استانا. 24 قاڭتار. جامبىل وبلىسى تۇرار رىسقۇلوۆ اۋدانىنان 3 شاقىرىم جەردە ورنالاسقان سادىحان قىستاۋىندا تىكۇشاق اپاتقا ۇشىراپ, 1 ادام زارداپ شەكتى. بۇل تۋرالى mail.ru-عا سىلتەمە جاساعان egemen.kz حابارلادى.
ىشكى ىستەر مينيسترلىگى توتەنشە جاعدايلار جونىندەگى كوميتەتىنىڭ رەسمي وكىلى رۋسلان يمانقۇلوۆتىڭ حابارلاۋىنشا, اپاتقا ۇشىراعان مي-2 تىكۇشاعىنان 1 ادام زارداپ شەككەن. ول: «ازىرگە زارداپ شەككەن ادامنىڭ كىم ەكەنى بەلگىسىز. ال تىكۇشاق «جاڭا الەم» جاۋاپكەرشىلىگى شەكتەۋلى سەرىكتەستىگى اۆياكومپانياسىنا تيەسىلى. الدىن الا بولجام بويىنشا اۋە كولىگىنىڭ بورتىنان ءورت شىققان بولۋى مۇمكىن», – دەدى. سونداي-اق, رەسمي وكىل تىكۇشاقتىڭ ۇشۋعا جارامدىلىعىن مەن اپاتتىڭ سالدارى جان-جاقتى تەكسەرىلىپ جاتقانىن, تولىق مالىمەت انىقتالعاننان كەيىن تاراتىلاتىنىن جەتكىزدى.
ايتا كەتەيىك, اۋە كولىگى كەشە كەشكە اپاتقا ۇشىراعان بولاتىن. قازىرگى تاڭدا وقيعا ورنىندا قۇقىق قورعاۋ سالاسىنىڭ قىزمەتكەرلەرى تەكسەرۋ جۇمىستارىن جۇرگىزۋدە.
تالعات رايىمبەك.
دەرەك, سۋرەت: mail.ru.