قازاقستان رەسپۋبليكاسى جوعارى وقۋ ورىندارى قاۋىمداستىعى حالىق قالاۋلىلارىنىڭ ءماجىلىستى تاراتىپ, پارلامەنت پەن بارلىق دەڭگەيدەگى ءماسليحاتتاردىڭ مەرزىمىنەن بۇرىن سايلاۋلارىن تاعايىنداۋ تۋرالى باستاماسىن قولدايدى.
تاۋەلسىزدىك تاريحىنىڭ 25 جىلىندا قازاقستان مەملەكەتتىك قۇرىلىستىڭ ەڭ جاۋاپتى كەزەڭىنە اياق باسىپ, «بەس ينستيتۋتتىق رەفورمانىڭ» ۇلت جوسپارىن ناقتى ىسكە اسىرۋعا كىرىستى. بۇل بارشا قازاقستاندىقتاردىڭ بىرىگىپ, اۋقىمدى جۇمىستى تىڭ قارقىنمەن قولعا الۋىن قاجەت ەتەدى. ساياسي ناۋقان بولاشاعى ءبىرتۇتاس ەلىمىزدى بىرلىككە باستاپ, بيىك ماقساتتار اياسىندا تۇتاسا تۇسۋىنە مۇمكىندىك بەرەدى.
سونىمەن بىرگە, كۇللى الەمدى قۇردىمعا تارتقان تولاسسىز جاھاندىق داعدارىستىڭ كەزەكتى تولقىنى كۇشەيىپ كەلە جاتقانىن بارشامىز كورىپ وتىرمىز. بۇل الەمدىك نارىقتىڭ اجىراماس بولىگىنە اينالعان قازاقستانعا دا زاردابىن تيگىزبەي قويمايدى. دەگەنمەن, ەكونوميكاسى نىعايىپ, اياعىنان نىق تۇرا قويماعان كەزدەردىڭ وزىندە الاپات داعدارىستارعا لايىقتى تويتارىس بەرگەن قازاقستان بۇل قيىندىقتاردان دا ابىرويمەن وتەرىنە سەنەمىز. تەك ساياسي ناۋقاندارعا ۋاقىت ۇتتىرماي, تەزىرەك ىسكە كىرىسۋىمىز قاجەت.
سول سەبەپتى, پارلامەنت دەپۋتاتتارىنىڭ باستاماسىنا قولداۋىمىزدى بىلدىرە وتىرىپ, بارشا قازاقستاندىقتاردى تاعدىرلى ماسەلەگە ءۇن قوسۋعا شاقىرامىز.