قوي جىلىنا وكپەمىز جوق. قيىندىقتارىنان گورى بيىك اسۋ-بەلەستەرىمەن كوبىرەك ەستە قالدى. شۇكىرشىلىك, ەلىمىز بويىنشا اۋىز تولتىرىپ ايتاتىن جەتىستىكتەرىمىز بارشىلىق. ەندى, مىنە, مەشىن جىلىنىڭ ارايلى تاڭى اتىپ, قارىشتى قادامدارعا جەتۋدى بەلگىلەپ وتىرمىز. ەلباسى جاڭاجىلدىق قۇتتىقتاۋىندا تاۋەلسىزدىگىمىزدى باياندى ەتۋ, مەملەكەتتىلىگىمىزدى ودان ءارى نىعايتۋ جولىنداعى قازاقستاندىقتاردىڭ ولشەۋسىز ەڭبەگىن اتاپ ءوتىپ, الدا وكپەگى كوپ بۇرالاڭ جولداردىڭ كۇتىپ تۇرعانىن, بىراق بۇل وتكەلدەن دە قينالماي شىعاتىنىمىزعا سەندىردى.
«ەڭ جاقسى جوسپار – ۋاقىت تالابىنا بەيىمدەلە الاتىن جوسپار» دەگەن ەدى پرەزيدەنتىمىز «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» جولداۋىندا. ونداعى ماقسات–قازاق ۇلتى مەن جۇزدەگەن ەتنوستار مەكەندەيتىن ورتاق وتانىمىزدى الەمدەگى دامىعان ەلدىڭ قاتارىنا قوسۋ, قازاقستاندى «ماڭگىلىك ەل» ەتۋ. جاڭا جاھاندىق سىن-قاتەرلەرگە قارسى مەملەكەت باسشىسى بەلگىلەپ بەرگەن ءبىرتۇتاس ءىس-قيمىل ستراتەگياسىن قارسى قويا وتىرىپ, جۇرتشىلىق بولىپ ەسەلى ەڭبەك ەتەتىن بولساق, تۇعىرىمىزدىڭ بيىك بولارى انىق.
ۇرىس كىرگەن ۇيدەن ىرىس قاشاتىنى بەلگىلى. ونىڭ تالايىن اۋداندىق پارتيا كوميتەتىنىڭ ءبىرىنشى حاتشىسى, وبلىس اكىمىنىڭ ءبىرىنشى ورىنباسارى قىزمەتتەرىن اتقارىپ جۇرگەندە كەزىكتىردىك. 90-جىلداردىڭ باسىندا جەتپىس جىلدان استام ۋاقىت داۋىرلەگەن كەڭەس وداعىنىڭ مەملەكەتتىك جانە قوعامدىق قۇرىلىمدارىنىڭ ىرگەتاسى سوگىلىپ, قابىرعالارىنىڭ تەمىر قۇرساۋلارى كۇيرەپ, جان-جاقتى بىتىراپ كەتۋىنىڭ سەبەبى, «توقىراۋ» دەپ ايدار تاعىلعان كۇيزەلىسكە ۇشىراۋ, «قايتا قۇرۋ» باعدارلاماسىنىڭ جۇزەگە اسپاۋى, اكىمشىل-ءامىرشىل باسقارۋ جۇيەسىنىڭ سىر بەرۋىنەن ەدى. نۇرسۇلتان ءابىش ۇلى دۇنيەجۇزى مەملەكەتتەرىنىڭ بارلىعى دەرلىك ەرتەدەن بەيىمدەلىپ, اتقاراتىن ەركىن ەكونوميكالىق شارۋاشىلىق جۇيەسىنە اۋىسۋ, توتاليتارلىق باسقارۋمەن, بۇيرىقپەن اتقارىلاتىن ىستەردى ليبەرالدى ساياسات جولىمەن شەشۋ جولدارىن تەرەڭ ۇعىنىپ, تاۋەلسىز دامۋ باعىتتارىن تىنىمسىز ىزدەستىرۋمەن بولدى. ەڭسەسى تۇسكەن حالىقتىڭ ساناسىن وياتۋ, رۋحىن كوتەرۋ, بولاشاققا سەنىمىن بەكىتۋ, حال-احۋالدىڭ جاقساراتىنىنا سەندىرۋ, جاسامپاز ىستەرگە باستاۋ ۇزاققا سوزىلعان سىن ۋاقىتى بولسا دا, ەلدىگىمىزدى شىڭدايتىن ءولىارا تۇستان امان-ەسەن وتتىك. ەندىگى مىندەت, ورتاق شاڭىراعىمىزدىڭ يگىلىگى ءۇشىن «ءبىرىمىز – ءبارىمىز ءۇشىن, ءبارىمىز – ءبىرىمىز ءۇشىن» قاعيداسىن بەرىك ۇستانا وتىرىپ, جيناقتاعان تاجىريبەلەرىمىزدى, ۇلتتىق قۇندىلىقتارىمىزدى وسكەلەڭ ۇرپاق بويىنا ءسىڭىرۋ بولىپ تابىلادى. تاۋەلسىزدىك العاننان بەرى 1300-دەن اسا دەنساۋلىق نىسانى مەن 1700-دەن استام ءبىلىم بەرۋ وشاعى بوي كوتەرىپتى. الداعى باقۋاتتى تۇرمىسىمىزدى جاقسارتاتىن الەۋمەتتىك مىندەتتەمەلەردى بارلىق سالالار بويىنشا ۇشىراتۋعا بولادى.
ەندىگى ماسەلە, اركىمنىڭ جەكە باسىنىڭ ىسكەرلىگىندە, جاۋاپكەرشىلىگىندە, باسشىلاردىڭ قاراماعىنداعى قىزمەتكەرلەردى ورتاق ماقساتقا جۇمىلدىرا بىلۋىندە, حالىقتىڭ سەنىمىن اقتاي بىلۋىندە. «ۇكىمەت بار, اسىرايدى» دەگەن پسيحولوگيادان ارىلىپ, ەلىمىزدىڭ الدىندا تۇرعان تاريحي جاۋاپكەرشىلىكتى تەرەڭ ءتۇسىنۋ ارقىلى بيىك تالاپتار ۇدەسىنەن شىعا بىلسەك, مەشىن جىلى دا مەرەيلى بەلەستەرگە تولى بولارى انىق.
قۇدايبەرگەن قاليەۆ, «قۇرمەت» وردەنىنىڭ يەگەرى, وبلىستىڭ قۇرمەتتى ازاماتى.
سولتۇستىك قازاقستان وبلىسى.