كوكشەتاۋ. 24 قاڭتار. اقمولا وبلىستىق ىشكى ىستەر دەپارتامەنتىنىڭ قىزدارى ءوزى تۋىپ, ونى كوشەدەن تاۋىپ العان وزگەنىڭ نارەستەسى رەتىندە كورسەتپەك بولعان قىزدىڭ تەرىس ارەكەتىن اشكەرەلەدى. بۇل تۋرادى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
وقيعا بىلاي بولعان. بيىلعى جىلدىڭ 19 قاڭتارىندا تسەلينوگراد اۋداندىق ىشكى ىستەر بولىمىنە وسى وڭىردەگى ەلدى مەكەندەردىڭ بىرىندە تۇراتىن 20 جاسار ازاماتشا حابارلاسىپ, ءۇيدىڭ الاڭىندا قاتىرما قوراپقا سالىنعان ايەل جىنىستى جاڭا تۋعان نارەستەنىڭ جاتقانىن كورگەنىن جەتكىزەدى.
بىراق ونىڭ بۇل «قۋلىعىنىڭ» ادىمى تىم قىسقا بولدى. پوليتسيا قىزمەتكەرلەرى شۇعىل جۇرگىزىلگەن جەدەل شارالاردىڭ ناتيجەسىندە بوبەكتى حابار بەرۋشى ازاماتشانىىڭ ءوزى تۋعانىن انىقتادى. ول ءوزىنىڭ جۇكتىلىگى مەن وزدىگىمەن بوسانعانىن جاسىرۋ ءۇشىن ىشكى ىستەر ورگاندارىنا كورىنەۋ جالعان شاعىم بىلدىرگەن بولىپ شىقتى.
قازىر وسى ىسكە قاتىستى سوتقا دەيىنگى ءوندىرىس قوزعالىپ, تەرگەۋ جۇرگىزىلۋدە. ازاماتشانىڭ ءىس-ارەكەتىندە كورىنەۋ جالعان شاعىم ايتۋ جانە بالالاردىڭ ءومىرى مەن دەنساۋلىعىن ساقتاۋدى قامتاماسىز ەتۋ بويىنشا مىندەتتەردى لايىقسىز ورىنداۋ بەلگىلەرى قاراستىرىلادى.
«قازىرگى تاڭدا نارەستە مەن اناسى دارىگەرلەردىڭ قاراۋىندا», - دەلىنگەن حابارلامادا.
باقبەرگەن امالبەك.
دەرەك: اقمولا وبلىستىق ىشكى ىستەر دەپارتامەنتىنىڭ ءباسپاسوز قىزمەتى.