ۋاقىت تالابىنان تۋعان مىندەت

پارلامەنت دەپۋتاتتارىنىڭ كەزەكتەن تىس پارلامەنت ءماجىلىسى جانە بارلىق دەڭگەيدەگى ءماسليحاتتار دەپۋتاتتارى سايلاۋلارىن وتكىزۋ جونىندە ەلباسىنىڭ اتىنا ۇندەۋ قابىلداعانى بەلگىلى. وسى ۇندەۋ مەملەكەت باسشىسى تاراپىنان قولداۋ تاۋىپ وتىر. سوعان سايكەس رەسپۋبليكا پرەزيدەنتى نۇرسۇلتان نازارباەۆ كەزەكتەن تىس پارلامەنت جانە بارلىق دەڭگەيدەگى ءماسليحاتتار سايلاۋلارىن وتكىزۋ جونىندەگى جارلىققا قول قويدى. زاڭدى كۇشى بار بۇل قابىرعالى قۇجات بۇگىنگى ۋاقىت تالابىنان, بۇگىنگى اتقارىلاتىن ءىستى ەرتەڭگى كۇنگە قالدىرماۋ قاجەتتىلىگىنەن تۋىنداعانى بەلگىلى. وسىعان بايلانىستى ءبىز كەشە كەشكە قازاقستان حالقى باتىس قازاقستان وبلىستىق اسسامبلەياسى توراعاسىنىڭ ورىنباسارى, «دوس» قوعامدىق قورىنىڭ ءتورايىمى ۆ.ك.شوحينانى تەلەفون ارقىلى سوزگە تارتقان ەدىك. – ۆەرا كۋزمينيچنا, پرەزيدەنت جارلىعىنىڭ ءمانى مەن ماڭىزىن قالاي تۇسىنەسىز؟ – جارلىققا قول قويىلۋىن تولىعىمەن قولدايمىن. مۇنداي قادام اۋقىمدى ەكونوميكالىق جاعدايلارعا جانە قازىرگى كەزەڭنىڭ كۇردەلىلىگىنە بايلانىستى بولىپ وتىرعانى ءسوزسىز. قازىرگى كۇنى ۇلت جوسپارىنىڭ پراك­تي­كالىق كەزەڭى باس­تالىپ تا كەتتى. سوعان وراي داعدارىسقا قارسى شارالاردى ۋاقتىلى جۇزەگە اسىرۋ ءۇشىن پارلامەنت ءماجىلىسى جانە بارلىق دەڭگەيدەگى ءماسليحاتتار دە­پۋتاتتارىنىڭ سايلاۋلارىن جەدەل تۇردە وتكىزۋ قاجەتتىلىگى تۋىندادى. ەلباسى اتىنا پارلامەنت دەپۋتاتتارىنىڭ ۇندەۋ قابىلداۋىنىڭ باستى سىرى دا وسىندا. اتالعان سايلاۋ ءوز ۋاقىتى بويىنشا العاندا الداعى كۇزگە بەلگىلەنگەنى بەلگىلى. بىراق الەمدىك ەكونوميكالىق احۋالدىڭ قيىنداۋىنا بايلانىستى مەملەكەت تاراپىنان جەدەل ءىس-شارالار الۋ قاجەتتىلىگى تۋىندادى. سولاي بولدى دا. مۇنىڭ باستى كورىنىسى ەلباسى جارلىعىنىڭ جاريالانۋى بولىپ تابىلادى. ەلباسى «ۇلت جوسپارى – قازاقستاندىق ارمانعا باستايتىن جول» اتتى ماقالاسىندا مەملەكەتىمىز بەن قازاقستاندىقتاردىڭ ەكونوميكالىق داعدارىستىڭ ىقپالىن قاتتى سەزىنبەۋى جانە رەسپۋبليكامىز بارىنشا دامىعان وتىز ەلدىڭ قاتارىنا كىرۋ باعىتىنداعى ماقساتىنا جەتۋى ءۇشىن ءتيىستى مىندەتتەردى ايقىنداپ بەردى. دەپۋتاتتار مەن ەلباسى وسىنىڭ ءبارىن ەسكەرىپ بۇگىنگىدەي قادامعا بارىپ وتىرعانى انىق. الداعى ۋاقىتتا سايلاناتىن دەپۋتاتتار كورپۋسىنىڭ جاڭا قۇرامى ەل ەكونوميكاسىن جانە باسقا دا الەۋمەتتىك-مادەني سالالاردى جاڭعىرتۋعا تىڭ سەرپىن بەرە الاتىنىنا سەنىمىمىز مول. جازىپ العان تەمىر قۇسايىن, «ەگەمەن قازاقستان».  باتىس قازاقستان وبلىسى.