* دميتري وگاي “تارازعا” باس جاتتىقتىرۋشى بولدى. بەلگىلى فۋتبول مامانى تامىزدىڭ سوڭعى كۇندەرى وسى كوماندا تىزگىنىن قولعا ۇستادى. ول كومەكشى ەتىپ وزىمەن قوستانايدا بىرگە جۇمىس ىستەگەن يۋري نوۆيكوۆتى الدى. بيىل 7-12 ورىندار ءۇشىن كۇرەسەتىن كوماندا الدىنا كەلەسى جىلى العاشقى التىلىقتا بولۋ قويىلاتىن سياقتى.
ءوزى تارازدا تۋىپ-وسكەن د.وگاي ويىنشى رەتىندەگى جولىن جەرگىلىكتى “حيميكتە” باستاعان. سوسىن “پاحتاكور” (تاشكەنت), “قايرات” (الماتى), “شاحتەر” (قاراعاندى), “پرويسسەن حامەلن” (گەرمانيا), “اكتيۋبينەتس” (اقتوبە), “تاراز” (تاراز), “مۇنايشى” (اقتاۋ) كوماندالارىندا ونەر كورسەتكەن. جاتتىقتىرۋشى رەتىندە 2000-2001 جىلدارى “ەسىل-بوگاتىر” (پەتروپاۆل), 2002-2004 جىلدارى “ەرتىس” (پاۆلودار), 2005-2009 جىلدارى “توبىل” (قوستاناي) كوماندالارىن باپتادى. قازاقستاننىڭ 2002 جانە 2003 جىلدارداعى چەمپيونى, 2007 جىلعى قازاقستان كۋبوگىنىڭ يەگەرى.
* تەمىرتاۋدىڭ “ارىستاندارى” حوككەي چەمپيوناتىنا قاتىسادى. وسى كەنشىلەر قالاسىندا ءبىر كەزدەرى “سترويتەل”, “بولات” جانە تسسكا اتتى حوككەي كوماندالارىنىڭ بولعانىن جانكۇيەر قاۋىم جاقسى بىلەدى. كەيىن قارجى تاپشىلىعىنان قالاعا كوماندا ۇستاۋ مۇمكىن بولماي قالعان. ەندى بۇرىنعى داڭقتى ءداستۇردى قايتا جالعاستىراتىن ۋاقىت كەلدى. تەمىرتاۋدا “ارىستان” اتتى جاڭا كوماندا پايدا بولدى.
ماۋسىمعا قىزۋ دايىندالىپ جاتقان حوككەي جاساعى قۇرامى ايتارلىقتاي كۇشتى. ول نەگىزىنەن سىرتتان كەلگەن تاجىريبەلى ويىنشىلاردان قۇرالعان. كوماندانى جاتتىقتىرۋ تەمىرتاۋ حوككەيىنىڭ ءتۇلەگى ۆياچەسلاۆ بەلانعا سەنىپ تاپسىرىلدى. ول بۇعان دەيىن “بارىس” جانە “كازتسينك-تورپەدو” كلۋبتارىنىڭ جاتتىقتىرۋشىلار جۇيەسىندە جۇمىس ىستەگەن. ويىنشى رەتىندە “بولات”, “قازاقمىس”, “بارىس” جانە “كازتسينك-تورپەدو” كوماندالارى قۇرامىندا ويناعان.
* “كلاسسيكتەر” الەم چەمپيوناتىنا باراتىن قۇرامىن انىقتادى. ماسكەۋدە وتەتىن جاھان ءبىرىنشىلىگىنە قاتىساتىن ەلىمىزدىڭ گرەك-ريم كۇرەسى قۇراماسىنىڭ ساپى بەلگىلى بولدى. ولاردىڭ قاتارىندا جاسوسپىرىمدەر اراسىنداعى 2006 جىلعى الەم چەمپيوناتىنىڭ كۇمىس جۇلدەگەرى, 2009 ازيا ءبىرىنشىلىگى مەن گولدەن گران-پري فينالىنىڭ قولا جۇلدەگەرى اسحات قۇدايبەرگەنوۆ (55 كگ), 2008 جىلعى ۋنيۆەرسيادانىڭ جەڭىمپازى, 2009 جىلعى ازيا بىرىنشىلىگىنىڭ كۇمىس جۇلدەگەرى, 2010 جىلعى يۆان پوددۋبنىي حالىقارالىق ءتۋرنيرىنىڭ جەڭىمپازى المات كەبىسپاەۆ (60 كگ), ازيانىڭ 2009 جىلعى چەمپيونى دارحان باياحمەتوۆ (66 كگ), 2006 جىلعى ازيا ويىندارىنىڭ جەڭىمپازى, 2009 جىلعى ازيا ءبىرىنشىلىگىنىڭ قولا جۇلدەگەرى رومان مەلەشين (74 كگ), جاسوسپىرىمدەر اراسىنداعى 2008 جىلعى الەم چەمپيوناتىنىڭ كۇمىس جۇلدەگەرى الحازۋر وزدوەۆ (84 كگ), ازيا ءبىرىنشىلىگىنىڭ 2007 جىلعى كۇمىس ءجۇلدەگەرى, 2008 جىلعى بەيجىڭ وليمپياداسىنىڭ قولا جۇلدەگەرى اسەت مامبەتوۆ (96 كگ), جاسوسپىرىمدەر اراسىنداعى 2007 جىلعى الەم چەمپيوناتى مەن 2010 جىلعى يۆان پوددۋبنىي حالىقارالىق تۋرنيرىنىڭ قولا جۇلدەگەرى نۇرماحان تىناليەۆ (120 كگ) بار.
“ەگەمەن-اقپارات”.