قازاقستاننىڭ كونە دە جاڭا قالالارىنىڭ ءبىرى – ورال جىل وتكەن سايىن جاڭارىپ, جاسارىپ جانە جاسانىپ كەلەدى. اسىرەسە, ونىڭ سولتۇستىك-شىعىس جاق بولىگىندەگى بىردەن كوز تارتاتىن جاڭا عيماراتتار – سالتانات سارايى, قادىر مىرزا ءالى اتىنداعى مادەنيەت جانە ونەر ورتالىعى, ونىڭ الدىنداعى اقىن ەسكەرتكىشى, تەننيس كورتى مەن نازارباەۆ زياتكەرلىك مەكتەبى عيماراتتارى تۇتاستاي ءبىر عاجايىپ انسامبل قۇرايدى.
جاڭا جىلدىڭ ارايلاپ اتقان اق تاڭىندا ەلىمىزدىڭ باتىس قاقپاسىنداعى جاڭا قۇرىلىس الاڭى تاعى ءبىر تەڭدەسى جوق ءساندى دە ساۋلەتتى عيماراتپەن تولىقپاق. بۇل جاڭا جىلدىڭ العاشقى كۇنى قۇرىلىسى اياقتالاتىن دوستىق ءۇيى. ونى ءدال وسى كۇنى مەملەكەتتىك كوميسسيا جاقسى دەگەن باعامەن قابىلداپ الماق. كوك تۇستەس كۇمبەزبەن كومكەرىلگەن عيماراتتىڭ سىرتقى كورىنىسى مەن ىشكى ينتەرەرىندە شىعارماشىلىق جانە ارحيتەكتۋرالىق ۇشقىر ويدىڭ جەمىسى اتويلاپ تۇر. دوستىق ءۇيىنىڭ جالپى اۋماعى 4,5 شارشى مەتردى قۇرايدى. بۇگىنگى كۇننىڭ بيىك تالعامىنا ساي بوي كوتەرگەن عيمارات قۇرىلىسىن ورال وڭىرىندەگى تاڭداۋلى قۇرىلىس كومپانيالارىنىڭ ءبىرى – «وتدەلستروي» جشس تۇرعىزعان. اتالعان جوبانىڭ قۇنى 900 ميلليون تەڭگە توڭىرەگىندە.
– دوستىق ۇيىندە وڭىردەگى ەتنومادەني ورتالىقتار مەن بىرلەستىكتەردىڭ وفيستەرى ورنالاساتىن بولادى. مۇندا بۇل ءۇشىن بۇگىنگى زامان تالاپتارىنا ساي جان-جاقتى جابدىقتالعان كابينەتتەر مەن بولمەلەر بار. عيماراتتا دوستىق پەن بىرلىكتىڭ تۋىن بيىك كوتەرۋدى مۇرات تۇتقان ەتنومادەني بىرلەستىكتەر مۇشەلەرىنىڭ ءبارى قازىرگى الەمدىك دەڭگەيدەگى اقپاراتتىق تەحنولوگيانىڭ بارلىق تۇرلەرىن ەمىن-ەركىن پايدالانا الادى. قىسقاسى, مۇندا زەردەلى جاننىڭ جانىنا قاجەتتىنىڭ ءبارى دە مۇقيات ويلاستىرىلعان. مادەني ورتالىقتاردىڭ كابينەتتەرى مەن بولمەلەرى بەلگىلى ءبىر ەتنوس وكىلدەرىنىڭ سالت-داستۇرلەر ەرەكشەلىگىنە ساي جابدىقتالعان. ال ايناداي جارقىراعان بيىك تە ەڭسەلى ءارى اۋماعى اتشاپتىرىم كونفەرەنتس-زالدار مەن كورمە-حولدار ءوزىنىڭ ايشىقتى اجارىمەن كەز كەلگەن ادامدى تامساندىرىپ, تاڭداندىرا الادى. ءسىز مۇمكىن دىبىستىق جازۋ ستۋدياسىنىڭ قىزمەتىن پايدالانعىڭىز كەلەتىن شىعار؟ دوستىق ۇيىندە بۇعان دا تولىق جاعدايلار بار. سونداي-اق, مۇندا قازاقستان حالقى باتىس قازاقستان وبلىستىق اسسامبلەياسى باستاماشى بولعان سانالۋان ءىس-شارالار دا وتكىزىلەتىن بولادى, – دەدى گازەت تىلشىسىنە باتىس قازاقستان وبلىسى قازاقستان حالقى اسسامبلەياسى حاتشىلىعىنىڭ باسشىسى عايسا قاپاقوۆ.
ورال ءوڭىرىن مەكەندەيتىن ءسانتۇرلى ەتنوس وكىلدەرى عانا ەمەس, سونىمەن بىرگە بارشا باتىسقازاقستاندىقتار جاڭا جىلدىڭ العاشقى كۇنى دوستىق پەن بىرلىكتىڭ ودان ءارى تەرەڭدەي تۇسۋىنە نەگىز قالايتىن ساۋلەتتى عيماراتتى پايدالانۋعا بەرەتىن «وتدەلستروي» جشس قۇرىش قولدى قۇرىلىسشىلارىنىڭ كاسىبي شەبەرلىگىنە ءدان ريزا. وسى ارادا بۇل قۇرىلىس كومپانياسى رەسپۋبليكادا ەڭ العاشقىلاردىڭ ءبىرى بولىپ حالىقارالىق ساپا ستاندارتتارىن ەنگىزگەن كاسىپورىن ەكەنىن ايتا كەتكەن ءجون. وسىلايشا ولار باسەكەگە قابىلەتتىلىك دەڭگەيىن كوتەرۋ ارقىلى شەتەلدىك فيرمالارمەن بىرىگىپ قىزمەت جاساۋ مۇمكىندىگىنە قول جەتكىزە ءبىلدى.
...ءيا, جوعارىدا ايتىلعانداي, تورىمىزگە اتتاعان جاڭا جىلدىڭ ارايلاپ اتقان اق تاڭىندا ورال قالاسىنداعى قۇرىلىسى اياقتالاتىن دوستىق ءۇيىنىڭ اسپان تۇستەس كوك كۇمبەزى قازىردىڭ وزىندە الىستان مەنمۇندالايدى.
تەمىر قۇسايىن,
«ەگەمەن قازاقستان».
ورال.
سۋرەتتە: ورال قالاسىندا اشىلاتىن دوستىق ءۇيىنىڭ سىرتقى كورىنىسى.
سۋرەتتى تۇسىرگەن رافحات حالەلوۆ.