كەشە ورتالىق كوممۋنيكاتسيالار قىزمەتىندەگى بريفينگتە «قوعامدىق پىكىر» زەرتتەۋ ينستيتۋتىنىڭ اتقارۋشى ديرەكتورى ايگۇل سادۋاقاسوۆا جۇرگىزىلگەن ساۋالداماعا قاتىسقانداردىڭ 96 پايىزى كەزەكتەن تىس پارلامەنتتىك سايلاۋ ەكونوميكالىق ماسەلەلەردى شەشۋگە ىقپالىن تيگىزەدى دەپ سانايتىنىن ءمالىم ەتتى.
«ءبىر اپتا بويى وسىناۋ وزەكتى ماسەلەنى بارشا قوعام تالقىلاپ جاتىر. ءبىز رەسپوندەنتتەرگە ءماجىلىستىڭ كەزەكتەن تىس سايلاۋىنا كوزقاراسى قانداي ەكەنىن بىلۋگە ءتيىستى سۇراقتاردى قويدىق. تەلەفون ارقىلى جاسالعان سۇحباتقا 1200 رەسپوندەنت قاتىستى. الەۋمەتتىك ساۋالداما استانا, الماتى جانە بارلىق وبلىس ورتالىقتارىن قامتىدى. بىرىنشىدەن, پارلامەنت ءماجىلىسىنىڭ كەزەكتەن تىس سايلاۋىن وتكىزۋ بويىنشا باستاما قازاقستاندىقتارعا قالاي اسەر ەتىپ, وسى باستامانى قالاي قولداپ وتىرعاندىعى سۇرالدى. رەسپوندەنتتەردىڭ 93,6 پايىزى بۇل باستاما ۋاقتىلى جاسالدى دەپ ەسەپتەيدى. سونىمەن قاتار, 97,2 پايىزى ەلباسىنىڭ بەسىنشى شاقىرىلعان پارلامەنت ءماجىلىسىن تاراتۋ جانە ءماجىلىس دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى شەشىمىن قولداپ وتىر», – دەدى ا. سادۋاقاسوۆا.
ونىڭ سوزىنە قاراعاندا, رەسپوندەتتەردىڭ 95,4 پايىزى ۇلت جوسپارىن جۇزەگە اسىرۋ ءۇشىن پارتيالار سايلاۋشىلاردىڭ سەنىم مانداتىن الۋى كەرەك ەكەنىن العا تارتادى. سونىمەن بىرگە, ساۋالداماعا قاتىسقانداردىڭ 90 پايىزدان ارتىعى كەزەكتەن تىس سايلاۋ حالقىمىزدىڭ بىرلىگى مەن توپتاسا تۇسكەندىگىن كورسەتەتىنىنە سەنىمدى. بۇل, قازىرگى كۇردەلى ەكونوميكالىق جاعدايدا اسا قاجەت, دەگەن پىكىرلەرىن ءبىلدىرىپتى سۇرالعاندار.
سونداي-اق, ساۋالداماعا قاتىسقانداردىڭ 97,2 پايىزى مەملەكەت باسشىسىنىڭ ساۋاتتى, ىسكەر جانە ەلدىڭ مۇددەسىن قورعايتىن كانديداتتار دەپۋتاتتىققا ۇسىنىلۋى كەرەك دەگەن پىكىرىن قولدايتىندارىن ايتقان كورىنەدى. «قورىتا ايتقاندا, ساۋالداماعا قاتىسقانداردىڭ 97,2 پايىزى كەزەكتەن تىس پارلامەنتتىك سايلاۋدى وتكىزۋ ەكونوميكالىق قيىندىقتاردى شەشۋگە ىقپالىن تيگىزەدى دەپ وتىر», – دەدى ا.سادۋاقاسوۆا.
جاقسىباي سامرات,
«ەگەمەن قازاقستان».