قازاقستان ءوز تاۋەلسىزدىگىن العاننان بەرى ساياسي جانە قوعامدىق تۇراقتىلىقتىڭ ارقاسىندا دەربەس ساياسات جۇرگىزىپ كەلەدى. ساناۋلى جىلدار ىشىندە قازاقستان حالىقارالىق قاتىناستاردا زور جەتىستىكتەرگە جەتتى. قازاق ەلىن, قازاقستان مەملەكەتىن الەمدىك قوعامداستىق تانىدى. بۇل قازاقستان باسشىسىنىڭ سىندارلى ساياساتى مەن كەمەل ويلارىنىڭ دۇرىستىعىن كورسەتىپ وتىر.
نۇرسۇلتان نازارباەۆ ەل باسشىلىعىنا اسا اۋىر جىلدارى كەلدى. سول قيىندىقتارعا قاراماستان, جاڭاشىل باسشى رەتىندە ول ەكونوميكانى رەفورمالاۋدى باتىل قولعا الدى. ءساتتى جۇرگىزىلگەن رەفورمالار ۋاقىت وتە جەمىسىن بەرە باستادى. ەلدىڭ ەكونوميكالىق جاعدايى جاقسارىپ, حالىقتىڭ تىرشىلىك-تۇرمىسى كوتەرىلدى. دامىعان ءىرى مەملەكەتتەر قازاقستانمەن ءار سالادا ىنتىماقتاستىق ورناتۋعا ۇمتىلدى. بۇل قازاق ەلىنىڭ ەكونوميكاسىنا ينۆەستيتسيا سالۋ كولەمىن ەسەلەپ ارتتىردى. شەتەلدىك جۋرناليست رەتىندە ءبىز وسىنىڭ بارلىعىن كورىپ-ءبىلىپ وتىردىق.
ن.ءا.نازارباەۆتىڭ باسشىلىعىمەن قازاقستان ەۋروپاداعى قاۋىپسىزدىك جانە ىنتىماقتاستىق ۇيىمى, يسلام كونفەرەنتسياسى ۇيىمى جانە شانحاي ىنتىماقتاستىق ۇيىمى سياقتى بەدەلدى ءارى ىقپالدى حالىقارالىق ۇيىمدارعا توراعالىق ەتىپ, وزەكتى دە وتكىر ماسەلەلەر تالقىلانعان سامميتتەردى, ءىرى حالىقارالىق جيىنداردى تابىستى وتكىزدى. بۇلار قازاقستاننىڭ الەمدەگى بەدەلىن ارتتىرىپ, مارتەبەسىن ءوسىردى. قازاقستان ءبىلىم مەن عىلىم سالالارىن دامىتۋ جولىندا دا ءىرى جەتىستىكتەرگە قول جەتكىزدى. پرەزيدەنتتىڭ باستاماسىمەن «بولاشاق» باعدارلاماسى جۇزەگە اسىرىلدى, كوپتەگەن دارىندى جاستار شەتەلدەردىڭ بەدەلدى ۋنيۆەرسيتەتتەرىندە ءبىلىم الدى, الىپ تا ءجۇر.
ەل باسشىسىنىڭ كورەگەن ساياساتى مەن حالىقتى توپتاستىرا ءبىلۋىنىڭ ناتيجەسىندە قازاقستاندا ءتۇرلى ەتنوس وكىلدەرى تەڭ جاعدايدا ءومىر ءسۇرىپ كەلەدى. بۇل – قازاقستاننىڭ تولەرانتتىلىق ۇلگىسىن كورسەتەدى جانە تاۋەلسىز ەل, ازات حالىق ەكەندىگىن بىلدىرەدى. قازاق ەلىنىڭ جاساعان يگى قادامدارىنىڭ ءبىرى – قازاقستاننىڭ يادرولىق ارسەنالدان ەرىكتى تۇردە باس تارتۋى جانە يادرولىق قارۋدى تاراتپاي, وعان باقىلاۋ ورناتۋ سالاسىندا بەلسەندى ساياسات جۇرگىزۋى دەر ەدىم. وسىنىڭ بارلىعى پرەزيدەنتتىڭ ءوز ەلىنىڭ جارقىن بولاشاعى ءۇشىن جاساعان باتىل جانە ناقتى قادامدارى بولىپ تابىلادى.
ەرەكشە اتاپ وتەتىن كەلەسى ءبىر جايت – قازاقستان ورتالىق ازيادا ءوز جەتىستىكتەرىمەن ەرەكشەلەنىپ وتىرعان مەملەكەت ەكەندىگى. جالپى, ن.ءا.نازارباەۆ مەملەكەتتىك باسقارۋدىڭ وزىندىك مودەلىن جۇزەگە اسىرۋ ارقىلى ءوز ەلىن تۇراقتى جانە اشىق, ادامي قۇندىلىقتاردى ۇستاناتىن, الەم ەلدەرىمەن دوستىق جانە ءوزارا ىنتىماقتاستىق ورناتقان, الەمدىك ساياسي جانە ەكونوميكالىق كارتادا ەرەكشە ورىن الاتىن ىرگەلى ەل ەتە ءبىلدى.
ءوزارا تۇسىنىستىگى مەن كەلىسىمى جاراسىم تاپقان مەملەكەتتىڭ بولاشاعى كەمەل بولاتىنىن جۇرتشىلىق جاقسى بىلەدى. قازاق حالقىن, قازاقستاندى ءبىرشاما بىلەتىن جان رەتىندە مەن بارشا قازاقستاندىقتاردى ەكونوميكالىق داعدارىسقا مويىماي, جاڭا جىلدا جاڭا جەتىستىكتەرگە جەتۋلەرىنە تىلەك قوسامىن.
دوكتور شەريف ءال-باسەل,
«ءال-فادجر» گازەتىنىڭ
باس رەداكتورى.
بىرىككەن اراب امىرلىكتەرى.