وسكەمەن. 21 قاڭتار. شىعىس قازاقستاندا سوڭعى جىلدارى سپورت ينفراقۇرىلىمىن دامىتۋدا ايتارلىقتاي سەرپىلىس بولدى. بۇل تۋرالى egemen.kz ءتىلشىسى حابارلادى.
2015 جىلدىڭ وزىندە وڭىردە سپورت پەن دەنە شىنىقتىرۋعا ارنالعان 16 نىسان تاپسىرىلدى. بۇل شىعىسقازاقستاندىقتار ءۇشىن نەگىزگى باسىمدىق سالاماتتى ءومىر سالتى ەكەنىن كورسەتەدى.
ارينە, نەگىزگى مىندەت – بۇقارالىق سپورت تۇرلەرىن دامىتۋعا جاعداي جاساۋ, سپورتتاعى جوعارى ناتيجەلەرگە قول جەتكىزۋ, سونىمەن بىرگە وسكەلەڭ بۋىن اراسىنان كەلەشەك چەمپيونداردى دايارلاۋ. ءوڭىر اۋماعىندا سپورتپەن شۇعىلدانۋ بارشاعا قولجەتىمدى بولۋى جانە اركىم ءوزى قالاعان سپورت تۇرىمەن قالاۋىنشا شۇعىلدانا الۋى ءتيىس. بۇل ورايدا وبلىس كولەمىندە 3418 سپورتتىق قۇرىلىمدار قىزمەت ەتەدى. 2015 جىلى سپورتتىق قۇرىلىم سانى 16 نىسانعا ءوستى. ماسەلەن, وسكەمەندەگى دارىندى بالالارعا ارنالعان وبلىستىق سپورت مەكتەپ-ينتەرناتى سالىندى, كاتونقاراعاي اۋدانىنداعى دەنە شىنىقتىرۋ-ساۋىقتىرۋ كەشەنىنىڭ قۇرىلىسى اياقتالدى, بەسقاراعاي اۋدانىندا جاڭا جابدىقتارمەن جابدىقتالعان سپورت ديسپانسەرى اشىلدى.
وبلىستىق سپورت جانە دەنە شىنىقتىرۋ باسقارماسىنىڭ حابارلاۋىنشا, 2016 جىلى سەمەي قالاسىندا دارىندى بالالارعا ارنالعان 200 ورىندىق بالالار مەن جاسوسپىرىمدەردىڭ سپورت مەكتەبى سالىنادى. ال ريددەر قالاسىندا كوپبەيىندى مامانداندىرىلعان سپورت زالى مەن قىسقى سپورت تۇرلەرى بويىنشا دارىندى بالالارعا ارنالعان وبلىستىق مەكتەپ-ينتەرنات اشىلماق. اياگوز قالاسىندا حوككەي ءمودۋلى بوي كوتەرەدى.
ايتا كەتۋ كەرەك, وبلىستا دەنە شىنىقتىرۋ مەن سپورتقا دەن قويعان بالالار مەن جاس جەتكىنشەكتەر سانى 26 864 ادامدى قۇرايدى.
دۋمان اناش.
دەرەك, سۋرەت: egemen.kz.