كەشە ينۆەستيتسيالار جانە دامۋ ءمينيسترى اسەت يسەكەشەۆ پەن استانا قالاسىنىڭ اكىمى ادىلبەك جاقسىبەكوۆ ەلورداداعى وندىرىستىك كاسىپورىندار جۇمىسىنىڭ جاعدايىمەن تانىستى.
الكوگولسىز سۋسىندار ءوندىرەتىن «كوكا-كولا الماتى بوتتلەرس» جشس, شىنى وڭدەيتىن «كسس-استانا» جشس, ساۋدا-وندىرىستىك اۆتوماتتاندىرىلعان كەشەنى «KazTexExpo» جشس, جوعارى تەحنولوگيالى ەلەكتروندى-وپتيكالىق جابدىقتار شىعاراتىن «قازاقستان ASELSAN ينجينيرينگ» جشس جانە باسقا دا كاسىپورىندار مىسالىندا مەملەكەتتىك يندۋستريالىق-يننوۆاتسيالىق دامۋ باعدارلاماسىنىڭ جوبالارىن تابىستى جۇزەگە اسىرۋ ساتتەرى كورسەتىلدى. قالىپتاسقان كۇردەلى ەكونوميكالىق جاعدايعا قاراماستان بارلىق كاسىپورىندار جۇمىسىن جالعاستىرىپ قانا قويماي, سونىمەن بىرگە, جۇمىستا زاماناۋي تەحنولوگيالار مەن ەڭ جاڭا تالدامالاردى قولدانا جانە تۇرعىنداردى جۇمىس ورىندارىمەن قامتاماسىز ەتە وتىرىپ, ءوزىنىڭ ءوندىرىسى مەن وتكىزۋ رىنوگىن ۇلعايتۋدى جوسپارلاپ وتىر. سول ارقىلى سالىقتىق تۇسىمدەر دە بيۋدجەتكە تۇراقتى تۇسۋدە.
ينۆەستيتسيالار جانە دامۋ ءمينيسترى مەن استانا اكىمى جوعارى تەحنولوگيالى ەلەكتروندى-وپتيكالىق جابدىقتار شىعاراتىن «قازاقستان ASELSAN ينجينيرينگ» جشس كاسىپورنىندا بولدى. مۇندا تەپلوۆيزورلار, وپتيكالىق جۇيەلەر, لينزالار شىعارىلادى. جوبا قازاقستاننىڭ قارۋلى كۇشتەرى مەن باسقا دا ۆەدومستۆولارىن قاجەتتى وپترونيكامەن قامتاماسىز ەتۋ ءۇشىن جۇزەگە اسىرىلىپ وتىر. كاسىپورىندا 129 جۇمىس ورنى قۇرىلعان. وسىندا شىعارىلاتىن ەلەكتروندى-وپتيكالىق جابدىقتاردى, ءتۇنگى كورۋ قۇرالدارىن زاۋىت قازاقستاننىڭ, تۇركيانىڭ, ءۇندىستاننىڭ, قىتايدىڭ, تمد-نىڭ ءبىرقاتار ەلىنە شىعارادى.
سول سياقتى يندۋستريالىق پارك ايماعىندا الەمدىك ءوندىرۋشىلەردىڭ قازىرگى زامانعى اۆتوماتتاندىرىلعان جابدىقتارىمەن جاراقتانعان شىنى وڭدەۋ ءجونىندەگى زاۋىت تا ورنالاسقان. زاۋىتتىڭ وندىرىستىك مۇمكىندىكتەرى قازاقستاننىڭ قۇرىلىس رىنوگىن ەنەرگيا ۇنەمدەيتىن قاۋىپسىز شىنى ونىمدەرىمەن قامتاماسىز ەتۋگە, قۇرىلىستا جاڭا ارحيتەكتۋرالىق شەشىمدەردى پايدالانۋعا جاعداي جاسايدى. قازىرگى ۋاقىتتا زاۋىت ونىمدەرى استانانىڭ قۇرىلىس نىساندارىندا پايدالانىلۋدا. كاسىپورىن «جۇمىسپەن قامتۋدىڭ جول كارتاسى-2020» باعدارلاماسى بويىنشا وقىعان 78 ماماندى جۇمىس ورىندارىمەن قامتاماسىز ەتىپ وتىر.
جۇمىس ساپارى بارىسىندا ءا.يسەكەشەۆ پەن ءا.جاقسىبەكوۆ مەتالل قۇرىلعىلار مەن «سەندۆيچ»-پانەلدەر شىعاراتىن كاسىپورىن – «سپەن قورعاۋ قۇرىلعىلارى زاۋىتى» جشس-دا دا بولدى. زاۋىت وتكەن جىلدىڭ سوڭىندا عانا پايدالانۋعا بەرىلگەن, سوعان قاراماستان قازىردىڭ وزىندە 816 ملن.تەڭگەنىڭ ءونىمىن شىعارىپ وتىر.
ءا.يسەكەشەۆ پەن ءا.جاقسىبەكوۆ بولعان «قازاقستاندا جاسالعان» بەلگىسىمەن شىعارىلاتىن «ۋنيۆەرmag.kz» وتاندىق ونىمدەردى ساتۋ ورتالىعى دا وتكەن جىلدىڭ سوڭىندا اشىلعان بولاتىن. ءبىر اي ىشىندە تاۋار اينالىمى 6 ملن. تەڭگەنى قۇرادى. تاۋارلاردى 35 قازاقستاندىق تاۋار وندىرۋشىلەر ۇسىنىپ وتىر. كاسىپكەرلەر وتاندىق ءوندىرىس ونىمدەرىنە دەگەن استانالىق تۇرعىنداردىڭ تۇراقتى قىزىعۋشىلىعىن اتاپ كورسەتۋدە. سوندىقتان ولار وسىنداي دۇكەندەردى قازاقستاننىڭ وزگە دە وڭىرلەرىندە اشپاق نيەتتە.
«ەگەمەن-اقپارات».