استانا. 21 قاڭتار. رەسەيدىڭ روستوۆ وبلىسىندا دوڭىز تۇماۋىن جۇقتىرعاندار سانى 185 ادامعا جەتتى. سونداي-اق, ولاردىڭ التاۋى كوز جۇمدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
دارىگەرلەردىڭ ايتۋىنشا, ولاردىڭ ءبارى اۋرۋدىڭ اسقىنىپ كەتكەن كەزىندە اۋرۋحاناعا كەلگەن. قايتىس بولعانداردىڭ اراسىندا ءبۇلدىرشىن قىز دا بار. ول ەمحاناعا جەتكىزىلگەن سوڭ, ءتىل تارتپاي كەتتى.
باق وكىلدەرىنىڭ ايتۋىنشا, اۋرۋدىڭ سوڭى ولىممەن اياقتالۋى دارىگەرلەردىڭ دەر كەزىندە كومەك كورسەتپەگەنىنەن بولۋى مۇمكىن. وسىعان بايلانىستى تەرگەۋ جۇمىستارى جۇرگىزىلۋدە.
ايتا كەتەيىك, روستوۆ وبلىسىندا وكپە قابىنۋىنا شالدىققان 852 ادامنىڭ اۋرۋى تۇماۋدىڭ اسقىنۋىنا ۇلاسقان. قازىرگى كەزدە 720 ناۋقاس ستاتسيونارلارعا جاتقىزىلسا, 35 ادام تەراپيا بولىمىندە ەم قابىلداۋدا. اۋرۋحانادا بارلىعى 94 بالا بار. ونىڭ بىرەۋى جان ساقتاۋ بولىمىندە جاتىر.
ايان ءابدۋالي.
دەرەك: تاسس.
سۋرەت: medicfoto.ru.