كوكشەتاۋ. 21 قاڭتار. اقمولا وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى ادام ولتىرگەن ح. ەسىمدى ازاماتقا قاتىستى ءىس قاراپ, ونى 10 جىل باس بوستاندىعىنا ايىرۋ جازاسىنا كەستى. بۇل تۋرالى وبلىستىق سوت ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى.
سوت پروتسەسى بارىسىندا ح. ەسىمدى ازاماتتىڭ تانىسىمەن بىرگە سپيرتتىك ىشىمدىك ىشكەنى, ونىڭ سوڭى توبەلەسكە ۇلاسىپ, ءجابىر كورۋشىنىڭ ولىمىنە الىپ بارعانى انىقتالدى. اراق ءىشۋ كەزىندە ءوزارا جانجالداسىپ قالعان ەكەۋ ءبىر-بىرىنە جۇدىرىقتارىن الا جۇگىرەدى. توبەلەستىڭ سوڭىنا قاراي سوتتالۋشى بوتەلكەلەسىنە پىشاق ۇرادى.
جابىرلەنۋشى وسى العان دەنە جاراقاتى سالدارىنان اۋداندىق اۋرۋحانانىڭ قابىلداۋ بولمەسىندە قايتىس بولادى.
سوت ۇكىمىمەن ازامات ح. قىلمىستىق كودەكستىڭ 99-بابى, 1-بولىگىمەن («ادام ءولتىرۋ») قىلمىس جاساعانى ءۇشىن كىنالى دەپ تانىلىپ, وعان قاتاڭ رەجيمدەگi تۇزەۋ كولونياسىندا جازاسىن وتەۋمەن 10 جىل مەرزىمگە باس بوستاندىعىنان ايىرۋ جازاسى تاعايىندالدى.
ۇكىم زاڭدى كۇشىنە ەنگەن جوق.
باقبەرگەن امالبەك.
دەرەك, فوتو: اقمولا وبلىستىق سوتىنىڭ ءباسپاسوز قىزمەتى.