كەشە قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا جاڭا 2010-2011 وقۋ جىلىنىڭ اشىلۋ سالتاناتتى ءراسىمى بولىپ ءوتتى.
وعان قر پرەزيدەنتى اكىمشىلىگى, پرەمەر-مينيستر كەڭسەسى, سىرتقى ىستەر مينيسترلىگى, ەكونوميكالىق دامۋ جانە ساۋدا مينيسترلىگى, جوعارعى سوت, يندۋستريا جانە جاڭا تەحنولوگيالار مينيسترلىگى, “سامۇرىق-قازىنا” ۇاق” اق-تىڭ وكىلدەرىمەن قوسا, حانس زايدەل قورىنىڭ ورتالىق ازياداعى جوباسىنىڭ جەتەكشىسى, دوكتور ماكس مايەر, “TOTAL” كومپانياسىنىڭ قازاقستانداعى وكىلدىگىنىڭ باسقارۋشى ديرەكتورى جان-ليۋك پورشەرون, سونىمەن قاتار, گفر, فرانتسيا جانە ەۋروپالىق وداق ديپلوماتيالىق ميسسيالارىنىڭ باسشىلارى قاتىستى.
ەلىمىزدىڭ كاسىبي مەملەكەتتىك قىزمەتشىلەرىن دايارلايتىن جانە مەملەكەتتىك باسقارۋ سالاسىندا عىلىمي ۇسىنىمدار ازىرلەۋمەن اينالىساتىن اتالمىش اكادەميا جاڭا وقۋ ماۋسىمىنا 234 تىڭداۋشىنى قابىلدادى. ولاردىڭ ءىشىندە ديپلوماتيا ينستيتۋتىنا 51 ادام, مەملەكەتتىك جانە جەرگىلىكتى باسقارۋ ينستيتۋتىنا – 102, سوت تورەلىگى ينستيتۋتىنا – 66, مەملەكەتتىك ساياساتتىڭ ۇلتتىق مەكتەبىنە 16 ادام قابىلداندى.
سالتاناتتى اشىلۋ راسىمىندە اكادەميا رەكتورى ارىن ءورساريەۆ مەملەكەت باسشىسىنىڭ العا قويعان مىندەتتەرىنە توقتالا كەلە, بۇل باعىتتا وقۋ ورنىنىڭ اتقاراتىن قىزمەتى ايرىقشا ەكەندىگىن اتاپ ءوتتى. ول سونداي-اق وتكەن جىلى اكادەميا “ەۋرازيالىق مونيتور” اگەنتتىگىنىڭ رەيتينگىسى بويىنشا مەملەكەتتىك باسقارۋ سالاسىندا مامانداناتىن ورتالىق ازيا جانە كاۆكاز جوعارى وقۋ ورىندارىنىڭ اراسىندا ءبىرىنشى ورىندى, سونداي-اق, ءبىلىم بەرۋ ساپاسىن قامتاماسىز ەتۋ جونىندەگى تاۋەلسىز قازاقستاندىق اگەنتتىگىنىڭ نۇسقاسى بويىنشا گۋمانيتارلىق-ەكونوميكالىق جوو-لاردىڭ ۇلتتىق رەيتينگىسىندە ءبىرىنشى ورىندى يەلەنگەندىگىنە ەرەكشە توقتالدى.
مەملەكەتتىك قىزمەتشىلەردى دايارلاۋ بارىسىندا ولاردىڭ شەتەل تىلدەرىن مەڭگەرۋ دەڭگەيلەرىن جەتىلدىرۋ, كاسىبيلىكتەرىن كوتەرۋ ءۇشىن شەتەلدىك كاپيتال تارتۋ سالاسى بويىنشا جان-جاقتى تولىققاندى جۇمىستار اتقارۋ سىندى پىكىرلەر دە اشىلۋ سالتاناتى بارىسىندا تىلگە تيەك بولدى.
اراي ۇيرەنىشبەكقىزى.