اقتاۋ. 21 قاڭتار. اقتاۋدا اتىلىپ ءولدى دەلىنگەن اكىمدىك كۇزەتشىسىنىڭ تۋىستارى پوليتسيانىڭ دەرەگىن جوققا شىعارۋدا. بۇل تۋرالى tumba.kz سايتىنا سىلتەمە جاساعان egemen.kz تىلشىسى حابارلادى.
تۋىستارىنىڭ ايتۋىنشا, 32 جاستاعى كەلىنشەكتىڭ ءوز-وزىنە قول جۇمساۋىنا ەشقانداي نەگىز جوق. كەلىنشەك قايتىس بولاردان بۇرىن 33 جاسىن تويلاۋعا دايىندالىپ جۇرگەن, سونداي-اق, تۋىستارى ونى وبىر دەرتىنە شالدىققان دەپ پوليتسەيلەر تاراتقان اقپاراتتىڭ جالعان ەكەنىن ايتتى. ولار پوليتسيا لەيتەينانتى اكىمدىكتە سىبايلاس جەمقورلىقتىڭ كۋاسى بولعان سوڭ قاساقانا ءولتىرىلدى دەپ سانايدى.
«ەشقانداي اۋرۋى جوق. دەنى ساۋ. ءوز جۇمىسىن ءسۇيىپ جاسايتىن قىز قىرشىن قيىلىپ كەتىپ وتىر. ۇلكەن كوررۋپتسيا بولعان قالالىق اكىمدىكتە. سونى بۇل قىز كورەدى, بىلەدى. ولار قىزىمنىڭ كوزىن جوق قىلىپ, مىلتىعىن قولىنا ۇستاتىپ كەتكەن», – دەيدى مارقۇمنىڭ اناسى ماريزا قۇراقوۆا. تۋىستارىنىڭ كۇماندانۋىنا وقيعا بولعان كەزدە اكىمدىكتەگى باقىلاۋ كامەرالارىنىڭ تۇگەل ءوشىپ قالۋى مەن تەرگەۋشىلەردىڭ قاۋىپتى كەسەل تۋرالى جاۋابى سەبەپ بولىپ وتىر. ماڭعىستاۋ وبلىسىنداعى ونكولوگيالىق ورتالىق قارلىعانىڭ تىركەۋدە جوق ەكەنىن راستايتىن انىقتاما بەرگەنىنە قاراماستان, پوليتسيا ونىڭ ناۋقاس ەكەنىن تاعى ءبىر راستادى.
«مۇقانوۆا دەمينا دەگەن ازامات بىرگە جۇمىس ىستەدى, اكىمدىكتىڭ ديسپەتچەرى بولىپ. ەكەۋى بىرگە وتىرادى, ءشاي ىشەدى, اڭگىمەلەرىن ايتادى, سول كىسىگە ايتىپتى ءوزىنىڭ اۋىراتىنىن», – دەيدى بۇل تۋرالى ماڭعىستاۋ وبلىستىق ىشكى ىستەر دەپارتامەنتى باستىعىنىڭ ورىنباسارى الديرزا قۋانىشكەرەەۆ.
مۇقانوۆانىڭ ءوزى كوپ ۇزاماي جۇمىستان كەتكەن. ال اكىمدىكتىڭ باقىلاۋ كامەرالارىندا قايعىلى وقيعاعا دەيىن اقاۋ بولدى دەيدى پوليتسەيلەر.
قازىر اتالعان ءىس بويىنشا ءوز-وزىنە قول جۇمساۋعا يتەرمەلەۋ بابى نەگىزىندە تەرگەۋ ءجۇرىپ جاتىر. كۇدىكتىلەر دە جوق ەمەس. ەندى وقيعانىڭ ءمان-جايى ەكى ايدان كەيىن دايىن بولاتىن ساراپتامانىڭ قورىتىندىسى بويىنشا انىقتالماق.
قارلىعانىڭ كۇزەت باسقارماسىندا جۇمىس ىستەپ جۇرگەنىنە 11 جىل بولىپتى. جەلتوقساننىڭ 19-نان 20-سىنا قاراعان ءتۇنى اقتاۋ قالاسى اكىمدىگىنە كەزەكشىلىككە تۇسكەن كەلىنشەكتىڭ ءمايىتىن ارىپتەستەرى اجەتحانادان تاپقان بولاتىن. سول كەزدە تەرگەۋشىلەر ونىڭ ءوز-وزىنە قول جۇمساۋىنا وبىر دەرتىنە شالدىعۋى سەبەپ بولۋى مۇمكىن دەگەن ەدى.
گۇلايىم شىنتەمىرقىزى.
دەرەك, سۋرەت: tumba.kz.