استانا. 25 قاڭتار. اقش-تىڭ شىعىس ايماقتارىندا تولاسسىز جاۋعان قاردىڭ سالدارىنان 31 ادام قازا تاپتى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
جەرگىلىكتى تۇرعىندار جول-كولىك وقيعالارىنان العان جاراقاتتارى, گازعا ۋلانۋلارى جانە قار تازالاۋ جۇمىستارى كەزىندە فيزيكالىق تۇرعىدان ارتىق قيمالداپ, جۇرەك تالمىسىنا الىپ كەلۋىنە بايلانىستى كوز جۇمدى.
اقش-تىڭ بىرنەشە قالالارىندا تولاسسىز جاۋعان قاردان مەملەكەتتىك قىزمەت ورىندارى جۇمىستارىن توقتاتۋعا ءماجبۇر بولدى. وسىعان بايلانىستى ەل استاناسى ۆاشينگتون باسشىلىعىنىڭ قىزمەتكەرلەرىنە دە دەمالىس كۇندەرى بەرىلدى. سونداي-اق, سوڭعى كۇندەرى تابيعاتتىڭ توسىن سىيىنان بىرنەشە مىڭ اۋە رەيستەرى كەيىنگە شەگەرىلدى.
ايتا كەتەيىك, وتكەن دەمالىس كۇندەرى اقش-تىڭ 11 شتاتىندا اۋا رايىنىڭ قولايسىزدىعىنا بايلانىستى توتەنشە جاعداي جاريالاندى. العاشقىدا ماماندار ۆاشينگتوندا جاۋعان قاردىڭ قالىڭدىعى 60 سانتيمەترگە دەيىن جەتەدى دەپ توپشىلاعان. الايدا, بۇل كورسەتكىش كەيىنىرەك 1 مەترگە دەيىن جەتتى. وسىعان بايلانىستى نيۋ-يورك جانە نيۋ-دجەرسي ايماعىن سۋ باسۋ قاۋپى ءتونىپ تۇر. ال ۆيرگينيا شتاتىندا 1 مىڭعا جۋىق جول اپاتى تىركەلدى.
ايان ءابدۋالي.
دەرەك, سۋرەت: تاسس.