ەلىمىزدە باستالىپ وتىرعان 2016 جىلدىڭ 1 قاڭتارىنان باستاپ ازاماتتىق قىزمەتشىلەردىڭ ەڭبەكاقىسى ۇلعايادى. وسىلايشا, دەنساۋلىق ساقتاۋ سالاسى قىزمەتكەرلەرىنىڭ جالاقىسى 28%-عا دەيىن, ءبىلىم سالاسى 29%-عا دەيىن جانە وزگە سالا قىزمەتكەرلەرىنىڭ ەڭبەكاقىسى 40%-عا دەيىن ارتادى.
وسى جىلدىڭ 1 قاڭتارىنان باستاپ ەنگىزىلەتىن ازاماتتىق قىزمەتشىلەر ەڭبەكاقىسىن تولەۋ جۇيەسىنىڭ جاڭا ۇلگىسىنە سايكەس, ولاردىڭ لاۋازىمىن بىلىمىنە, بىلىكتىلىگىنە, اتقاراتىن قىزمەتىنىڭ كۇردەلىلىگى مەن دارەجەسىنە قاراي تومەندەگىدەي ءتورت ساناتقا ءبولۋ كوزدەلگەن:
ۇيىمنىڭ دامۋ ستراتەگياسى ءۇشىن جاۋاپ بەرەتىن جانە باسقارۋ شەشىمدەرىن قابىلدايتىن باسقارۋشى پەرسونال بلوگى (A بلوگى). اتالعان بلوگقا ۇيىم باسشىلارى مەن باسشىلاردىڭ ورىنباسارلارى, ۇيىمداردىڭ باعىنۋ دەڭگەيىنە تاۋەلدى (نەمەسە باسقارۋ جاۋاپكەرشىلىگىنىڭ دەڭگەيىنە بايلانىستى: رەسپۋبليكالىق, وبلىستىق, اۋداندىق) قۇرىلىمدىق بولىمشەلەردىڭ باسشىلارى مەن باسشىلاردىڭ ورىنباسارلارى كىرەدى.
ۇيىمنىڭ نەگىزگى فۋنكتسيالارىنىڭ ىسكە اسىرىلۋىن قامتاماسىز ەتەتىن, نەگىزگى پەرسونال بلوگى (B بلوگى). بۇل بلوگقا دارىگەرلەر, مۇعالىمدەر, عىلىمي قىزمەتكەرلەر, الەۋمەتتىك جۇمىسشىلار, جوو وقىتۋشىلارى جانە ۇيىمنىڭ نەگىزگى فۋنكتسيالارىن ورىندايتىن باسقا دا قىزمەتكەرلەر كىرەدى. اتالعان قىزمەتكەرلەر ءۇشىن ءۇش قىزمەت سالاسى: «دەنساۋلىق ساقتاۋ» «ءبىلىم بەرۋ» جانە «وزگە دە سالالار» بويىنشا لاۋازىمدىق جالاقىلاردى سارالاپ ەسەپتەۋدى ەنگىزۋ ۇسىنىلادى.
اكىمشىلىك-قۇقىقتىق جانە شارۋاشىلىق فۋنكتسيالارىن ورىندايتىن اكىمشىلىك پەرسونال بلوگى (C بلوگى). لاۋازىمداردىڭ اتالمىش بلوگى زاڭگەرلەردى, ەسەپشىلەردى, ەكونوميستەردى, اۋدارماشىلاردى, شارۋاشىلىق قىزمەتىنىڭ مەڭگەرۋشىلەرىن جانە ت.ب. قامتيدى.
قوسالقى جانە تەحنيكالىق فۋنكتسيالاردى ىسكە اسىراتىن قوسالقى پەرسونال بلوگى (D بلوگى). بۇل بلوگقا ءىس-قاعازدارىن جۇرگىزۋشىلەر, ارحيۆاريۋستەر, كاسسيرلەر, كومەندانتتار مەن حاتشىلار كىرەدى.
جاڭا ۇلگى لاۋازىمدىق جالاقىنى ەسەپتەۋ, قوسىمشا اقى مەن ەڭبەك شارتتارى ءۇشىن تولەنەتىن ۇستەماقىنى وڭتايلاندىرۋ ءۇشىن كوەففيتسەنتتەردىڭ ارنايى كەستەسىن ەنگىزۋدى قاراستىرادى.
ازاماتتىق قىزمەتشىلەردىڭ ەڭبەكاقىسىن تولەۋدەگى جوعارىدا كورسەتىلگەن تاسىلدەر مۇعالىمدەر, دارىگەرلەر, الەۋمەتتىك قامسىزداندىرۋ سالاسىنىڭ قىزمەتكەرلەرى ەڭبەگىنىڭ مارتەبەسىن ارتتىرىپ, حالىققا ۇسىنىلاتىن مەملەكەتتىك قىزمەتتەردىڭ ساپاسىن جاقسارتادى, قىزمەتكەرلەردىڭ كاسىبي بىلىكتىلىگىن جوعارىلاتىپ, لاۋازىمىنىڭ وسۋىنە ىقپال ەتەدى. سونىمەن قاتار, مەملەكەت باسشىسىنىڭ قىزمەتكەرلەردىڭ كاسىبي بىلىكتىلىگىنە بايلانىستى نەگىزگى پەرسونالدىڭ ەڭبەكاقىسىن ارتتىرۋ تاپسىرماسىن ىسكە اسىرۋدى قامتاماسىز ەتەدى: دەنساۋلىق ساقتاۋ سالاسىندا – 7%-دان 28%-عا دەيىن, ءبىلىم بەرۋ سالاسىندا – 15%-دان 29%-عا دەيىن, وزگە سالالاردا – 28%-دان 40%-عا دەيىن.
اتالعان ۇلگىنى 2016 جىلدىڭ 1 قاڭتارىنان باستاپ ەنگىزۋ ءۇشىن رەسپۋبليكالىق بيۋدجەتتەن قوسىمشا 272,6 ملرد. تەڭگە, ونىڭ ىشىندە جەرگىلىكتى بيۋدجەتكە ماقساتتى ترانسفەرتتەر رەتىندە 228,8 ملرد, تەڭگە ءبولىندى.
جاڭا ەرەجە مەملەكەتتىك قىزمەتكەرلەر بولىپ ەسەپتەلمەيتىن مەملەكەتتىك جانە قازىنالىق ۇيىم قىزمەتكەرلەرىنە قاتىستى بولماق.
قازاقستاندا بارلىعى 1 ملن.-نان استام ازاماتتىق قىزمەتكەرلەر بار. ولار: مۇعالىمدەر, دارىگەرلەر, مادەنيەت جانە الەۋمەتتىك سالا قىزمەتكەرلەرى, ت.ب.
ەستەرىڭىزگە سالا كەتەيىك, دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ماماندارى قازان مەن جەلتوقسان ايلارى ارالىعىندا ازاماتتىق قىزمەتشىلەر ەڭبەكاقىسىن تولەۋ جۇيەسىنىڭ جاڭا ۇلگىسى بويىنشا رەسپۋبليكانىڭ بارلىق ايماقتارىندا مەملەكەتتىك ۇيىمدار مەن كاسىپورىنداردىڭ ەسەپشىلەرى مەن كادر قىزمەتى جۇمىسكەرلەرىن وقىتۋ شارالارىن جۇرگىزدى. وقۋعا بارلىعى 9 مىڭنان استام ادام قاتىستى.
مەرەكە تاڭاتاروۆ.