كەشە استانادا «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى ءالي بەكتاەۆتىڭ قاتىسۋىمەن بريفينگ ءوتتى. وندا ەلباسىنىڭ بەسىنشى شاقىرىلعان پارلامەنت ءماجىلىسىن تاراتۋ جانە پارلامەنت ءماجىلىسى دەپۋتاتتارىنىڭ سايلاۋىن كەزەكتەن تىس وتكىزۋ تۋرالى جارلىعىنا بايلانىستى «اۋىل» پارتياسىنىڭ مالىمدەمەسى جاريا ەتىلدى.
جيىندا ءالي بەكتاەۆ «اۋىل» پارتياسىنىڭ باسشىلارى مەن مۇشەلەرى دەپۋتاتتاردىڭ بەسىنشى شاقىرىلعان پارلامەنت ءماجىلىسىن تاراتىپ, ءماجىلىس پەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارىن وتكىزۋ تۋرالى باستاماسىنا قاتىستى مەملەكەت باسشىسىنىڭ وڭ شەشىم قابىلداپ, ءتيىستى جارلىققا قول قويعانىن قۋانىشپەن قابىل العاندارىن جەتكىزدى. سونداي-اق, ول ەلىمىزدىڭ ەكونوميكالىق الەۋەتىن ءسوز ەتە كەلىپ: «بۇگىندە قازاقستان استىق, ءداندى-داقىلدار, ءسۇت-ەت ونىمدەرىنىڭ, بالىق جانە باسقا دا ازىق-ت ۇلىك تۇرلەرىنىڭ ءىرى ەكسپورتتاۋشىسىنا اينالدى. دەسە دە, جاھاندىق ەكونوميكالىق داعدارىستىڭ جاڭا تولقىنى قارساڭىندا ءبىز ءوز بولاشاعىمىزعا, كۇشىمىزگە سەنىمدى بولۋىمىز كەرەك», – دەدى.
سونىمەن قاتار, سپيكەر ەلىمىزدىڭ الدىندا پرەزيدەنت ۇسىنعان 5 ينستيتۋتتىق رەفورمانى ءساتتى جۇزەگە اسىرۋ ارقىلى الەمدىك داعدارىستىڭ سالدارىن جەڭىلدەتۋ مىندەتى تۇرعانىنا نازار اۋدارا كەلىپ: «ءماجىلىس دەپۋتاتتارىنىڭ سايلاۋىن كەزەكتەن تىس وتكىزۋ جانە بارلىق دەڭگەيدەگى ءماسليحاتتار دەپۋتاتتارىنىڭ كەزەكتى سايلاۋىن وتكىزۋ ارقىلى ءبىز حالىق قالاۋلىسى بولۋعا ەڭ لايىقتى, بىلىكتى, قازاقستاننىڭ ناعىز جاناشىر پاتريوتتارىن ىرىكتەي الامىز. سونىمەن قاتار, بۇل – مەملەكەت قۇرىلىسىنىڭ جاڭا كەزەڭىندەگى جاڭادان جاساقتالعان پارلامەنتتە ءوز قارىم-قابىلەتىن كورسەتۋ ءۇشىن وزگە دە پارتيالارعا بەرىلىپ وتىرعان زور مۇمكىندىك», – دەدى.
ءا.بەكتاەۆ ءسوزىنىڭ سوڭىن: «وسى ورايدا, اۋىل جۇرتىنىڭ, قاراپايىم شارۋالار مەن اۋىلشارۋاشىلىق تاۋار ءوندىرۋشى كاسىپكەرلەردىڭ پارتياسى رەتىندە پارلامەنت دەپۋتاتتارىنىڭ دەر كەزىندە كوتەرگەن باستاماسىن قولدايمىز جانە وعان قاتىستى وڭ شەشىم قابىلداعان ەلباسىنا زور العىس ايتقىمىز كەلەدى», – دەپ تۇيىندەدى.
ەسكە سالا كەتەيىك, «اۋىل» حالىقتىق-دەموكراتيالىق پاتريوتتىق پارتياسى 2015 جىلدىڭ 5 قىركۇيەگىندە بۇرىنعى قازاقستان سوتسيال-دەموكراتيالىق «اۋىل» پارتياسى مەن «قازاقستان پاتريوتتارى» پارتياسىنىڭ ەلىمىزدىڭ جانە ازاماتتاردىڭ مۇددەلەرىن ەسكەرە وتىرىپ, ءبىرتۇتاس ۇيىمعا بىرىگۋ تۋرالى شەشىمىنە سايكەس قۇرىلعان بولاتىن.
جولدىباي بازار,
«ەگەمەن قازاقستان».