كەشە پارلامەنت سەناتىنىڭ توراعاسى قاسىم-جومارت توقاەۆتىڭ توراعالىق ەتۋىمەن پارلامەنتتىڭ ءتورتىنشى شاقىرىلىمىنىڭ كەزەكتى سەسسياسىنداعى پالاتا وتىرىسى بولدى, دەپ حابارلادى سەناتتىڭ ءباسپاسوز قىزمەتى.
دەپۋتاتتار الدىندا ءسوز العان توراعا جۇمىستىڭ باستالۋىمەن قۇتتىقتاي كەلىپ, ءتورتىنشى سەسسياسىنىڭ اشىلۋىندا مەملەكەت باسشىسى پارلامەنتتىڭ قىزمەتىن جوعارى باعالاعانىن جانە الداعى ۋاقىتتاعى جۇمىستىڭ باعىت-باعدارىن بەلگىلەگەنىن اتاپ ءوتتى.
ق.توقاەۆ پرەزيدەنت ن.نازارباەۆ بەلگىلەگەن دامۋ باعىتتارىن جۇزەگە اسىرۋدى قامتاماسىز ەتەتىن ساپالى زاڭنامالىق بازانى قالىپتاستىرۋ جونىندەگى پارلامەنت پەن ۇكىمەتتىڭ بىرلەسكەن جۇمىسىنا سەنىم ءبىلدىردى.
وتىرىستا دەپۋتاتتار كونستيتۋتسيانىڭ 55-بابىنىڭ 2) تارماقشاسىنا سايكەس, قازاقستان رەسپۋبليكاسى پرەزيدەنتىنىڭ ۇلتتىق قاۋىپسىزدىك كوميتەتىنىڭ باسشىسى قىزمەتىنە نۇرتاي ابىقاەۆتى تاعايىنداۋىنا كەلىسىم بەردى.