ۇلىتاۋ وبلىسىنىڭ شالعاي اۋىلدارىندا مەديتسينالىق قىزمەتتىڭ قولجەتىمدىلىگىن ارتتىرۋ باعىتىنداعى جۇمىس جۇيەلى تۇردە جالعاسىپ كەلەدى. وسى يگى باستامانىڭ اياسىندا وبلىستىڭ ەكى اۋدانىنداعى ەلدى مەكەندەردە جاڭا مەديتسينالىق پۋنكتتەر پايدالانۋعا بەرىلىپ, اۋىل تۇرعىندارى ءۇشىن ماڭىزدى الەۋمەتتىك نىسانداردىڭ قاتارى تولىقتى.
جاڭاارقا اۋدانىنا قاراستى اينابۇلاق اۋىلىندا بوي كوتەرگەن جاڭا مەديتسينالىق پۋنكتتىڭ اشىلۋ سالتاناتىنا اۋدان پروكۋرورىنىڭ ورىنباسارى جىگەر مالتيكوۆ, اۋدان اكىمىنىڭ ورىنباسارى اسەت امانجولوۆ, اۋداندىق اۋرۋحانانىڭ باسشىلىعى مەن اۋىل تۇرعىندارى قاتىستى. اۋىل جۇرتشىلىعى ءۇشىن كوپتەن كۇتكەن نىساننىڭ اشىلۋى جەرگىلىكتى تۇرعىنداردىڭ قۋانىشىن ەسەلەي ءتۇستى.
زاماناۋي تالاپتارعا ساي سالىنعان مەديتسينالىق پۋنكت قاجەتتى قۇرال-جابدىقتارمەن تولىق قامتاماسىز ەتىلگەن. ەندى اۋىل تۇرعىندارى العاشقى مەديتسينالىق كومەكتى الۋ ءۇشىن اۋدان ورتالىعىنا سابىلماي, ءوز اۋىلىندا ساپالى مەديتسينالىق قىزمەتكە قول جەتكىزە الادى.
جالپى, اۋداندا دەنساۋلىق ساقتاۋ ينفراقۇرىلىمىن جاڭعىرتۋ جانە دامىتۋ جۇمىستارى كەزەڭ-كەزەڭىمەن جۇزەگە اسىرىلىپ كەلەدى. قازىرگى ۋاقىتتا ءبىر فەلدشەرلىك-اكۋشەرلىك پۋنكتتىڭ, بەس مەديتسينالىق پۋنكتتىڭ جانە ءبىر دارىگەرلىك امبۋلاتوريانىڭ قۇرىلىسى تولىق اياقتالىپ, بارلىق قاجەتتى رۇقسات قۇجاتتارى راسىمدەلگەن. سونداي-اق مەديتسينالىق قىزمەت كورسەتۋگە ليتسەنزيالار الىنعان.
بۇدان بولەك, جاڭاارقا اۋداندىق اۋرۋحاناسىنىڭ 90 ورىندىق ستاتسيونارلىق عيماراتىندا جوسپارعا سايكەس كۇردەلى جوندەۋ جۇمىستارى جۇرگىزىلۋدە. بۇل ءوز كەزەگىندە اۋدان تۇرعىندارىنا كورسەتىلەتىن مەديتسينالىق كومەكتىڭ ساپاسىن ارتتىرۋعا مۇمكىندىك بەرەدى.
وسىنداي يگى باستاما ۇلىتاۋ اۋدانىنىڭ شەڭبەر اۋىلىندا دا جالعاسىن تاپتى. مۇندا دا جاڭا مەديتسينالىق پۋنكت ەل يگىلىگىنە بەرىلدى. اشىلۋ راسىمىنە ۇلىتاۋ اۋدانى پروكۋرورىنىڭ مىندەتىن اتقارۋشى, ادىلەت كەڭەسشىسى ءسابيت سەريمبەتوۆ, ۇلىتاۋ وبلىستىق دەنساۋلىق ساقتاۋ باسقارماسىنىڭ باسشىسى رۇستەم نىسامباەۆ, اۋدان اكىمىنىڭ ورىنباسارى الماز قايىربەك جانە اۋىل اقساقالدارى قاتىستى.
ۇلىتاۋ اۋدانىندا دا دەنساۋلىق ساقتاۋ سالاسىن دامىتۋعا ايرىقشا كوڭىل ءبولىنىپ وتىر. كەيىنگى جىلدارى اۋدان كولەمىندە بىرقاتار مەديتسينالىق نىساننىڭ قۇرىلىسى قولعا الىنىپ, ناتيجەسىندە توعىز فەلدشەرلىك-اكۋشەرلىك پۋنكت پەن ءۇش مەديتسينالىق پۋنكتتىڭ قۇرىلىسى تولىق اياقتالدى. قاجەتتى قۇجاتتارى راسىمدەلىپ, مەديتسينالىق قىزمەت كورسەتۋگە ليتسەنزيالار الىندى.
سونىمەن قاتار اۋدان ورتالىعىندا ءبىر مەزەتتە 100 كەلۋشىنى قابىلداي الاتىن جانە 20 توسەكتىك ورىنعا ارنالعان جاڭا اۋداندىق اۋرۋحانانىڭ قۇرىلىسى قارقىندى جۇرگىزىلىپ كەلەدى. قازىرگى تاڭدا قۇرىلىس جۇمىسىنىڭ 70 پايىزى اياقتالعان. نىساندى بيىل قاراشا ايىندا پايدالانۋعا بەرۋ جوسپارلانىپ وتىر.
جاڭادان اشىلعان قوس مەديتسينالىق پۋنكت اۋىل تۇرعىندارىنىڭ ءومىر ساپاسىن ارتتىرۋعا باعىتتالعان ماڭىزدى الەۋمەتتىك جوبالاردىڭ ءبىرى سانالادى. زاماناۋي قۇرال-جابدىقتارمەن قامتىلعان نىساندار حالىققا ساپالى ءارى قولجەتىمدى مەديتسينالىق قىزمەت كورسەتۋگە مۇمكىندىك بەرەدى. ەڭ باستىسى, تۇرعىندار العاشقى مەديتسينالىق-سانيتارلىق كومەكتى ءوز ەلدى مەكەنىندە دەر كەزىندە الىپ, دەنساۋلىعىنا قاتىستى ماسەلەلەردى جەدەل شەشۋگە جاعداي جاسالماق.
حالىقتىڭ ءال-اۋقاتىن ارتتىرۋعا جانە مەديتسينالىق كومەكتىڭ قولجەتىمدىلىگىن قامتاماسىز ەتۋگە باعىتتالعان مۇنداي ماڭىزدى جوبالار الداعى ۋاقىتتا دا ءوز جالعاسىن تاۋىپ, ءوڭىردىڭ الەۋمەتتىك ينفراقۇرىلىمىن نىعايتۋعا قىزمەت ەتە بەرمەك.