قازاقتىڭ جەرىن جوڭعارلارمەن بولعان ۇرىستاردا قورعاعان ءباھادۇر, ابىلاي حان ەرلىگىن باعالاعان ەرجۇرەك باتىر مالايسارىنىڭ ەسىمىن ۇلىقتاۋ – ەلدىڭ وتكەنىنە باس ءيىپ, تاعزىم ەتۋ – بۇگىنگى ۇرپاققا پارىز. ەگەمەندىك العان ەلىمىزدىڭ ءتاۋەلسىزدىگىن ساقتاپ قالاتىن قازىرگىدەي ۋاقىتتا جاستاردىڭ بويىندا پاتريوتتىق سەزىم وياتاتىن جەرىمىزدى قورعاپ قالعان باتىر بابالار جولىنىڭ عيبراتى كەرەك-اق.
1741 جىلى ابىلاي جوڭعارلاردىڭ قولىنا تۇتقىنعا تۇسەدى. سۇلتاندى جاۋدان قورعاۋ جولىندا جوڭعارعا قارسى اتتانعان قازاق قوسىنىن مالايسارى باتىر باستاپ بارادى. جوڭعار قوڭتايشىسى قالدان-سەرەنگە قاسقايىپ قارسى تۇرىپ باتىر ابىلايدى تۇتقىننان قۇتقارىپ الادى. باتىردىڭ تارحان شەندى بيىك دارەجەلى اتاعى بار. مالايسارىنىڭ قارىنداسى گاۋھار باتىردىڭ قابانباي ءباھادۇردىڭ جارى بولعانى بەلگىلى. مىنە, وتكەننىڭ بىزگە جەتكەن پاراقتارى وسىلاي سىر شەرتەدى. باتىر جەتىسۋ جەرىندە, جوڭعار الاتاۋىنىڭ باتىس جوتاسىنا جەرلەنەدى. قازىر بۇل جوتا مالايسارى جوتاسى دەپ اتالاتىن كورىنەدى. ال, ءبىزدىڭ وبلىستىڭ ماي اۋدانىنىڭ جەرىن باتىردىڭ تۇقىم-جۇراعاتتارى قونىس ەتكەن ەكەن. اۋداندا مالايسارى باتىر اتىنداعى اۋىل بار. عالىم جامبىل ارتىقباي جازعان شەجىرەلى تاريح بويىنشا سىرىم بالالارى قازاق-جوڭعار سوعىستارىنىڭ كەزىنەن قارقارالى-ەدىرەيدەن باستاپ وسى قازىرگى ماي اۋدانى ورنالاسقان ەرتىس جاعالاۋىن مەكەندەپتى. جۋىردا ەرلان ارىن باسقاراتىن سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتىڭ عىلىمي كەڭەس مۇشەلەرىنە رەسەيدىڭ ءتۇمەن وبلىسىنان جاقسى حابار كەلدى. سونداعى كەمە جاساۋ زاۋىتىنان جاسالىپ شىققان جاڭا تەپلوحود ەرتىس وزەنىنە ءتۇسىرىلىپ, ساپارلارىن باستاماقشى ەكەن. وسى ەلدىڭ سۋ-كولىك سالاسىن باسقاراتىن مينيسترلىگىنىڭ سۋ كەمەسىنە قازاقشا اتاۋ بەرۋ ءجونىندەگى ۇسىنىسىنا عالىمداردىڭ ءبىراۋىزدان كەلىسىپ جازعان مالايسارى تارحان ەسىمىن بەرۋ جونىندەگى وتىنىشتەرى قابىل الىندى. باتىر اتىنداعى الىپ كەمەنىڭ ەرتىس بويىمەن ءجۇزىپ بارا جاتقانىن كورگەننىڭ ءوزى ەلى ءۇشىن قورعان بولعان بابامىزدىڭ ارۋاعى الدىندا اقتالعان مىڭ پارىزدىڭ بىرەۋى عانا بولار.
فاريدا بىقاي, پاۆلودار وبلىسى.