الەم-جالەم الەم
بۇدان بىلاي ەڭ ءىرى تۇتىنۋشىلىق باعدارلامامەن قامتاماسىز ەتەتىن Microsoft كومپانياسى Outlook پوشتا باعدارلاماسىن قولدانۋشىلارعا ولاردىڭ ەسەپتىك جازبالارىن ۇكىمەتتىك ورگاندار بۇزۋعا ارەكەتتەنگەنى تۋرالى ەسكەرتىپ وتىرماق.
الايدا, كومپانيا قانداي ۇكىمەت تۋرالى ءسوز بولىپ وتىرعانىن ناقتى مالىمدەگەن جوق. Microsoft وكىلى اڭگىمەنىڭ تەك ءتۇرلى ەلدەر تۋرالى ەكەنىن ايتۋمەن شەكتەلدى. ال كومپانيانىڭ بۇرىنعى قىزمەتكەرلەرى اگەنتتىككە ولاردىڭ تۇتىنۋشىلارىنىڭ پوشتالارىن قىتاي بيلىگى بۇزىپ كىرگەنى تۋرالى مالىمدەگەن. بۇل تۋرالى كومپانيا دا حاباردار بولعان ەكەن.
ەستەرىڭىزگە سالا كەتەيىك, اقش بيلىگى ءدال وسىنداي داۋ-دامايدىڭ ورتاسىندا وسىدان 2 جارىم جىل بۇرىن قالعان ەدى. ول كەزدە ارنايى قىزمەتتىڭ قاشقىن قىزمەتكەرى ەدۆارد سنوۋدەن ۇلتتىق قاۋىپسىزدىك اگەنتتىگى مەن باسقا دا ارنايى قىزمەتتەردىڭ اۋقىمدى اڭدۋلارىن اشكەرەلەپ بەردى. الايدا, اقش تاراپى ىزگە ءتۇسۋدىڭ ءمۇمكىن بولار كوزى رەتىندە Microsoft-تى مۇلدە نازارعا الماعان بولاتىن.
اقش-تىڭ بىرنەشە شتاتىندا توتەنشە جاعداي جاريالاندى
كەشە امەريكانىڭ ميسسيسيپي جانە لۋيزيانا شتاتتارىنىڭ گۋبەرناتورلارى توتەنشە جاعداي رەجىمىن جاريالاۋ تۋرالى قاۋلىعا قول قويدى. بۇعان ەلدىڭ وڭتۇستىگىندە تىركەلگەن جويقىن سۋ تاسقىنى سەبەپ بولۋدا.
ايتا كەتەيىك, وتكەن دەمالىس كۇندەرى اقش-تىڭ وڭتۇستىك ايماعىندا تورنادو سوعىپ, نوسەر جاۋىن جاۋدى. سالدارىنان 11 شتاتتىڭ حالقى زارداپ شەگىپ, 50 ادام ءتىلسىز جاۋدىڭ قۇربانى بولدى. ەڭ كوپ ادام شىعىنى ميسسۋري شتاتىندا تىركەلدى. ول جەردە 14 ادام تاسقىن سۋعا اعىپ كەتكەن. سونداي-اق, تەحاس شتاتىنىڭ 11 تۇرعىنى وپات بولعانداردىڭ قاتارىندا.
تابيعاتتى توسىن مىنەز تانىتۋىنا بايلانىستى بۇگىندە جوعارىدا اتالعان ەكى شتاتتان بولەك, تەحاس جانە وكلاحوما شتاتتارىندا دا توتەنشە جاعداي رەجىمى جاريالانعانىن اتاپ وتكەن ءجون. ماماندار قۇيىندى داۋىل مەن جويقىن جەلدىڭ ءالى دە جالعاساتىنىن ايتىپ, دابىل قاعۋدا.
كورتىشقان ۇشاقتىڭ جولىن بوگەدى
ءۇندىستاننىڭ مۋمباي قالاسىنان ۇشىپ شىققان Air India اۋە كومپانياسىنىڭ جولاۋشىلار ۇشاعى كوپ ۇزاماي اۋەجايعا قايتا ورالدى. وعان جولاۋشىلاردىڭ بورتتا كورتىشقان جۇرگەنىن حابارلاۋى سەبەپ بولعان.
تەكسەرىس كەزىندە اۋە كەمەسىنەن ەشقانداي كورتىشقان تابىلمادى. سوعان قارماستان, اۋە كومپانياسى ۇشاقتىڭ ءىشىن تازالاپ, كەمىرۋشىلەرگە قارسى ارنايى شارالار جۇرگىزۋدى باستاپ كەتتى. ال جولاۋشىلار باسقا ۇشاققا وتىرۋعا ءماجبۇر بولدى.
بۇل Air India كومپانياسى ءۇشىن سوڭعى اپتاداعى ءۇشىنشى جاعداي. وسىعان دەيىن ەلدىڭ سولتۇستىگىندەگى اۋەجايلاردىڭ بىرىندە ۇشۋ جولاعىنا قاڭعىباس ءيتتىڭ جۇگىرىپ شىعۋىنا بايلانىستى بىرنەشە ۇشاقتىڭ ۇشۋ ۋاقىتى كەيىنگە شەگەرىلدى. ودان بولەك, اقش-تىڭ نيۋارك قالاسىندا دا وسى كومپانياعا تيەسىلى ۇشاق جۇك كولىگىنە سوقتىعىسىپ, جويقىن اپاتتان امان قالعان بولاتىن.
شىڭعىسحان بەينەلەنگەن كۇلسالعىشتى ساتۋعا تىيىم سالىندى
موڭعوليانىڭ ءادىل باسەكەلەستىك جانە تۇتىنۋشىلاردىڭ قۇقىعىن قورعاۋ اگەنتتىگى شىڭعىسحان بەينەلەنگەن كۇلسالعىشتاردى پايدالانۋعا جانە ساتۋعا تىيىم سالدى. ويتكەنى, بۇل ارەكەت ۇلتتىڭ نامىسىن اياقاستى ەتۋ بولىپ سانالادى دەيدى اگەنتتىك وكىلدەرى.
اتالعان كادەسىيلار موڭعوليامەن قاتار قىتايدا دا شىعارىلادى. سول سەبەپتى ونى وندىرۋگە اگەنتتىك تىيىم سالا الماي وتىر.
بۇگىنگە دەيىن مۇنداي كۇلسالعىشتار موڭعولياداعى «نومين» دۇكەندەر جەلىسىندە ساتىلىپ كەلگەن. وعان شىڭعىسحاننىڭ ەكى ءتۇرلى بەينەسى سالىنعان ءبىرى ۇلان-باتىر ماڭىنداعى الىپ ەسكەرتكىشىنىڭ سۋرەتى بولسا, ەكىنشىسى – ەل استاناسىنداعى پارلامەنت كەشەنى الدىندا تۇرعان ءمۇسىنى.
جاس وتباسى قارىزدارىنان قۇتىلۋ ءۇشىن قىزدارىن ساتپاق بولدى
ءيزرايلدىڭ يەرۋساليم قالاسىندا جاس وتباسى قارىزدارىن تولەۋ ماقساتىندا 3 ايلىق قىزىن ساتپاق بولعانى ءۇشىن سوتتالدى. تەكسەرىس كەزىندە اكەسى قىزىن 26 مىڭ دوللارعا باعالاعانى انىقتالدى.
يزرايلدىك پوليتسەيلەردىڭ ايتۋىنا قاراعاندا, ولار قىزىن ساتپاق بولعان اكەنىڭ جوسپارىن ايقىنداعاسىن, قۇقىق قورعاۋ ورگانىنىڭ قىزمەتكەرىن ونىڭ بالاسىن ساتىپ الۋشى رەتىندە جىبەرىپ, بىرنەشە رەت كەزدەستىرگەن. ءتارتىپ ساقشىلارىنىڭ سوزىنە سەنسەك, قاستىق ويلاعان اكە سوڭعى كەزدەسكەندە قىزىن الىپ كەلىپ, كەلىسىمدى تەزدەتۋدى كوزدەگەن. سونداي-اق, ساتپاق بولعان وتباسى ولاردىڭ قىزدارىن كوپتەگەن ادامدار الۋعا نيەتتى ەكەندىكتەرىن دە جەتكىزدى. ايتسە دە پوليتسەيلەر بۇل اقپارات ەشقانداي دالەلسىز بولعان سوڭ, نەگىزسىز دەپ تاپتى.
ساتۋشى اكە قىزىن جاسىرىن تۇردە جۇمىس جاساعان ءتارتىپ ساقشىسىنا بەرۋ كەزىندە تۇتقىندالدى. ازداعان ۋاقىتتان سوڭ ونىڭ جۇبايى دا ۇستالدى, بىراق ونىڭ بۇل قىلمىستىق ىسكە قاتىسى بار-جوعى انىقتالماعان. ساتىلماق بولعان نارەستە قازىرگى ۋاقىتتا قۇقىق قورعاۋ قىزمەتكەرلەرىنىڭ باقىلاۋىندا.
ساقالدى ايەل شىلىم سۇراعان ەر ادامعا پىشاق الا جۇگىردى
اقش-تىڭ سان ديەگو قالاسىندا پوليتسيا قىزمەتكەرلەرى تەمەكى سۇراعانى ءۇشىن قالا تۇرعىنىن پىشاقپەن جارالاعان ايەل ادامدى تۇتقىنعا الدى.
39 جاستاعى زارداپ شەگۋشىنىڭ ايتۋىنشا, ول Park Boulevard كوشەسىندە تۇرعان قالىڭ توپتان تەمەكى سۇراعان. وسى ساتتە سالماعى شامامەن 180 كيلو بولاتىن ءىرى دەنەلى, ساقالدى ايەل ادام الدىمەن تۇرعان جەرىنەن كەتۋىن بۇيىرعان. ارتىنشا, بىردەن پىشاعىن شىعارىپ, مويىن تۇسىنان جارالاعان.
وقيعا ورنىنان جاسىرىنىپ ۇلگەرگەن قىلمىسكەر, ىزدەۋ بارىسىندا قولعا ءتۇستى. ال زارداپ شەگۋشى جاقىن ماڭايداعى اۋرۋحانالاردىڭ بىرىنە جەتكىزىلدى.