مەديتسينا قىزمەتكەرلەرى جايىندا ءسوز قوزعالا قالسا, اۋىل-ايماقتارداعى جۇرتتىڭ دەنساۋلىعىن ساقتاۋ جولىندا ايانباي ەڭبەك ەتىپ كەلە جاتقان ماماندار تۋرالى از ايتىلاتىنى شىندىق. ءبىز بايانداعالى وتىرعان تەرەڭكول اۋداندىق اۋرۋحاناسىندا ادام جانىنىڭ اراشاسى بولۋدى ءوز ءومىرىنىڭ باستى مۇراتىنا اينالدىرعان جاندار ەڭبەك ەتەدى.
مەيىربيكەلەر – ناۋقاسقا شيپا سىيلايتىن, جۇرەك جىلۋىن توگىپ, توزىمدىلىگى مەن ىسىنە بەرىكتىگى ارقىلى ەمدەلۋشىنىڭ دەرتىنەن ايىعۋىنا سەبەپكەر بولاتىن جاندار. وسىناۋ يگىلىكتى جولعا سانالى عۇمىرىن ارناپ, مەديتسينا سالاسىندا ۇزاق جىل بويى ايانباي تەر توگىپ كەلە جاتقان بىلىكتى ماماننىڭ ءبىرى – ليۋبوۆ رياجكو.
ليۋبوۆ الەكساندروۆنا 1986 جىلى پاۆلودار مەديتسينالىق ۋچيليششەسىن «مەيىربيكە» ماماندىعى بويىنشا ءتامامدايدى. سول جىلى قازىرگى تەرەڭكول اۋداندىق اۋرۋحاناسىندا ەڭبەك جولىن باستاپ, 30 جىلدان استام ۋاقىت بويى ءبىر عانا مەكەمەدە تاپجىلماي قىزمەت ەتىپ كەلەدى. وسى ۋاقىت ىشىندە ول ءوزىن بىلىكتى, جاۋاپتى ءارى ىزگى نيەتتى مامان رەتىندە كورسەتە ءبىلدى.
«بۇگىنگى مەديتسينا سالاسى كوز ىلەسپەس جىلدامدىقپەن دامىپ جاتىر. اۋىلدىق جەردە بولساق تا, كاسىبي ءبىلىم مەن داعدىلارىمىزدى ۇزدىكسىز جەتىلدىرىپ, بىلىكتىلىكتى ارتتىرۋ كۋرستارىنان تۇراقتى تۇردە ءوتىپ تۇرامىز. بۇل مەديتسينالىق كومەكتى جوعارى دەڭگەيدە كورسەتۋگە مۇمكىندىك بەرەدى. قازىرگى كۇنى اۋرۋحانانىڭ جالپى كەشەندىك بولىمشەسىندە انەستەزيست-مەيىرگەر بولىپ ەڭبەك ەتۋدەمىن», دەيدى ول.
ل.رياجكو جوعارى كاسىبيلىگى, ەمدەلۋشىلەرگە دەگەن ەرەكشە قامقورلىعى مەن ماماندىعىنا دەگەن ادالدىعى ارقىلى ارىپتەستەرى اراسىندا عانا ەمەس, كوپشىلىك اراسىندا دا شىنايى قۇرمەتكە يە بولعان جان. كوپجىلدىق قالتقىسىز قىزمەتى, دەنساۋلىق ساقتاۋ سالاسىن دامىتۋعا سىڭىرگەن ەسەپسىز ەڭبەگى لايىقتى باعالانىپ, «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىسىمەن ماراپاتتالعان.
ليۋبوۆ الەكساندروۆنا جۇبايىمەن بىرگە شاڭىراعىنىڭ شاتتىعىن ەسەلەپ, ونەگەلى وتباسى اتانىپ وتىر. ماماننىڭ ايتۋىنشا, بۇگىندە مەيىرگەرلىك قىزمەتكە وزگەرىستىڭ قاجەتتىگى كۇننەن-كۇنگە ايقىن سەزىلۋدە. ەڭبەكتەرىنىڭ باعالانۋى, جەكە ماماندىققا اينالۋى كۇن تارتىبىنە شىعىپ, مەملەكەتتىك دەڭگەيدە قاراستىرىلۋى سونى ايعاقتايدى.
تەرەڭكول اۋرۋحاناسىندا ۇزاق جىلدان حالىقتىڭ قۇرمەتىنە يە بولىپ كەلە جاتقان تاعى ءبىر مەديتسينا قىزمەتكەرى – سۆەتلانا دۆينيانينا. 1989 جىلى پاۆلودار مەديتسينالىق ۋچيليششەسىن ءتامامداپ, ارناۋلى ورتا مەديتسينالىق ءبىلىم الىپ شىققان سوڭ بىردەن اۋدان ورتالىعىنا كەلىپ, اۋرۋحاناعا جۇمىسقا ورنالاسادى. مەيىرگەر رەتىندە ءوزىنىڭ بۇكىل ەڭبەك جولىندا ۇنەمى كاسىبي تۇرعىدان وسۋگە ۇمتىلىپ, مىندەتىنە ەرەكشە جاۋاپكەرشىلىكپەن قاراپ, ءبىلىمىن توقتاۋسىز جەتىلدىرىپ كەلەدى. ەڭبەكقورلىعىنىڭ ارقاسىندا 1996 جىلدان باستاپ جۇمىسىن رەنتگەن-لابورانت رەتىندە جالعاستىردى. بۇل قىزمەتتە جيناقتاعان مول تاجىريبەسىن, قىراعىلىعى مەن جوعارى بىلىكتىلىگىن تولىقتاي كورسەتە ءبىلدى.
«ۇزاق جىلعى قىزمەت بارىسىندا تاجىريبەلى مامان رەتىندە بىرنەشە رەت بىلىكتىلىكتى ارتتىرۋ كۋرستارىنان ءوتتىم. زاماناۋي دياگنوستيكالىق تەحنولوگيالاردى مەڭگەرىپ, ءوز ءبىلىمىمدى ۇنەمى دالەلدەپ وتىرۋعا تۋرا كەلەدى. كاسىبي جەتىستىكتەرىم كوپتەگەن سەرتيفيكاتپەن, ديپلوممەن, وزگە دە ماراپاتپەن باعالاندى», دەپ اتاپ ءوتتى مامان.
سۆەتلانا پەتروۆنا ىسكەرلىگى مەن ەڭبەكقورلىعى, كاسىبىنە دەگەن ادالدىعى ارقاسىندا ارىپتەستەرى اراسىندا زور ابىروي مەن قۇرمەتكە يە بولدى. ەمدەلۋشىلەر ونى مەيىرىمدىلىگى مەن ءار ادامعا ەرەكشە ىقىلاسپەن قارايتىن قامقورلىعى ءۇشىن قادىرلەيدى. اياۋلى جان كاسىبي بيىكتەردى باعىندىرىپ قانا قويماي, وتباسىندا دا ارداقتى انا اتانا ءبىلدى. تاربيەلەپ وسىرگەن قىزى دا اناسىنىڭ ءىزىن باسىپ, ىزگى ماماندىقتى تاڭداعان. بۇگىندە ول اۋداندىق اۋرۋحانانىڭ جالپى كەشەندىك بولىمشەسىندە مەيىرگەر بولىپ ەڭبەك ەتىپ, اۋلەتتىك ءداستۇردى لايىقتى جالعاستىرىپ كەلەدى.
پاۆلودار وبلىسى,
تەرەڭكول اۋدانى