قاراعاندى. 21 قاڭتار. قاراعاندىدا قارجى مەكەمەلەرىنىڭ تۇتىنۋشىلارى مىنگەن اۆتوكولىكتەردەن اقشا ۇرلاۋ وقيعالارى كوبەيىپ بارادى. سول سەبەپتى وبلىستىق ءىىد باسشىلىعى پوليتسيا جاساعىن كۇشەيتۋ تۋرالى شەشىم قابىلدادى. بۇل تۋرالى وبلىستىق ءىىد ءباسپاسوز قىزمەتىنە سىلتەمە جاساعان egemen. kz ءتىلشىسى حابارلادى.
قىلمىسكەرلەر كوبىنە اۆتوكولىكتەردىڭ دوڭعالاعىن تەسىپ كەتەدى ەكەن. سودان كەيىن كولىك يەسىنىڭ ابىگەرگە تۇسكەنىن اڭدىپ تۇرىپ, ماشينانىڭ ىشىندەگى اقشانى سىپىرىپ اكەتەتىن كورىنەدى. وسىنداي وقيعانىڭ ءبىرى قاراعاندىداعى ءىرى بانكتىڭ جانىندا ورىن الدى. تەمىرتاۋدىڭ ەكى تۇرعىنى جەكە كاسىپكەردىڭ «دودج» كولىگىنىڭ جەلىن شىعارىپ, ىشىندەگى اقشانى ۇرلاماق بولعان. بىراق تا, ولاردىڭ بۇل قۋلىعىن جاقىن ماڭداعى پوليتسيا قىزمەتكەرلەرى كورىپ قالىپ, ۇرىلاردى سول جەردە ۇستاپ العان.
قازىرگى ۋاقىتتا كۇدىكتىلەر ۋاقىتشا ۇستاۋ يزولياتورىندا قاماۋدا وتىر. سوتقا دەيىنگى تەرگەۋ امالدارى جۇرگىزىلۋدە.
قايرات ءابىلدينوۆ.
دەرەك: egemen.kz.
سۋرەت: news.caravan.kz.