اقمولا وبلىسىنىڭ اكىمى سەرگەي كۋلاگين «ALL ENERGY Holding LTD» يزرايل كومپانياسىنىڭ ازياداعى وڭىرلىك بيزنەستى دامىتۋ جونىندەگى ديرەكتورى الەكساندر ۆوپيلوۆپەن كەزدەسىپ, كوكشەتاۋدا جاڭا جىلۋ-ەلەكتر ورتالىعىن سالۋ ماسەلەسىن قاراستىردى. كەزدەسۋگە كومپانيا ديرەكتورىمەن بىرگە «سارىادىر» كەنىشىندەگى «ون ولجا» جاۋاپكەرشىلىگى شەكتەۋلى سەرىكتەستىگىنىڭ باسشىسى مارات نابيەۆ, وبلىستىق دەپارتامەنتتەر مەن باسقارمالاردىڭ باسشىلارى قاتىستى.
جينالعاندار الدىندا ءسوز سويلەگەن شەتەلدىك كومپانيانىڭ وكىلدەرى وبلىس ورتالىعىندا بۇگىنگى تاڭدا ەكونوميكالىق جاعىنان ءتيىمدى, ەڭ ارزان وتىن كوزى قولدانىلاتىن بۋ قازاندىقتارىن سالۋ قاجەتتىگىن ۇسىندى. كومپانيا ديرەكتورى الەكساندر ۆوپيلوۆتىڭ ايتۋىنشا, جەو سالىنعان كەزدە وڭىردەگى جىلۋ ەنەرگياسىنا دەگەن تاپشىلىقتى جويۋعا بولادى. جاڭا جەو 180 مۆت ەلەكتر جانە 450 گكال/ساع. جىلۋ قۋاتىن وندىرۋگە مۇمكىندىك بەرەدى.
جوباعا قاتىستى ۇسىنىس-پىكىرلەردى مۇقيات تىڭداي كەلە, وبلىس اكىمى سەرگەي كۋلاگين بۇگىنگى كۇنى تانىمال كومپانيا ۇسىنىپ وتىرعان جوبانىڭ وڭىردە قىزىعۋشىلىق تۋدىراتىنىن اتاپ ءوتتى. ەلباسى جولداۋىندا ەرەكشە ەكپىن تۇسىرىلگەن ينتەگراتسيالىق ارقاۋمەن ينۆەستيتسيا تارتۋدىڭ ماڭىزى وراسان. نىساننىڭ ەكولوگيالىق جاعىنان ءتيىمدى بولۋىن ەسكەرە كەلە, قارجىلاندىرۋ ماسەلەسىنە توقتالعان ول, ۇكىمەت 7,9 ميلليارد تەڭگە كولەمىندەگى جوبالاردى قولداۋعا مۇمكىندىك بەرىپ وتىرعانىن ەسكە سالدى.
جاڭا جىلۋ ەلەكتر ورتالىعى كوكشەتاۋ ءۇشىن ەڭ وزەكتى ماسەلەنىڭ ءبىرى. بولاشاق ورتالىق وندىرەتىن قۋات كوزدەرى جىل ساناپ ءوسىپ كەلە جاتقان قالانىڭ عانا ەمەس, وعان ىرگەلەس ءۇش اۋداننىڭ سۇرانىسىن وتەي الادى. ال, وبلىس ورتالىعىنىڭ تۇرعىندارى جىل بويى ىستىق سۋدى پايدالانۋ مۇمكىندىگىنە يە بولماق.
بۇعان قوسىمشا, «ALL ENERGY Holding LTD» كومپانياسى ەرەيمەنتاۋ اۋدانىنداعى سارىادىر كومىر كەنىشىندە دە 1000 مۆت قۋاتتاعى ەلەكتر ستانساسىن سالۋ نيەتىندە ەكەندىگىن ءبىلدىردى. ۇسىنىس وبلىس باسشىلىعى تاراپىنان قولداۋ تاپتى. اتالعان ەكى جوبانى ىسكە اسىرۋ قوسىمشا جۇمىس ورىندارىن قۇرۋعا, سالىق سالىمىن مولايتۋعا, وبلىستى قۋات تۇتىنۋشىدان قۋات وندىرۋشىگە اينالدىرۋعا مۇمكىندىك بەرمەك.
باقبەرگەن امالبەك,
«ەگەمەن قازاقستان».
اقمولا وبلىسى.