ايماقتىڭ عانا ەمەس, تۇتاس رەسپۋبليكانىڭ ەكونوميكاسىنا ەداۋىر سەرپىن اكەلەتىن شىنى زاۋىتىنىڭ قۇرىلىسى باستالدى. بۇل جوبا قىزىلوردا وبلىسىندا ىسكە اسۋى دا ءبىرشاما كەشەۋىلدەدى. ونىڭ دا ءتۇرلى سەبەپتەرى بار. ال قۇرىلىس باستالعاننان كەيىن دە ءتۇرلى توسقاۋىل قويماقشى بولعاندار تابىلدى. دەگەنمەن, بۇگىندە ەشتەڭەگە قاراماي, جوبا قارقىندى تۇردە ءجۇرىپ جاتىر.
بۇل نە جوبا؟ قانداي پايداسى بار؟ ەندى از-كەم وسى جايىنا توقتالا كەتەلىك. زاۋىت ىسكە قوسىلعاندا تاباقشا شىنىلار شىعارا باستايدى. ونىڭ ءونىمى ءارتۇرلى بولماق. ءتىپتى, ۇيالى تەلەفوننىڭ بەتىنە قويىلاتىن شىنىعا دەيىن شىعارا الادى. نەمىس تەحنولوگياسىمەن سالىناتىن زاۋىت بارلىق زاماناۋي قۇرال-جابدىقتارمەن قامتىلماق. زاۋىتتىڭ ءبىر كۇندىك قۋاتتىلىعى 600 توننا شىنى شىعارۋعا جەتەدى. ياعني, بۇل جىلىنا 197 100 توننا تاباقشا شىنى شىعادى دەگەن ءسوز. زاۋىت قۇرىلىسىنا «بايتەرەك» حولدينگى دە بەلسەندى تۇردە اتسالىسىپ جاتىر. سونىمەن قاتار, قۇرىلىستىڭ ستراتەگيالىق ينۆەستورى رەتىندە اقش-تىڭ «Steward Engineers» كومپانياسى تاڭداپ الىنعان. اتالعان كومپانيا قازاقستاننىڭ ينۆەستيتسيالىق قورىمەن بىرىگىپ قۇرىلىستىڭ 20 پايىزىن قارجىلاندىرىپ وتىر. ال قالعان قاراجاتتى «قازاقستاننىڭ دامۋ بانكى» اق وتەيدى. جوبانىڭ جالپى قۇنى 52,1 ميلليارد تەڭگەنى قۇرايدى. وسى ارادا «Steward Engineers» كومپانياسى زاۋىت تولىق قۋاتىندا جۇمىس ىستەگەنگە دەيىن قازاقستاندىق مامانداردى اقش-قا جىبەرىپ, ارنايى تاعىلىمدامادان وتكىزۋدى ۇيعارىپ وتىر. مۇنىڭ ءوزى جەرگىلىكتى كادرلارعا باسىمدىق بەرۋگە ۇلكەن كومەك بولماق.
زاۋىتقا قاجەتتى شيكىزاتتىڭ 95 پايىزى قىزىلوردا وبلىسىندا وندىرىلەدى. اتاپ ايتقاندا, كۆارتس قۇمى, دولوميت, اك تاسىن وندىرەتىن ورىندار دايىن. ال كالتسيلەندىرىلگەن سودانى ءوندىرۋ ءۇشىن «ارالتۇز» اق-پەن بىرلەسكەن جۇمىستار جاسالىپ جاتىر.
شىنى زاۋىتىنىڭ قۇرىلىسى ءۇشىن قىزىلوردا قالاسىنداعى يندۋستريالى ايماقتان 50 گەكتار جەر ءبولىندى. وبلىس بيۋدجەتىنەن وندا ينفراقۇرىلىمدىق جۇمىستار جۇرگىزىلدى. ايتالىق, گاز, سۋ جەلىسى, تەلەفون سىمدارى, اۆتوموبيل جولدارى مەن كارىز جۇيەلەرى تولىقتاي جاسالدى. تەحنيكالىق-ەكونوميكالىق نەگىزدەمەسى مەن جوبالىق-سمەتالىق قۇجاتتارى تولىق دايىندالعان. مەملەكەتتىك ساراپتاما جاسالىپ, قاجەتتى كەلىسىمدەرگە قول قويىلعان. زاۋىتتىڭ جوباسى ماقۇلداندى. بۇگىندە قۇرىلىس جۇمىستارى باستالىپ كەتتى.
كاسىپورىن ىسكە قوسىلعاندا 300 ادام جۇمىسپەن قامتىلادى. ال قۇرىلىس جۇمىستارى كەزىندە 200 ادام جۇمىسقا تارتىلادى. ەڭ باستىسى, قازىردىڭ وزىندە شىنى زاۋىتى وندىرگەن ءونىمدى ساتاتىن نارىق انىقتالىپ جاتىر. سولايشا, زاۋىت قۇىرلىسى اياقتالعانعا دەيىن ءونىمنىڭ قايدا, قالاي ساتىلاتىنى دا بەلگىلى بولماق.
ەرجان بايتىلەس,
«ەگەمەن قازاقستان».
قىزىلوردا.