قىزىلوردادا نازارباەۆ زياتكەرلىك مەكتەبىنىڭ وقۋشىسى اقمارال بيسەنوۆا قىسقا تولقىندى پەشكە حوش يىستەندىرگىش جاساۋدىڭ جاڭا ءتاسىلىن ويلاپ تاپتى. ونىڭ ايتۋىنشا, اتالعان ءتاسىل ارقىلى 5 مينۋتتا كەز كەلگەن عيماراتتى قاجەتتى جۇپار يىسكە بولەۋگە بولادى.
يننوۆاتسيالىق جوبانىڭ جەتەكشىسى نۇربول اپپازوۆ: «بۇل ونەرتابىس الەمدەگى بەلگىلى پورفيۋمەرلەردىڭ سۇرانىسىن تۋدىرۋى مۇمكىن. ونى باسقا سالادا دا پايدالانۋعا مۇمكىندىك زور», – دەيدى. سونداي-اق, ول ازىرلەنگەن ءادىستى فارماتسەۆتىك ونەركاسىپتە, ياعني ءدارى دايىنداۋ كەزىندە, تاعام مەن بوياۋ ونەركاسىبىندە ەرىتىندىلەرگە پايدالانۋعا بولاتىنىن ايتتى.
ادەتتە, حوش يىستەندىرگىشكە نەگىز رەتىندە مۇناي قالدىقتارى قولدانىلادى. ويتكەنى, رەاكتسياعا اس سىركە سۋى مەن كاتاليزاتور قاتىسادى. ال جاس ونەرتاپقىشتىڭ بۇل جوباسىنداعى حوش يىستەندىرگىشتە زاتتى ءوندىرۋ كەزىندە قالدىق شىقپايدى ءارى قوسپادان تازالاۋ ءۇشىن قوسىمشا شىعىن تالاپ ەتىلمەيدى. سوندىقتان دا ماماندار اقمارالدىڭ وسى ءتاسىلىن ەكونوميكالىق تۇرعىدا وتە ءتيىمدى دەيدى.
ايتا كەتەيىك, ونەر يەسى بولاشاقتا ءوز جەتەكشىسىمەن بىرلەسىپ بيزنەس-جوسپار ازىرلەپ, دەمەۋشى تاۋىپ, جوبانى قولدانىسقا ەنگىزۋدى كوزدەپ وتىر.
تورەبەك تۇرمانوۆ.