ەلورداداعى ۇلتتىق اكادەميالىق كىتاپحانادا ەلباسى نۇرسۇلتان نازارباەۆتىڭ قازاقستان حالقىنا جولداۋى ساراپتالعان “ستراتەگيچەسكي پلان-2020: كازاحستانسكي پۋت ك ليدەرستۆۋ” ەڭبەگىنىڭ تۇساۋكەسەر ءراسىمى ءوتتى. تۇساۋكەسەر سالتاناتىنا ارنالعان باسپاسوز ءماسليحاتىن بەلگىلى رەسەيلىك ساياساتتانۋشى, رەسەي فەدەراتسياسى ۇلتتىق ستراتەگيالار ينستيتۋتىنىڭ حالىقارالىق جوبالار جونىندەگى ديرەكتورى يۋري سولوزوبوۆ جۇرگىزدى.
يۋ. سولوزوبوۆ ءوز سوزىندە اتالعان ەڭبەكتە قازاقستان پرەزيدەنتىنىڭ قازاق مەملەكەتتىلىگىنىڭ قالىپتاسۋىندا الاتىن ورنى جونىندە جان-جاقتى وي تارقاتا كەلىپ, كىتاپتىڭ ەرەكشەلىگىنە توقتالىپ ءوتتى. “قازاقستان پرزيدەنتىنىڭ حالىققا جولداۋى قازاقستاننىڭ ءوز ىشىندە عانا ەمەس, شەتەلدە دە كەڭ كولەمدە تالقىلانىپ, كوپتىڭ ىقىلاسىنا يە بولدى. بۇگىنگى كىتاپ – سونىڭ ءبىر دالەلى. قازاقستان كوپەتنوستى جانە كوپكونفەسسيالى قوعام قۇرۋ ارقىلى ءوزىنىڭ تۇراقتى دامۋ جولىنا ءتۇستى. ال بيىلعى جىلدىڭ قاڭتار ايىنداعى جولداۋ قازاقستاننىڭ الەۋمەتتىك, نارىقتىق جانە دەموكراتيالىق تۇرعىداعى دامۋىنىڭ جاڭا كەزەڭىن ايقىنداپ كورسەتەدى”, دەدى يۋ. سولوزوبوۆ.
كوپشىلىكتىڭ نازارىنا ۇسىنىلعان ەڭبەك 6 بولىكتەن تۇرادى ەكەن. ولاردا قازاقستان ەكونوميكاسىنىڭ ورلەۋى, ەلدىڭ مودەرنيزاتسيا مەن جاڭا يندۋستريالاندىرۋ باعىتىنا قادام باسۋى, “قازاقستان ستراتەگياسى – 2020”, قازاق ەلىنىڭ تمد كەڭىستىگىندەگى ورنى, مەملەكەتتەگى ادام كاپيتالىنىڭ دامۋى جانە ەڭ الدىمەن نۇرسۇلتان نازارباەۆتىڭ باسقارۋشىلىق قارىمى مەن تۇلعالىق بولمىسى سان قىرىنان كورسەتىلىپتى.
تاعى ءبىر اتاپ وتەرلىگى, بۇل ۇجىمدىق ەڭبەكتىڭ اۆتورلىق قۇرامى دميتري اندرەەۆ, اناتولي باركوۆسكي, الەكساندر دۋگين, ميحايل ۆينوگرادوۆ, سەرگەي ەۆستراتەۆ, ۆالەري حومياكوۆ سىندى رەسەيدىڭ بەلگىلى ەكونوميستەرى مەن تاريحشىلارىنان, ساياساتتانۋشى عالىمدارىنان تۇرادى ەكەن. ولار ءوز كەزەگىندە ەلىمىزدىڭ 2020 جىلدارعا دەيىنگى دامۋ باعىتىن ايقىنداپ بەرگەن “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” اتتى پرەزيدەنت جولداۋىنا تەرەڭنەن ساراپتاما جۇرگىزۋگە تىرىسقان. يۋري سولوزوبوۆ ءوز سوزىندە ەڭبەككە ءوز قولتاڭباسىن قالدىرعان كەيبىر اۆتورلاردىڭ پىكىرىن وقىپ بەردى. ءماسەلەن, ساياسي عىلىمدار اكادەمياسىنىڭ اكادەميگى, ساياساتتانۋشى سەرگەي بيريۋكوۆ ن. نازارباەۆتىڭ ەلدى يندۋستريالاندىرۋ جونىندەگى جاڭا تۇجىرىمداماسىن “شىن مانىسىندەگى ستراتەگيالىق باستاما” دەپ كورسەتىپ, ەلباسىنىڭ مەملەكەت باسقارۋ كەزىندەگى كونە مەن جاڭانى, ۇلتتىق ءداستۇر مەن الەمدىك ءتاجىريبەنى شەبەر ۇيلەستىرۋ مانەرىن جوعارى باعالاسا, ال جاھاندانۋ ماسەلەلەرى جونىندەگى ينستيتۋت ديرەكتورى, ەكونوميكا عىلىمدارىنىڭ دوكتورى ميحايل دەلياگين جولداۋدى وقي وتىرىپ, قازاقستاندىقتاردىڭ ءومىر ءسۇرۋ ساپاسىنا, ەلدەگى ادام الەۋەتىنە ايرىقشا ءمان بەرىلىپ وتىرعانىنا كوز جەتكىزۋگە بولاتىنىنا, بۇل – ەلباسىنىڭ مەملەكەت باسقارۋداعى باستى ۇستانىمدارىنىڭ ءبىرى ەكەندىگىنە توقتالىپ وتكەن ەكەن.
تۇساۋكەسەر ءراسىمى كەزىندەگى تاعى ءبىر سوزىندە يۋري سولوزوبوۆ “بۇل ەڭبەكتىڭ رەسەيدىڭ قازاقستان مەملەكەتىنىڭ دامۋىنا ايرىقشا ءمان بەرىپ, ەلدىڭ ءاربىر قول جەتكىزگەن جەتىستىگىنە شىنايى نيەتتەستىك تانىتۋىنىڭ ءبىر كورىنىسى” ەكەندىگىن جەتكىزدى.
ءلايلا ەدىلقىزى.