ۋچاسكەسى جۇمىس ىستەيتىن بولادى. ونى 37 وكرۋگ, 8 اۋداندىق جانە 1 قالالىق كوميسسيا باسقارادى. ۋچاسكەلەردە مىندەتتى تۇردە تاۋەلسىز بايقاۋشىلار بولادى. سونداي-اق, ءار جەتى پارتيادان ءبىر ادامنان تاۋەلسىز ساراپشىلار سايلاۋ جۇمىسىن قاداعالايدى. الماتى قالاسى بويىنشا سايلاۋشىلاردىڭ سانى – 1 038 876 ادام, ءبىز ولاردىڭ الداعى سايلاۋدا جوعارى بەلسەندىلىك كورسەتىپ قاتىساتىندىعىنا سەنىمدىمىز», – دەدى ب.دوسپانوۆ.
قانات ەسكەندىر,
«ەگەمەن قازاقستان».
الماتى.