وبلىس اكىمى نۇرالحان كوشەروۆ تۇركىستان قالاسىنداعى «كونگرەسس حولل» كەشەنىندە وتكەن سالتاناتتى ءىس-شارادا مەديتسينا قىزمەتكەرلەرىن ءتول مەرەكەلەرىمەن قۇتتىقتادى. جيىندا ءوڭىر باسشىسى كەيىنگى ءۇش جىلدا وبلىستا 115 مەديتسينالىق نىسان سالىنعانىن, بۇگىندە تاعى 25 نىساننىڭ قۇرىلىسى ءجۇرىپ جاتقانىن اتاپ ءوتتى.
«وڭىردە دەنساۋلىق ساقتاۋ سالاسىن دامىتۋ باعىتىندا جۇيەلى جۇمىس اتقارىلىپ كەلەدى. مەديتسينالىق ۇيىمدار 1 548 زاماناۋي قۇرال-جابدىقپەن تولىقتىرىلدى. جوعارى تەحنولوگيالىق قۇرىلعىلار ىسكە قوسىلىپ, ساپالى مەديتسينالىق كومەكتىڭ قولجەتىمدىلىگى ارتتى. جەدەل جاردەم قىزمەتىنە 60 سانيتارلىق اۆتوكولىك پەن 2 ارنايى كەشەندى قۇرىلعى بەرىلدى. وسىلايشا, شالعاي اۋىلدارداعى تۇرعىندارعا دەر كەزىندە كومەك كورسەتۋگە مۇمكىندىك جاسالدى. كادر دايارلاۋ ءىسى دە نازاردان تىس قالعان جوق. جەرگىلىكتى بيۋدجەت ەسەبىنەن 297 دارىگەر-رەزيدەنت دايارلاندى. بيىل اۋىلدىق جەرلەرگە بارعان 73 جاس مامانعا مەملەكەتتىك قولداۋ كورسەتىلەدى», دەي كەلە, وبلىس اكىمى مەديتسينا قىزمەتكەرلەرىنە ەل اماندىعى مەن ۇلت ساۋلىعى جولىنداعى ەسەلى ەڭبەكتەرى ءۇشىن شىنايى العىسىن ءبىلدىردى.
وبلىستىڭ 80%-عا جۋىق حالقى اۋىلدا تۇرادى. وسى ورايدا ءوڭىردىڭ دەنساۋلىق ساقتاۋ سالاسىندا اۋىل حالقىنا مەديتسينالىق كومەكتىڭ قولجەتىمدىلىگىن قامتاماسىز ەتۋ, ساپالى قىزمەت كورسەتۋ, اۋرۋلاردىڭ الدىن الۋ باعىتىنداعى جۇمىستار جۇرگىزىلىپ كەلەدى. مىسالى, «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ازىرلەنگەن ۇلگىلى جوبالاردى قايتا قولدانۋ ارقىلى بىلتىر اۋىلدىق ەلدى مەكەندەردە 35 مەديتسينالىق-سانيتارلىق العاشقى كومەك نىساندارى, تۇركىستان قالاسىندا بالالاردى وڭالتۋ ورتالىعى پايدالانۋعا تاپسىرىلدى. وسى باعىتتاعى جۇمىستار جالعاسىن تاۋىپ, بيىل 21 مەديتسينالىق-سانيتارلىق العاشقى كومەك, 4 جەدەل جاردەم نىساندارى سالىنىپ جاتىر. بۇدان بولەك, وبلىس اۋماعىندا 4 ءىرى مەديتسينالىق نىسان – سارىاعاش قالاسىندا 300 توسەكتىك ورىندىق كوپبەيىندى اۋرۋحانا, ورداباسى اۋدانى, تەمىرلان اۋىلىندا 200 ورىندىق وبلىستىق پەريناتالدىق ورتالىق, تۇركىستان قالاسىندا 570 توسەكتىك ورىندىق كوپبەيىندى اۋرۋحانا, سونداي-اق بىرىككەن اراب امىرلىگىنىڭ ءابۋ-دابي قورى تاراپىنان دەمەۋشىلىك ەسەبىندە قارجىلاندىرىلاتىن تۇركىستاندا جوعارى مارتەبەلى شەيح مۇحاممەد بەن زايد ءال-ناحايان اتىنداعى 80 توسەكتىك ورىندىق پەرزەنتحانا سالىنىپ جاتىر.
«اۋىل تۇرعىندارىنا مەديتسينالىق كومەك كورسەتۋ دەڭگەيىن كوتەرۋ ماقساتىنداعى ۇلتتىق جوبا اياسىندا بىرقاتار مىندەت جۇزەگە اسىرىلادى. مىسالى, اۋىلدىق ەلدى مەكەندەردى نورماتيۆتەرگە سايكەس مساك ۇيىمدارىمەن قامتاماسىز ەتۋ باعىتىندا 49 نىسان سالىندى. اۋىل تۇرعىندارىنا ۋاقتىلى شۇعىل مەديتسينالىق كومەك كورسەتۋ ۇلعايدى. بۇل ورايدا جەتىساي, ورداباسى, سايرام, سارىاعاش اۋداندىق اۋرۋحانالارى كوپبەيىندى ورتالىق اۋداندىق اۋرۋحانا رەتىندە جاڭعىرتىلدى. «مەكتەپ مەديتسيناسىن دامىتۋ تۇجىرىمداماسىنىڭ جوباسى» اياسىندا مەكتەپتەردىڭ مەديتسينالىق كابينەتتەرى 20 ستوماتولوگيالىق قوندىرعى, 348 دەفيبريللياتورمەن قامتاماسىز ەتىلدى», دەيدى وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆ.
مەديتسينالىق ۇيىمداردا «جاساندى ينتەللەكتىنى قولدانۋ ارقىلى راديولوگيالىق زەرتتەۋلەردى ورتالىقتاندىرۋ» جوباسىن ىسكە اسىرۋ اياسىندا PACS-جۇيەسىن ەنگىزۋ جۇمىستارى جۇرگىزىلىپ جاتىر. سونىمەن قاتار بىرىڭعاي بايلانىس نومىرىنە مەديتسينالىق شاقىرتۋلارعا ارنالعان داۋىستىق روبوتتاردى قوسۋ, تۇركىستان قالالىق ورتالىق اۋرۋحاناسىنا سerebra-مي ءينسۋلتىن اۆتوماتتاندىرىلعان دياگنوستيكالاۋعا ارنالعان باعدارلامالىق جۇيەسىن جۇزەگە اسىرۋ جوسپارلانىپ وتىر. ءوڭىر تۇرعىندارى كاسىبي بىلىكتىلىگىن, كىشىپەيىلدىگىن, ۇيىمداستىرۋشىلىق قابىلەتىن جوعارى باعالاپ وتىرعان باسقارما باسشىسى ا.بايدۋاليەۆتىڭ مالىمدەۋىنشە, ەڭ جاڭا, كۇردەلى, بىرەگەي مەديتسينالىق تەحنولوگيالاردى قولدانا وتىرىپ, 2024-2026 جىلدار ارالىعىندا وبلىس كولەمىندە 375 جوعارى مامانداندىرىلعان مەديتسينالىق كومەك كورسەتىلگەن. اتاپ ايتقاندا, 38 بۇيرەك, 4 باۋىر ترانسپلانتاتسياسى, 28 ەكسترا-ينتراكرانيالدى ۆاسكۋليارلى شۋنتيرلەۋ, 26 ينتراكرانيالدى ارتەريالارعا تەرى ارقىلى ستەنتتى يمپلانتاتسيالاۋ, 138 باس, مويىن تامىرلارىنىڭ ەندوۆاسكۋليارلىق ەمبوليزاتسياسى نەمەسە وككليۋزياسى, 17 اۆتوماتتى كارديوۆەرتەر/دەفيبريللياتوردى يمپلانتاتسيالاۋ جامباس, تىزە الماستىرعىشتارىن رەۆيزيالاۋ سىندى وپەراتسيالار جاسالعان.
«وبلىستىڭ 2 ميلليوننان استام حالقىنا قازىرگى تاڭدا 757 مەديتسينالىق ۇيىم قىزمەت ەتەدى. وڭىردە 24 059 مەديتسينا قىزمەتكەرى ەل دەنساۋلىعىن تۇزەۋ جولىندا تەر توگىپ ءجۇر. كەيىنگى جىلدارى الەۋمەتتىك ماڭىزى بار قان اينالىم جۇيەسىنەن بولاتىن, ونكولوگيالىق اۋرۋلار كورسەتكىشى تومەندەپ, ناتيجەسىندە وبلىس تۇرعىندارىنىڭ ورتاشا كۇتىلەتىن ءومىر ءسۇرۋ ۇزاقتىعى 75 جاسقا جەتتى», دەيدى باسقارما باسشىسى.
مەديتسينا قىزمەتكەرلەرى, سالا ارداگەرلەرى, قوعامدىق ۇيىمداردىڭ وكىلدەرى, ءوڭىر تۇرعىندارى قاتىسقان سالتاناتتى جيىندا وبلىس اكىمى نۇرالحان كوشەروۆ ۇزدىك اتانعان مەديتسينا سالاسىنىڭ وكىلدەرىن ماراپاتتادى. اتاپ ايتقاندا, 2 مامان «قۇرمەت» وردەنىمەن, 1 قىزمەتكەر «ەرەن ەڭبەگى ءۇشىن» مەدالىمەن ماراپاتتالدى. سونداي-اق مەديتسينا قىزمەتكەرلەرىنە وبلىس اكىمىنىڭ «وبلىسقا سىڭىرگەن ەڭبەگى ءۇشىن» توسبەلگىسى, العىس گراموتالارى تاپسىرىلدى. وتكەن جىلدىڭ قورىتىندىسىندا وبلىستىق نەگىزگى مەديتسينالىق كورسەتكىشتەردىڭ ورىندالۋىندا ۇزدىك ناتيجە كورسەتكەن ساۋران اۋداندىق ەمحاناسىنا جاڭا اۆتوكولىكتىڭ كىلتى تاپسىرىلدى. سونىمەن قاتار وڭىردەگى بەس وڭالتۋ ورتالىعىنا دەمەۋشىلەر ەسەبىنەن مەديتسينالىق قۇرال-جابدىقتار ساتىپ الۋعا ارنالعان 2 ملن تەڭگەلىك سەرتيفيكاتتار بەرىلدى.
ءىس-شارا اياسىندا قاتەرلى دەرتتەن ايىعىپ شىققان ازاماتتار ءسوز سويلەپ, ءوز ومىرلەرىن ساقتاپ قالعان دارىگەرلەرگە العىسىن جەتكىزدى. ەلىمىزگە تانىمال ونەرپازدار كونتسەرتتىك باعدارلامالارىن ۇسىنىپ, قاتىسۋشىلارعا كوتەرىڭكى كوڭىل-كۇي سىيلادى.
تۇركىستان وبلىسى